Nayajiwitaema, nimoxoyobiyaniwa pewitota pibisiacuene pexanaewi
5
Xamë pewëjëatomë, nenamuxuna-ewere tacatsiwajënaecanaëjëtsiliwaisita tacamuxujiobinexa. Nenamuxuna-ewere muxujitsipaeya tacamuxujiobiliwaisi. 2 Bajarapacuenia nexanaejawata, xainaename necanaëjëtsijamatabëcuene. Necuaicuaijaicuenejawatanua, canaëjëtsiaya cuaicuaijamë tsane.3 Pamona pexainaewaa itsa cajunata pexanialiwaisita, nayajiwitaema nejumecowënëtsiyaniwa. Bajarapowa pecajumaitsijumenë camuxujitsipaeya-exanaena, pacuenia banara nacajitsipaeya-exana wajaxaenexa. Pacuenia-ata aceitera nacaperabëyacueyacueya-exana, bajarapacuenia bajarapowa pecajumaitsijumenë cajamatabëcuenetotowia-exanaena, nejumejejainexa pecajunatsijawata. 4 Bajarapowa peliwaisi, itsa jumecowënëtsipame, catonaexanaejitsipa bepiatsaxamera nejamatabëcuenejawata, tsipaji bitso canajamatabëxainaeya-exanaejitsipa. Pacuenia itsa cacuatsipa pexuijai-espadata,b anijabarëneniabeje pexainaejawa, bajarapacuenia-ata bitso catsi-ayai tsipae bajarapowa nejumecowënëtsixae pecajunatsijawata. 5 Bajarapowa raja camatacaponaejitsipa netëpaenamutuabelia. Bajarapitsiwa raja pejamatabëcueneta, jiwi tëpaeya-exanabiaba. 6 Bajarapowa aponasiwabëjai tsabiabi peponaponaecuene yabara. Caranata, saya siwabëjai tsabiabi pibisiacuene pexanabiabinexa. Nexata, aponatoyapëtae penajetarucaejawa pibisianamutojawalia.
7 Nexata, xamë, pewëjëatomë, nenamuxuna-ewere xaniawaetsia. Nejumecowënëre. Pëtsa nenamuxunajematame paliwaisianë camuxujiobatsi. 8 Tajë wecuanatsare powa naperabërajutabiaba pibisiacuene pewitota pexanaenexa ponëjawabelia jamatabë-exana. Pëtsa bajarapitsipetiriwa pijabobaupa imoxoyojawa najetarucame.
9 Bajarapowa pijabota itsa patsipame nimoxoyobinexa, jiwi pecayaiyataecuenemi cawecua-ajibi tsipae. Orijibia, daxitaxuanë xainame, bayajajebi nenacuenebijamatabëcuene, naxuabijitsipame. Bajaraxuanë canacopatsipa pibisiajamatabëcuenewi. 10 Daxita xuanë ayaicuenia nacuerotame nepitsinexa nenacuenebijawata, bajaraxuanë itsamonae aponeyapëtaewi cabarëya tsipae. Nexata, daxita necobecowëjawanëmi, cawecuanaxainaeyajitsipa pijabota.
11 Bajarapitsicuene itsa exanaejitsipame, itsamatacabijawabelia belia natsiyapitsipame pawixae caperabëbijianaejitsipa. Nexata yabëjaimë tsipae nepuacuenepanepae. 12 Yajamatabëcuenebëjaiya jumaitsimë tsipae: «¡Jaa! ¿Detsa xuajitsia tajacanawecua-itoya taxa tanecuene-itawetsijawami? ¿Detsa xuajitsia tajaca-amuxujitsibi xua necujaruba tanemuxujiobijiwi? 13 Xanë aponacopatsinë itsajiwi tanemuxujiobijawa, pacuenia xaniawaetsia ponaponaejitsianë. Aponacopatsinë xuanë netsipaeba tanecuenexanetsinexa tanecujarubiwi. 14 Bajarapacuenia ta-exanaexae, ajenaconoxae baja bitso nabejiobitsicuenia ponaponajë. Bitso baja nebaracuaicuaijai tsabiabi daxita jiwi», jamë tsipae.
Penacojiobiwi pemuxujiobiliwaisi
15 Pacuenia mera nejitsipaejawata nijacanalitopijimera apaeyabiabame jaitsinejewamë itsamonae pijacanalitopijimera, bajarapacuenia apobejaitsimë itsapetiriwa nijawawecua, nejitsipaejawata nimoxoyobinexa. Pacuenia jamatabëcuenebarëyamë mera niapaecujinae nejitsipaenëmi, bajarapacuenia jamatabëcuenebarëyamë tsane nijawa nimoxoyobicujinae. 16 Pacuenia nepuanaemera apo-epabajarabimë tsipae namutonëjawa, bajarapacuenia apobenacoxicayajatsimë itsapetiriawijawabelia nexi nebarëxainaponaexae. Bajarapacuenia itsa exanaejitsipame, nexata itsamonae saicaya pijabota cacoxiwitsatsipa. 17 Bajaraxuata, panacuenexaniawaerebeje panena-asiwacuenebeje, ëpaxamëbejenexa pena-imoxoyobinexabeje. Pëtsa panawecuajaitamebeje itsajiwijawabelia.
18 Xanepana cajena bitso nijawajawabelia nexi nexainaejawa. Nexata, siwajamatabëcuenebarëyamëre powa pitame pewëjëatojawatamë. 19 Bajarapowa xamënexa caewa bitso pexaniawa, peca-asiwawanua. Bajaraxuata, tonacopare bajarapowa pecabarëyataejawa, pecawëtaicaejawa-ata. Tonacoparenua pecajamatabëcuenecajopaeya-exanaenexanua peca-asiwajawa.c Nexata cajamatabëcuenecaranatsiana ëbajarapowa nejitsipaenexa. 20 Xamë pewëjëatomë, ¿detsa xuajitsia nacopatsipame itsanë pijawa netobarënajitsipaenexa? ¿Detsa xuajitsia wëtaicame itsa petiriwa powa aponijawa? Apoxanepanae cajena bajarapacuene nexanaejawa.
21 Jehová raja naitaxutoca-ewetabiaba xua exana caejiwiyo canacujitsia. Naitaxutoca-ewetabiabanua itsaxuayo ponapona.
22 Pajiwi pibisiacuene exana, bajarapa-exanaecuenejawata jamatabëcuene-amoneyabianatsi. Pacuenia dajubi, pemaëtota pecëtanutsinëtsi, apocopatsitsi peponaponaenexa, bajarajamatabëcuene-itsi pajiwi apocopatsi pibisiacuene pexanaejawa. 23 Nexata, bajarapamonae apopenacuene-ewetsixae pibisiacuene pexanaejawa, tëpaena. Pejinawanapaexae najamatabëcuenecataitsinejewa pibisiacuene pexanaejawa, naxuabiana. Bajarapacuenia, xamë-ata pewëjëatomë, catocopiapatsiana, itsa aponejumecowënëtsimë tacamuxujiobiliwaisi.