¡Siwanajamatabëcuenecopare Jehovájawabelia daxita nejamatabë-ëthëtojawawetsina!
3
Xamë, pewëjëatomë, pëtsa nacofënëtame tacayapëtaeya-exanaejawanë. Xuanë ca-itorobatsi nexanaenexa, natoxaniawaere nejamatabë-ëthëtota, newajënaeyabelia nejumecowënëtaponaponaenexa. 2 Nexata bajarapacuenia itsa exanaponaponaename, bajayajebi asaëmë tsaponaponae tsane mapanacuataje. Bitso jamatabëcuenebarëyamënua tsaponaponae tsane.3 Pëtsa copatame itsamonae niasiwatsabiabijawa. Pëtsa copatamenua nexaniajaitsabiabijawa. Bajaraxuabeje natoxaniawaere nejamatabë-ëthëtota, pecajamatabëcuenematacaponaponaenexa pexaniacuenejawalia. 4 Orijibia, bajaraxuabeje pejamatabëcuene Dioso casiwabarëya tsane, jiwi-ata cayaiyataena.
5 Pëtsa jumecowënëtame pacuenia nejamatabëcuene ca-itoroba nexanaenexa. Biji rajane, daxita nejamatabëcuenesaëta siwanajamatabëcuenecopare Jehovájawabelia, pecayapëtaeya-exanaenexa xua exanaejitsiamë. 6 Nexata, itsa najamatabëcuenecaewetsianame bajaraPonëjawabelia pecatojitsipaecuenia nexanaenexa, catsitajëtsiana pacuenia ponaponaejitsiamë newajënaeyabelia. Jamatabënaponaponabiabianame, nexanabiabinexa pacuenia Jehová ca-itoroba.
7 Pëtsa bitso beneyapëtaenë nataneme Jehováwecua. Biji rajane, yaiyataema Jehová, necopatsinexa pibisiacuene nexanabiabijawa. 8 Bajarapacuenia itsa exanaponaponaename, perabëjumalixanepanaeya ponaponaename.
9 Dioso yaiyataeya ofrendacuenia rajutabiabianame nexainaeyajuwënëjawanë. Xuanë-ata ubabiabianame, xuanë copiata catonaweretabiabiana, bajaraxuanëyajuwënëjawanë-ata Dioso yaiyataeya rajutabiabianame.
10 Bajarapacuenia itsa exanabiabianame, Dioso cayawenonabiabiana. Ne-ubijawanë catonaxaniababiabiana. Nexata, nexaejawa ayaijawa xainabiabianame.
11 ¡Pewëjëato, pëtsa anaepaname Dioso itsa cananeconitsia-exana pibisiacuene nexanaeneconi pejamatabëcuene! ¡Pëtsa anaepanamenua Dioso itsa ca-itaweta pibisiacuene nexanaejawa, 12 tsipaji pajiwi Dioso asiwa, pibisiacuene itsa exana, bajarapajiwi Dioso naneconitsia-exanabiaba! Pacuenia pexi pexainaejiwi, pexi piasiwaxae, itawetabiaba pibisiacuene itsa exana, bajarapijinia pacuenia Dioso pijajiwi piasiwaxae, itawetabiaba pijajiwi pibisiacuene itsa exana. 13-20 [...]
21 Xamë, pewëjëatomë, pëtsa wecuanajamatabëcuenetsatame daxita xua pexaniacanaëjëtsijamatabëcuene. Pëtsa bijiaya nacuene-ewetame pexaniacuene nexanaecuene yabara. 22 Bajarapaliwaisibeje cajamatabëcueneyawenonaena, xaniawaetsia neponaponaenexa. Nexata pecacuenetaejawata nexanaecuene, daxita jiwi casiwajamatabëcuenebarëya tsane, pacuenia petaejawata itaxutuabarëya tsipae pexanianenacuaibosicëtsimaëto pexaniajawa. 23 Bajarapacuenia ne-exanaponaponaexae, jamatejema ponaponaename jiwi pitabarata, aliwaisijibia. Nexata, xamë apowecuajopaemë tsane,a pexaniacuene nexanaponaponaejawa.
24 Nemajitsijawata, apoxainaemë tsane xua yabara junawijitsiamë, nexanaecuene yabara. Biji rajane, jamatejema majitabiabianame, bëjamënejewa. 25 Aponajunawimënua tsane jemata bitso piayaicuene pecatocopiapatsijawa yabara, pabejiobicuene-ata, pacuenia tocopiapatatsi pamonae piajamatabëcuenebejewi.
26 Jehovájawabelia nitaxutuajamatejematsaponaponaexae, jamatejema ponaponaename. Nexata, bajaraPonë apocacuenecopatsi tsane pecajamatabëcuene-ëjëbijawata pecajopaeya-exanaeyaniwa.
C4—C5 […]