Penacowaetsia-exanaecuene pemuxujobiliwaisi
6
1-2 Xamë, pewëjëatomë, itsa naliwaisicajonejitsipame netomatamotsijawa itsanë neyapëtaenë piamoneyabijawa, itsa jume, aponeyapëtaenëjawabelia-ata, xua apocuenecaëjëpaetsi penatomatamotsinexa, xamë-ata pijinia itsa apocacuenecaëjëpae tsipae nejumaitsicuenia, belia nexainaeyajuwënëjawanë cawecuapitsipa.3 Xaniawaetsia nenamuxuna-ewere xua catsipaebijitsiatsi. Pewëjëatomë, mapacuenia exanaename newecuapanepaenexa bajarapaliwaisi. Pëtsa na-urabame. Beweliajamatabëcuenenëcuenia naitajëre ponëjawabelia nacajunuame netomatamotsinexa. Bajaraponëjawabelia jumaitsimëre pecawënë-iquinaenexa pabaxutota cawënëyaquinaruta picani ne-exanaejawaminexa. 4 Pëtsa cuenenajematame cae-epatoyo-ata nexanebinexa bajarapaliwaisi. Caecuenia saya exanaename. Pëtsa ewetame itsamatacabijawabelia nexanaenexa. 5 Pacuenia owebi bepijiayo wecuanamatayabijitsipa penarujuaitsinë, pacuenia-ata baratsuito wecuapanepaejitsipa pewaetabinënexatsi, bajarapijinia pacuenia bepijiayo wecuapitsapaename bajarapanajumecajoneliwaisiwecua.
Piafaetabiwi pemuxujiobiliwaisi
6 ¡Xamë, niafaetabinë, cuenetaema penacuenebijawa pëbëthai! ¡Cuenecanaëjëre, necuenejëpaenexa bajarapamonae pacuenia exanabiaba! 7 Pëbëthai apoxainae penamatacaitorobiwitsi penacuenebinexa, itsiata nacuenebabiaba. 8 Nexata, caewai canacujitsia natoxaniawaetabiaba pexaejawanexa.
9-10 Xamë, niafaetabinë, buta rurucabiabame. Saya jema ponaponabiabame. Aponacuenebabiabimë nexaejawanexa. 11 Jemata itsamatacabi catocopiapatsiana bitso nebejiobijawanexa. Pacuenia penacobetoxotsinë yacajërëtsipa daxita pecobecowë, pewecuacaponaenexa, bajarapijinia pacuenia niafaetabicuene cawecua-ajibia-exanaejitsipa daxita nexainaejawaminexa. Nexata, bitso bejiobicueneta ponaponaename.
Pitsicuene xaina piajajamatabëcuenewi
12 Mapitsicuenejawanë exanawanapa pamonae itsacuenejawayonexa apopexanepanaewi, piajamatabëcuenebejewinua. Najumetsënëtsiaya jinawanapabiaba. 13 Bepexaniajailiwaisi itajara pecuaicuaijawata, nacuene-exanabiabaa pijacujirucuenia pitaxutota, petaxuta, pecobesitota-ata, peyapëtaeya-exanaenexa peyanabinëtsijawabelia apopexaniajaicuene. 14 Bajarapitsiwi najamatabëcueneweretabiaba pibisiacuene pexanabiabinexa. Jaitabiaba pacuenia anaeya-exanaejitsia itsamonaejawabelia.
15 Bajarapacuenia pexanabiabiwi, jemata piabejecuene tocopiapatsianatsi, pejamatabëcuene-amoneyabinexatsi. Apoxainae tsane pepanepaejawanexa bajarapapiabejecuenewecua.
Papibisiacuenejawanë jiwi exana Jehová cuene-itoya itsapexanaejawanëwecua
16 Mapaseis xuabeje jiwi pexanaecuenejawanë Jehová bitso pecuene-itoyajawanë. Daxitata siete xuabeje Jehová pepopiataejitsibijawanë, itsacuenejawanëwecua jiwi pexanaecuene. Maxuanëje:b
17 Ayaijamatabëcuene jiwi penataejawa itsamonaewecua, jiwi penajumetsënëtsicuene, jiwi pianeconijibijiwi pebeyaxuabicuene, 18 jiwi pesiwanajamatabëweretsicuene pibisiacuene pexanaejawanexa, jiwi pejaitaponaecuene jamatabëcuene-aitatsacaeya pibisiacuene pexanaenexa, 19 pajiwi cuenetaenejewa najumetsënëtsiaya itsajiwiyo peneconitsicuene, itsamonae juya petaenexatsi penaneconitsijiwicuenia, pajiwi-ata liwaisi tsi-exanabiaba pebaracuaicuaijaijawata, namata-enetsia pena-itoyanexa nacaemonae-ata.
Pemuxujiobiliwaisi pijawa pexainaenë, itsawa pewecuajaitsiyaniwa
20 Xamë, pewëjëatomë, xua axa, enabeje, ca-itorobabiaba, jumecowënëtabiabianame. ¡Pëtsa nacofënëtamenua pecamuxujiobiliwaisianë! 21 Pecamuxujiobiliwaisianë, nacofënëtsinejewamë jamatabënaponaponabiabianame. ¡Bajarapaliwaisi asiwaya taema, pacuenia penamatamotsimaëto nawësicëtsipame! 22 Nexata, matacabijebi, merawijebi-ata, cajamatabëcuenematacaponaena itsajiwi-ata pecayamaxë-itojorobiyaniwa, pibisiacuene peca-exanaeya-exanaeyaniwa.
23 Peca-itorobiliwaisianë bepecotia, pecayapëtaeya-exanaenexa xua catsi-ayai peca-itsacueniabinexa. Pecamuxujiobiliwaisianë-ata cajamatabëcuene-itayotsiana xaniawaetsia neyapëtaenexa, neponaponaecuene.
24 Bajarapaliwaisianëta nenacuene-ewetaponaponaejawata, apo-imoxoyotsimë tsane pibisiacuene pexanabiabiwa, powa picani cabarëcuaicuaijaijitsia pexaniajumenëta, pibisiacuene newitota nexanaenexa bajarapowajawabelia.
25 ¡Pëtsa nejamatabë-ëthëtojawawetsina itaxutuajiname pexaniawacuene yabara! ¡Pëtsa nacopatame pecayamaxë-itojorobinexa pecabarënajume-itacanitsijawata!
26 Powa, penaperabëcanajetsiwa, jaita saya cae-epatoyonexa, penamatamopitsijawata penatopitsinexa penamatawenonaecuene. Itsiata, itsanë pijawa itsa jaitame, pibisiacuene newitota nexanaenexa bajarapowajawabelia, pamona cabeyaxuabijitsipa. Nexata, bajaraxuabeje najëpaeya catsi-ayai.
27 Pacuenia pena-itajurutsi-isopanë itsa isapitsipame, camipabëtajuejitsipa. 28 Pacuenia-ata iso-ita-irejumawereca itsa nonotsipame, cataxutajuejitsipa. 29 Bajarapacuenia ponë itsanë pijawajawabelia pewitota pibisiacuene exanaejitsipa, tocopiapatsipatsi piabejecuenejawa. Bajaraponë penaneconitsixae, ayaicuenia naneconitsia-exanaejitsipatsi.
30 Pajiwi bitso piajanixae, itsajiwi pebuatsijawa tonajanitoxota, bajarapajiwi itsamonae beweliacuenia apotaetsi. 31 Itsiata, pexainaejiwi itsa yabaracaxitajarabatsi penacobetoxotsijawata, bematamota siete xuabeje pematatsënëa penacobetoxotsijawawecua. Penacobetoxotsijamatabëcuene itsa apoxainae xuata matamotsijitsia, berajuta daxita xua xainac pecobecowëjawanë.
32 Ponë pewitota pibisiacuene exana itsanë pijawajawabelia, bajaraponë saya liwaisi apopecanaëjëtsinë. Pijacuata naneconita. 33 Bajarapacuenia pexanaexae, bajarapowa pamona pitoyaxaetsi, benatsi. Nexata, bitso aura tsabiabi tsane. 34 Itsiata, acuenebi tsane penawecua-ajibia-exanaenexa piaurajawa, tsipaji bajarapowa pamona, pe-ëbijamatabëcuene, bitso ayaicuenia anaepanaena. Nexata, pamatacabi tsimaxëpatsiana peyamatamotsinexa pijawa pijaneconijamatabëcuene, apo-itaxutotsoniataetsi tsane.
35 Aposiwajamatabëcuenecaewinua tsane nayajiwimatamotsi-atatsi. Bitso penamatamotsijawanë nayajiwimatamotsiyapaebi-ata, tsiteca apo-anaecaewi tsane.
C7—C9 […]