53
Orijibia, icatsia Isaías jumaitsi Jehová pijajiwitonëcuenia pitorobinë yabara:—¿Jipatsa panejumecowënëtsianaa patatsipaebiliwaisi Dioso Pijajiwitonë yabara? ¿Detsa pamonae natoyapëtaena Dioso pecapanepaejawatsi pijajiwitonë pecuenesaëta? Caejiwiyobeje saya tsane, tsipaji ayaibitsaëto jume-aebiana. 2 Jehová siwajamatabëcuenebarëya tsane bajaraponë. Pacuenia jiwitonë siwajamatabëcuenebarëya tsipae pexanianaejawayo pejuwixae pibisiapetsewinacuata, bajarapacuenia Jehová siwajamatabëcuenebarëya tsane bajaraponë. Itsiata, bajaraponë aponacatsitapexanianë tsane. Apoxainae tsane wajacuene-itajitsipaenexa. Aponacatsitaxainae-ata tsane xua yabara itaxutuabarëyajitsiatsi waja-asiwanexa. 3 Caranata, daxitajiwi bajaraponë naitaxutojematabiabianatsi.b Bajarapacuenia apojitsipae tsane peyajawajawatsi,c pibisiacuene pexanaenëcuenia petaexae. Jiwi bajarapacuenia petaexaetsi, bajaraponë bejamatabëcuenejiobi tsabiabid tsane. Bajaraponë natoyapëtaena penajamatabëxainaecuene pebejiobia-exanabiabijawatsi. Bajaraponë taeyabiabianatsi bewelianëcuenia, nexata jiwi wecuanapënëyorotabiabiana. Pecuene-ataejitsibixae, apotae tsane asiwaya. 4 Bajaraponë jiwi bewelianëcuenia tae-atatsi tsane, itsiata bajaraponë, caenë, tsijumajopaenatsie daxitajiwi pebejiobia-exanaejawaminexatsi, peyanajamatabëxainaecueneminexa-ata pijaneconi. Jiwi itsiata bajarapacuenia petaejawata jamatabëcuene-itsi tsane bajaraponë yabara: «Jehovájawabelia tsaena bajaraponë ayaicuenia naneconita, bajaraxuata nabejiobitsiaya tocopatatsi penaneconitsia-exanaenexatsi. Bajaraxuatanua, tocopatatsi petëpaenexa pijaneconi yabara», siwajamatabëjai tsane bajaraponë yabara. 5 Bajarapacuenia nawëxaniabiaya jiwi siwajamatabë-itsi-ata tsane, itsiata bajaraponë pepacuene bitso nawixaetaeya-exanaenatsif jiwi pijapibisiajamatabëcuene yabara. Pinijicuenia bejiobia-exanaenatsinua jiwi pijaneconijamatabëcuene pibisiacuene pexanawanapaexae. Bajaraponë daxita bajarapacuene tocopiapatsianatsi, jiwi juya pexaniacuenia pejinawanapaenexag aneconijibia Jehová pitabarata. Baitsi, daxita jiwi penaneconitsijawaminexa tsijumajopaenatsi bajaraponë, bajarapacuenia jiwi pejamatabëcuenexanepanaenexa Diosojawabelia.
6 »Daxitajiwi naxuabiaya bajinawanapa Jehováwecua. Pacuenia ovejamonaeh bawecuapona pewetsinëtsi naxuabiaya pejinawanapaenexa, bajarapacuenia jiwi itsi tsabiabi Jehováwecua. Pacuenianua oveja caenë canacujitsia natsata po̱na pejaitsinexai itsabelia jitsipa, bajarapacuenia jiwi ponabiaba Diosowecua penatojitsipaecuene pexanaenexa. Itsiata baitsi jane, Jehová bajarapaepatota daxitajiwi pijaneconimi bajaraponëjawabelia tsijumaxuabiana, mapanacuapijiwi pewecua-ajibia-exanaenexa pijapibisiajamatabëcuene. 7 Bajaraponë bejiobia-exanae-atatsi tsane, itsiata bajaraponë beweliajamatabëcuenenëcuenia moya nucaenaj pebejiobia-exanaewitsi pitabarata; caejumeyo-ata apojumepitsi tsane bajarapamonaejawabelia. Pacuenia oveja moya banuca pena̱xunaewitsi pitabarata aëjainejewa, pacuenia-ata moya najetaruca pecaponaejawatatsi itsa pataxunaejawata beyaxuabijitsiatsi, bajarapacuenia itsi tsane bajaraponë. Moya nucaena cuaicuaijainejewa pamonae pebeyaxuabiwitsinexa pitabarata. 8 Bajaraponë anaeya pewaetabicujinaetsi pebejiobia-exanaenexatsi, bajaraxuacujinae jane baja, beyaxuabianatsi itsaneconi natsixainaenejewa, pibisiacuenia petocanaëjëtsicujinaetsi petuxanewi pijaneconi.k Nexata, pebeyaxuabixaetsi, bajaraponë ajibi baja tsane pemomoxinexa. Paepatota pijaneconi tocanaëjëbatsi, bajarapaepatota itsajiwi-ata apoyapijiwicuaicuaijai tsane. Bajaraponë beyaxuabianatsi daxitajiwi pijaneconijamatabëcuene peyabaratëpaenexa. 9 Bajaraponë picani mëthëtsijitsiatsi penaneconitsiwi pemëthëtabiabitaxunaeta, itsiata petëpaejawata mëthëtsianatsi bitso pexainaewi penatsixaniawaetsimëthëta,l tsipaji pibisiacuene apopeto-exanaenëm tsane itsajiwijawabelia-ata. Bajarapacuenia apocuaicuaijai tsane pibisialiwaisianë. 10 Itsiata, pijaneconi apoxainae-ata, Jehová tocaëjëtatsi daxitajiwi pijaneconi yabara pesiwatëpaenexa penawixaetaecuenia. Daxitajiwi pijaneconi pesiwatëpaecujinae pemomoxi xainaenejewa-ata, itsiata bajaraponë taena ayaibitsaëto pijajiwi.n Bajarapacuenia asaë tsaponaponae tsane. Jehová tajëwelia penatocaëjëtsijawamio xaniawaetsia topitsapaenatsi bajaraponë pejamatabëcuene. 11 Nexata, Jehová petaecujinae daxita penawixaetaeya-exanaejawatsi, bajaraPonë jamatabëcuenecaewiana daxitajiwi pijaneconi penaneconitsia-exanaejawaminexa. Bajarapa-aneconijibinë pejamatabëcuene ayaibitsaëto jiwi aneconijibia jinawanapaena,p tsipaji bajaraponëjawabelia tsijumaxuabianatsi bajarapamonae pijaneconimiq pexainaejawami Jehovájawabelia. 12 Bajaraponë penacaewetsixae tsane jiwi pesiwatëpaenexa, jiwi taenatsi peyajawanajëpaenëcuenia pibisiacuene pexanaewi.r Bajaraxuata, Jehová tocopatsianatsi peyajawa-ecaenexa ayaijamatabëcuenewituatuajëta, peyaiyataenexatsi pinijisaë pexainaenëcuene pecuene-amoneyabinëxae, tsipaji bajaraponë aponatoyabaratëpae tsane pijaneconi. Biji rajane, bajaraponë natsijumaxuabiana daxitajiwi pijaneconimi peyapijiwitëpaenexa pibisiacuene pexanaewi, peyapijiwicuaicuaijainexanuas baja Diosojawabelia —jai Isaías Israel-pijinë pemomoxijawabelia Jehová pijajiwitonë yabara.
C54—C66 […]