Jehová tonajumecopatatsi Tiro tomara pewetsinë pewecua-ajibia-exanaenexatsi pewetsicuenemi
—Jehová nitoroba tatsipaebaponaenexa mapaliwaisicueniaje Tiro tomara pewetsinë yabara.
12 Nejumaitsi: «Daxitajiwiyajuwënënëmë, najamatabëxainaeya tonaxëanaename Tiro tomara pepopeyanacua-ewetsinë petëpaewi petonaxëanaewaji pemëthëjawabelia pecaponaewi», nejai Jehová.
¡Orijibia, jumaitsimëre bajaraponëjawabelia: «Cajumaitsi raja Jehová: ‘Xamë bitso daxitawecua neyapëtaenë daxitacuene. Bajarapacuenia bitso pexanianëmënua. 13 Xamë ponaponame tajapabita, Edén nacuata pebocaepabi. Nenaxatatabiabijawata, naitabëtsiaya rubabiabame daxitawiria ibotoxi, bitso penamatamotsi-ibotonë; mapawiria-ibotoxije: rubí, crisólito, jade, topacio, cornalina, jaspe, zafiro, granate, esmeralda-ata. Bajarapa-ibotonë nerubinexa nenaxatatsijawanëjawabelia, oropanayojawabelia catsanarubabiabame. Bajaraxuanë catsiwajënaexaniawaetatsi tacarajutsinexa xanë taca-exanaematacabi.
14 »Xamë picani taca-itapetsiquerubinenë newetsinënexa. Nexata, xamë neponaponaenëmi xanëDiosonë tajatsutojumata. Neponaponaenëminua tuluputuatuajëta.
15 »Taca-exanaematacabijawaweliacujinae aneconijibia xaniawaetsia picani ponaponabiabame. Itsiata, jemata epatua najamatabëxainame itsacuenia pibisiacuene nexanaenexa. 16 Bitso nexainaenë nenaexanaexae nenawijatsicuenia, nexata najamatabëcuenebijianame pibisiacuene ne-exanaejawabelia. Nexata, xanëwecua canawecuacapitsapatsi. Nexata, tajatsutojumawetsica canawecuaxuabicatsi. Bajarapacuenia tuluputuatuajëta neponaponaejawami cawecuajutatsi. 17 Ca-exanatsi pexanianëmëcuenia, ayaijamatabëcuenenëmënua. Pexanianëxaemë najamatabëcuenebijianame. Ayaijamatabëcuenenëmë taca-exanaejawami matatoxenetsia ayaijamatabëcuenenëmë bitso jamatabënaexaname. Nexata, caxuabatsi irabereca beweliajamatabëcuenenëcuenia pecataenexa. Nexata, nacuanë pewetsiwi cataena apotanejamatabëcuenematatoxenetsijawamë,’ cajai Jehová», jamëre! —jai profeta Ezequiel Tiro tomara pewetsinë yabara. 18-26 […]
C29—C48 [...]