Proverbios
Petsiyapëtaeliwaisianë jiwi pemuxujiobinexa
Pajamatabëcuene yabara yaquina mapabaxuto bitso peyapëtaenë Salomón-pijinë toyaecaeya pemuxujiobiliwaisixi
1
Mapabaxutotaje rubena toyaecaeya pemuxujiobiliwaisianë, Salomón peyaquinaejawa, David-pijinëmi pexënato, Israel nacua peyanacua-ewetsinëmi. 2 Bajarapaliwaisixi nacacujarubiana wajatsiwajënaecanaëjëtsijamatabëcuenenexa, wajayapëtaenexanua pacuenia jinawanapaejitsiatsi. Nacajamatabëcuenecujarubiananua wajanacuenexanebaponaenexa, wajayapëtaenexa xaniawaetsia pabëpënëaliwaisianë bitso peyapëtaewi nacatsipaebabiabiana wajanacamuxujiobijawata. 3 Bajarapaliwaisianë pejamatabëcueneta, natoyapëtaenatsinua wajanacuenexanebabiabinexa, xaniawaetsia wajajinawanapaenexa. Natoyapëtanetsinua yapëtaeya waja-exanabiabinexa daxitacuene, xaniawaetsia wajacanaëjëtsicujinae. Natoyapëtanetsinua pexaniajaijamatabëcueneta waja-exanawanapaenexa daxitacuene. Bajarapaliwaisianë nacamuxujioba najëpaeya pexaniacuene waja-exanawanapaenexa daxitajiwijawabelia. 4 Bajarapaliwaisianë nacanaexanaeya-exana wajayapëtaewinexa, xaniawaetsia wajacanaëjëtsinexa, apowajayapëtaewi-ata picani. Bajarapacuenia pewëjëawi, pejanawi-ata, naexanaena bitso peyapëtaewi, abaxë apojamatabëcuenenaweretsi-ata. Nexata, nato-itapetabiabiana pexaniacuene pexanabiabinexa.5 Bajarapijinia pacuenia, pajiwi penatsiwajënaecanaëjëtsijiwi itsa natojumetaena bajarapaliwaisianë, nexata matatoxenetsia peyapëtaejiwi ne-exanaena. Pejumeyapëtaejiwi pijinia pitaponaena pexaniamuxujiobiliwaisianë, pecanaëjëtsijamatabëcuene-ata. 6 Nexata, bajaraxuanë pejamatabëcueneta, jumeyapëtaeyabiabiana bëpënëa pejumaitsijumenë, cuenecataeya itsacuenia pecanaëjëtsijumenë-ata, itsamonae peyapëtaewi pejumaitsijumenë-ata bëpënëacuenia, piayapëbejejumenë-ata.
7 Pajiwi jamatabënaexana peyapëtaewi, copiaya ayaicuenia beyaiyatane Jehová. Pamonae pijinia apopenatsiwajënaecanaëjëtsiwi peneta namuxujematabiaba pemuxujiobijawatsi. Apojitsipabiabinua pecujarubijawatsi xua abaxë apoyapëtae.
Pemuxujiobiliwaisianë pewëjëawinexa, pejanajiwinexa-ata
8 Xamë pewëjëatomë, tonacopare axa pecacuenexanebijawa. Namuxuna-ewerenua ena pecamuxujiobijawa. Pëtsa nacofënëtame axa, enabeje pecamuxujiobiliwaisi, 9 tsipaji bajarapaliwaisianë nejumecowënëtsijawata, daxita casiwajamatabëcuenebarëya tsane. Pacuenia jiwi itaxutuabarëya tsipae nenamataxatatsijawata coronajawa, nenacuaibosicëtsijawatanua pexaniamaëto, bajarapijinia pacuenia jiwi casiwajamatabëcuenebarëya tsane pecacuenetaejawata nejumecowënëtsijawa axa, enabeje pecamuxujiobiliwaisi.