Jeremías wajunupaeba Pasur-jawabelia xua taejitsia Dioso pejume-aebixae
20
Pamatacabi ponapona Pasur, Imer pexënato, bajaraponë sacerdotewi penamatacaitorobaponaponaenë templobojawata. Nexata, bajaraponë itsa jumetane Jeremías petsipaebiliwaisi Jehová pewënëta, xua copiapatsijitsia Judá nacuapijiwijawabelia, 2 nexata bajaraponë piamuxujitsibixae Jeremías pepaebiliwaisi, itoroba pijajiwi naneconitsia-exanaeya pejumaconitsinexa pejumaconitabiabimaëtota. Itorobanua bajarapapejumaconitsicujinae pecobexatatsinexatsi, petaxuxatatatsinexatsinua penaitabarataeya-exanaetablapabeje tusatualia cepowënëjawata.a Bajarapacepo boca imoxoyo templobojawata, tomara matatoyorotsia peyacaranatanutsijawata Benjamín-wënë baupajawata. 3 Nexata, caematacabicujinae bajaraponë icatsia itoroba pijajiwi pewecuajonenexatsi Jeremías.Nexata, Jeremías jumaitsi bajaraponëjawabelia:
—Jehová raja cawënë-itothianab Pasur-wënëwecua, juya pecawënërubinexa Magor-misabib, pejaiwënë, 4 tsipaji Jehová jumaitsi xamë yabara: «Xamë catocopatsianatsi bitso nenacujunawinexa nijacuata, bajarapacuenia nejunawiaya-exanaenënexa daxita niasiwawi pecayapëtaewi-ata. Nexata, daxita niasiwawi catotëpaena nitabarata, nijawajabitsaëwi pecatobecueniatsi. Bajarapacuenia tocopatsianajë daxita Judá nacuapijiwi Babilonia nacua pewetsinë pijawajabitsaëwi pecobeyabelia, bajarapamonae pecaponaenexatsi petaicaewitsicuenia Babilonia nacuajawabelia, itsa jume pijinia, pebeyejebinexatsi pija-espadanëta. 5 Bajarapacuenianua tocopatsianajë pewecuanotsinexatsi bajarapamonae daxitaxuanë Judá nacuapijiwi pexainaejawanëmi bajarapatomarajawata, daxitaxuanë penaxainaeyabijawanëmi, daxitaxuanë-ata penamatamotsijawanë pexainaejawanë, bajarapacuenia daxitaxuanëmi xaina Judá nacua pepopeyanacua-ewetsimonae penamatamotsijawanë. Daxita bajaraxuanë Babilonia pewetsinë pijawajabitsaëwi caponaena Babilonia nacuajawabelia. 6 Bajarapacuenia xamë, Pasur, cacaponaena mapa-irawecuaje daxita nijamonae yajawa Babilonia nacuajawabelia. Nexata, bajarajotalia xamë tëpaename. Camëthëtsiananua. Bajarapacuenia daxita pamonae-ata pecajumecowënëtsiwi netsipaebiliwaisi najumetsënëtsiaya pijaneconi penasiwabëjaiyaniwa, bajarapijinia pacuenia bajarapamonae-ata tëpaena. Mëthëcaenatsinua Babilonia nacuata», jai Jehová xamë yabara —jai Jeremías Pasur-jawabelia. 7-18 [...]
C21—C52 [...]