SALMO 147
Jerusalén tomara Dioso pewetsixae, bajaraPonëjawabelia jiwi pebarëyajawa peliwaisi
1 Pexaniacuenia pawënëxaniatsianame Jehová, tsipaji bitso nacatoxanepana wajianëta bajarapacuenia wajanaxëanabiabinexa wajaDioso.
2 Jehová baja icatsia Jerusalén tomara matacotapona. Bajarapatomaraberena icatsia caetuataponaena Israel-pijinë pemomoxi, itsanacuanëjawa penacayajatsiajinawanapaewimi. 3 Nexata, pamonae bitso najamatabëxaina, Jehová jamatejemaya-exanabiaba bitso penajamatabëxainaejawamiwecua.
4 BajaraPonë namata-ëjëtacapanepa daxita perubenaetuluputonë, bitso ayaijawa exanae-ata. Caetuluputo canacujitsia wënëruba. 5 ¡WajaTuxanenë raja ayaijamatabëcuenenë! ¡Piasaënë bitso! ¡Daxitacuene peyapëtaenë! ¡Apotocopiarucaetsi peyapëtaecuene cajena! 6 Pamonae beweliajamatabëcuenewi natane, Jehová yawenonabiaba itsamonae peyaiyataenexatsi. Juya, pamonae pibisiacuene exanabiaba, bajarapamonae bajaraPonë ayaicuenia urabiana jiwi pitabarata.
7 ¡Jehovájawabelia barëyaya panaxëanare, panewënëxaniatsinexa papecayawenonaexae! ¡Arpa racatsiaya wajianë panaxëanare wajaDiosojawabelia! 8 BajaraPonë itaboxo itacaranatabiaba itarërëbonëta. Itorobabiaba ema ira piatsanaenexa. Petsutonëjawa juwia-exanabiaba po̱na. 9 Pexaejawa rajutabiaba unupijidujuai. Pepunaewi pexi-ata pexaejawa rajutabiaba, itsa fiababiaba piajanijamatabëcuene.
10 Dioso aposiwabarëya tsabiabi caballo piasisaëjawa, jiwi pesaë-ata, penamatamotsicuenia petaenexa bajaraPonë pitabarata. 11 Biji rajane, siwabarëya tsabiabi pamonae yaiyatanetsi, siwanajamatabëcuenecopatanua bajaraPonëjawabelia peyawenonaenexatsi, tsipaji yapëtane Dioso piasiwajawatsi. Bajaraxuabeje namatamota cajena Dioso pitabarata.
12 Pajerusalén-tomarapijiwimë, pexaniacuenia pawënëxaniatsianame Jehová ayaijamatabëcuenenë yabara. ¡Pexaniacuenia pawënëcacuaicuaijamëre panijaDioso, 13 tsipaji panijatomara matatoyorotsia peyacaranatsijawaxanetopijibaupanë bajaraPonë atajaya-exana, panijawajabitsaë papecatsimaxëjoneyaniwa! Bajarapatomaratuatuajëta xaniawaetsia paca-ewetabiaba. 14 Panijanacuata wajabitsaëcuene ajibia-exana. Nexata, pexaniapexaejawanë aliwaisijibia paxaeyabiabame. 15 Najume-itorobabiaba pejume mapanacuayabetsicaje. Pijajiwi bitsojinaeya to-exanabiabatsi xua itoroba. 16 Athëbëwetsica bitso pecainejebijawaxi, othopaeya-exanabiaba. Bajaraxuaxi bitso niojai. Bitso pecainejebidonotoxi-ata, cayajatabiaba daxitajawa perubenaenexa, be-ipumana. 17 Itsajawata athëbëwetsica othopaeya-exana pecainejebimatarejetoxi, merami piatajajawa penaexanaematarejetoxi. Bitso pecainejebixae, merami piatajajawanë naexana. 18 Nexata, icotia itsa ataju, jowibo-ata itsa bubujai, bitso pecainejebijawaximi, bitso pecainejebidonotoximi-ata, bitso pecainejebimatarejetoximi-ata, Dioso tsabanaeya-exana. Nexata, icatsia mera naexana.
19 Israel-pijinë pemomoxijawabelia Dioso tonajumecopata pejumeliwaisi. 20 Itsiata, bajarapacuenia apotonajumecopatsi itsanacuanëpijiwijawabelia. Nexata, bajarapamonae apoyapëtae Dioso pejumeliwaisi.
¡Dioso raja ayaijamatabëcuene pexainaenë!
C148—C150 […]