Jeremías xuabareca atsawaxiyo irabereca petoxotajarabinexa jiwi pitabarata
19
Icatsia, Jeremías jumaitsi Judá nacuapijiwijawabelia:—Jehová raja nejumaitsi: «Ponaename waxi pefaratsinëjawabelia necomuatsinexa atsatota pexanaecanalitoyo. Nexata, necomuatsicujinae junatsianame itsamonae pewetsiwi ancianowicuenia, bajarapacuenia itsamonae sacerdotewi, pewetsiwi ancianowicuenia, nebarëponaenexa. 2 Nexata, bajarapamonae barëponaename Hinom pexënato pija-irajawabelia, petsutobejetuatuajëta pa-iraboca a̱jena̱ tomara pitsapareca, peyacaranatsi-ibopana baupajawawetsina.a Bajarajota, wajunupaebianame tacatsipaebiliwaisi nebarëponaewi pejumetaenexa.
3 »Jumaitsimë tsane Judá nacua pepopeyanacua-ewetsiwijawabelia, Jerusalén tomarapijiwijawabelia-ata mapacueniaje: ‘Marapaliwaisi pacatonajumecopata Jehová, ponë daxitawecua piacuenesaënë tsaponaponae.’ ¡Pajumetaema paxamë, Israel papemomoximë! PanijaDioso pacajumaitsije: «Tsi-itorobianajë mapatomarajawaberenaje bitso piayaicuenejawa, pinijicuenia pibisiacuene panetaenexa. Bajarapapiayaicuene yabara itsa wënëliwaisitaena, itsamonaenexa bitso tsimuxu-atanetsi tsane, bitso petsitapibisialiwaisixaetsi. 4 Bajarapacuenia exanaenajë, tsipaji mapa-israelitawi nenacofënëtsiaya newecuajinawanapa. Mapa-iranua, tajanacuacuenia tataejawami, bajarapamonae neto-exana apobetaja-iracuenia, tsipaji tajuitabiaba inciensonanipërë apopeyapëtaediosowijawabelia xanëwecua. Bajarapamonae, Judá nacuapijiwi, apowënëtae picani bajarapadiosowi. Pepopeyanacua-ewetsiwimitsi, pijasalinaiwimi-ata, apowënëtae bajarapajumapecataeya pexanaenëanë. Orijibia, bajarapamonae ayaibitsaëto pejewaxijiwixi bepona aneconijibi-ata, petajuitsinexa saya altar-jawata. Bajaraxuata, netsita bepewënëtsijawa pejana pija-ira bajarapapejewaxi pejanajamatabëcuene, 5 tsipaji bajarapamonae natonacuenebanuba itsa-altar-jawanë, Baal-wënë jumapecataenë pewënëta. Nexata, bajaraxuanëjumata totajuitabiaba pexënatonëxi, pexënatowaxi-ata Baal-jawabelia. Bajaraxua xanë rowialia itawetajë picanib bajarapamonae pexanaeyaniwa. Baitsi, caeto-ata bajarapitsicuene apo-itorobinë. Pepacuene aponajamatabëxainaenënua jiwi ta-exanaeya-exanaenexa bajarapacuenia. 6 Bajarapitsicuene pexanawanapaexae mapa-irata pebocaefoto imoxoyo baja tawënë-itothianaenexa. Nexata, jiwi apowënëjone tsane Tofet-wënë,c itsa jume, Hinom pexënato pija-irawënë-ata. Saya wënërubiana ‘Jiwi Pebeyejebitaxunae’, pejaiwënë. Xanë Jehovánë xaniajanë bajarapacuenia tawënë-itothianaenexa, bajarapamonae petajuitabiabixae pexi Baal-jawabelia.
7 »Daxita xua najamatabëxaina Judá nacuapijiwi, Jerusalén tomarapijiwi-ata, xaniawaetsia pena-ewetsinexa pijawajabitsaëwiwecua, xanë liwaisi amatononobia-exanaenajë, tsipaji tocaëjëtajë pamonae ayaicuenia pitoyawitsi pebeyejebaponaenexatsi. Nexata, pebeyejebaponaejawatatsi nacayajatsiabobenaena petëpaewi, bajarapamonae petëpaewi pexaenexatsi unupijiwi, pepunaewi-ata.
8 »Copatsianajë mapatomarami jiwinejewa penacopatsinexa. Bajaraxuayo jiwi itsa ponabiabiana, petaejawata ayaicuenia jamatabëcuenenabenajacabiabiana bajarapatomara pewerebiabijawatsi yabara. 9 Tocopatsianajë bajarapatomarapijiwi, pijapexaejawa petowerewerecaexaetsi, pexënatonëxi, pexënatowaxi-ata penacoxixaenexa, bajarapacuenia namata-enetsia itsamonae penaxaewanapaenexa janibomatacabi pijawajabitsaëwi pejamatabëcuene, bajayajebi matatoyorotsia peyacajinawanapaexaetsi», pacajai Jehová panijaDioso, —jamë tsane bajarajotareca.
10 Orijibia Jehová nejumaitsi:
—Bajarapacuenia nejumaitsicujinae, necomuatsicanalito tsitatoxotajarabianame pecayajawaponaewi pitabarata. Bajarapacuenia nexanaecujinae, 11 jumaitsimë tsane: Mapacuenia pacajumaitsije Jehová, ponë daxitawecua piacuenesaënë tsaponaponae: «Ayaicuenia werebiabianajë mapatomaraje. Pacuenia petoxotoxocaecanalito acuenebi caewëarena pemuxupaxi wajacatsanaenexa daxita canalitocuenia penacopatsinexa icatsia, bajarapacuenia exanaenajë Jerusalén tomarajawabelia, bajarapatomarapijiwijawabelia-ata. Ayaibitsaëto bajarapatomarapijiwimi pijawajabitsaëwi pebeyejebixaetsi, to-ajibi tsanetsi itsajota mëthëcaejitsiatsi petëpaewi. Belia, Tofet-jawata namëthëcaponaena peyacaëjëpaenexatsi daxita, tsipaji baja ajibi tsane pematatsënëa itsajota namëthëcaejitsia. 12 Bajarapacuenia exanaenajë bajarapatomarajawabelia, bajarapatomarapijiwijawabelia-ata, pijatomarami penacopatsinexa bejiwi pemëthëcaetaxunae jiwi petaenexa. Baitsi, pacuenia jiwi itajunawabiaba Tofet-wënë fotojawa peponaeyaniwa petëpaewi pemëthëcaetaxunaexae, bepenaxuirabiwicuenia petaeyaniwatsi, bajarapacuenia jiwi itajunawiana bajarapaJerusalén tomara. Xanë Jehovánë xaniajanë bajarapacuenia ta-exanaejawanexa, pexi petajuitabiabixae Baal-jawabelia. 13 Pacuenia jiwi itajunawabiaba Tofet-jawa peponaeyaniwa, bajarapijinia pacuenia itajunawiana pejoneyaniwa daxita Jerusalén-pijiwi pijabonëmijawa, bajarapacuenia pepopeyanacua-ewetsijiwi pijapexaniabonëmijawa. Pabonëmi-ata pematatunamatajëpaebomita bajarapamonae tajuitabiaba inciensonanipërë tulupujawabelia picani, itsawetsica pexaniajamatabëcuene rajutsiaya epanabiabanua vinoranë itsadiosowijawabelia xanëwecua, bajarapabonëmi-ata itajunawiana. Daxita saya bepenaxuirabia-exanaejawanënexa taena pacuenia Tofet-wënë foto», jai raja Jehová paxamë yabara —jai Jeremías Judá nacuapijiwijawabelia.
14 Daxita bajarapacuenia pexanaecujinae pebarëponaewi pitabëta, nexata Jeremías nawiatsina Tofet-wetsina, pepatsinexatsina templobojawabetsia, itsajota Jehová itorobatsi pepaebinexa daxitajiwijawabelia petoxotsicanalito peliwaisi, pamonae patapona templobopanabota.
15 Jumaitsi:
—Marapacuenia Jehová jumaitsije, ponë daxitawecua piacuenesaënë tsaponaponae, Israel-pijinë pemomoxi pijaDioso, mapatomara yabaraje: «Tsi-itorobianajë daxita baja tatocaëjëtsicuenia tananeconitsia-exanaejawanënexa bajarapatomarajawabelia, bajarapatomarapijiwijawabelianua, tsipaji bajarapamonae bitso ajamatabëcuenetaja pejumecowënëtsiyaniwa tatonajumecopatsiliwaisi», jai raja Jehová paxamë yabara —jai Jeremías templobota penubenaewijawabelia.