Pamonae pexaniacuene pexanawanapaewi, pibisiacuene pexanawanapaewibeje nawecua-acuenetothiabeje
12
Pajiwi nato-asiwa pecuenexanetsijawatsi, najamatabëcuene-itajëta piasiwajawa peyapëtaejamatabëcuene. Pajiwi pijinia apojitsipae pecuenexanetsijawatsi, bajarapajiwi piajamatabëcuenecowëbijiwi.2 Pajiwi pexaniacuene exanabiaba Jehová siwajamatabëcuenebarëya tsabiabitsi. Itsiata, pajiwi pibisiacuene pexanaejawa najamatabëxainabiaba, Jehová tocaëjëtatsi penaneconitsia-exanaejawanexa.
3 Pibisiacuene pexanaejawata, jiwi aponaexanae peyaiyataejamatabëcuenetsi bajayajebinexa. Itsiata baitsi jane, pexaniajamatabëcuene pexainaewi, apowecua-ajibia-exanaecapanepaetsi bajarapajamatabëcuene. Pacuenia naejawa petabunepe bëpënëa-irabereca pexainaexae, apotixitsitsi, bajaratsijamatabëcuene-itsitsi bajarapamonae piayapëbejeliwaisi tocopiapatsi-atatsi.
4 Powa xaniawaetsia ponapona pamonajawabelia, siwajamatabëcuenebarëyatsi. Powa pijinia bijiata penacuene-ewetsiwa pamonajawabelia, aposiwajamatabëcuenebarëyatsi. Yapijiwi-auratsi tsabiabi saya. Bajarapitsipetiriwa pamona bitso jamatabëcuenecueranaeya-exanabiaba.
5 Pajiwi pexaniacuene exanabiaba, bajarapajiwi siwanajamatabëxainabiaba ëpexaniacuene. Pajiwi pijinia pibisiacuene exanabiaba, bajarapajiwi najamatabëxainabiaba peyamaxë-itojorobabiabinexa itsamonae. 6-14 […]
15 Pajiwi liwaisi aponatsiwajënaecanaëjëtsi daxita pexanaecuene tsitapexaniacuenetsi, pibisiacuene exanae-ata. Pajiwi liwaisi natsiwajënaecanaëjëta, namuxuna-ewetabiaba itsajiwi pemuxujiobijawatsi.
16 Pajiwi aponatsiwajënaecanaëjëtsi, caecuenia najamatabëcuene-itajëtabiaba pianaepanaejawa najamatabëcuenecataitsinejewa. Juya pajiwi natsiwajënaecanaëjëtabiaba, bajarapajiwi namuxujematabiaba xua itsamonae pibisiacuenia jumaitsitsi.
17 Pajiwi xaniajai tsabiabi, pecuenetaecuenia cuenewajunupaebabiaba itsanë pijaneconi pexainaejawa yabara. Juya pajiwi najumetsënëtabiaba, bepexaniajaicuenia cuenewajunupaebabiaba najumetsënëtsi-ata itsanë pijaneconi pexainaejawa yabara.
18 Pajiwi itaxutejema, canaëjëtsinejewa, cuaicuaijai tsabiabi, cuenecaëjëpatsi peliwaisita wajanacajamatabëcuenebijianaejawa. Bajarapaliwaisi becusiupata wajanacajamatabëcuenecacuatsijawa. Juya pajiwi liwaisi natsiwajënaecanaëjëtabiaba, pecuaicuaijailiwaisita bewajanacajamatabëcuenewaëbi, wajanacajamatabëcuenexanepanaeya-exanaenexa.
19 Pajiwia pexaniajaicuenia cuaicuaijai tsabiabi, bajarapajiwi asaë tsaponaponae tsane bajayajebi. Pajiwi pijinia penajumetsënëtsicuenia cuaicuaijai tsabiabi, bajarapajiwi caematacabibeje asaë tsaponaponae tsane.
20 Pajiwi siwanajamatabëxaina pibisiacuene pexanaenexa, bajarapajiwi jamatabëcuenewënëca peyamaxë-itojorobijamatabëcuene. Juya pajiwi siwanajamatabëcuenewereta pexaniacuenia peponaponaenexa, bajarapajiwi jamatabëcuenewënëca pebarëyajamatabëcuene.
21 Ponë pexaniacuene exanaponapona, bajaraponë apotocopiapatabiabitsi tsane itsapibisiacuenejawa-ata. Juya ponë pibisiacuene exanaponapona, pibisialiwaisianë bitso tocopatabiabianatsi.
22 Jehová raja itoya pamonae penajumetsënëtsiwi. Itsiata juya, siwajamatabëcuenebarëya tsabiabi pamonae pexaniajaiwi.b
23 Ponë peyapëtaenë, pijacuata aponawënëliwaisipaebi, yapëtae-ata daxitacuene. Juya apopenatsiwajënaecanaëjëtsinë, pijacuata naliwaisipaebabiaba, bepeyapëtaenëcuenia, natsiquejemacuene exanae-ata.
24 Ponë peyabarajitsipaenë penacuenebijawa, naexanaena penamatacaitorobinë. Juya ponë piafaetabinë, amoneya tonacuenebabiabiana.
25 Pajiwi bitso siwajamatabëbëjai itsacuenejawa yabara, belia siwajamatabëcuenecuerana. Juya itsa pexanialiwaisita muxujiobatsi, jamatabëcuenebarëyaya-exanatsi.
26 Ponë pexaniacuene exanaponapona, xaniawaetsia matacapona pijamonaejiwiyo pexanianamutojawalia. Juya ponë pibisiacuene exanaponapona, pijamonaejiwiyo matacapona penaxuabinamutojawalia.