SALMO 146
Dioso itsa yawenona jiwi, bajaraPonëjawabelia jiwi pejamatabëcuenebarëyajawa peliwaisi
1 Itsamonaejawabelia payapëtaeya-exanaename Dioso ayaijamatabëcuene pexainaejawa. Daxita tasaëtsaponaponae-epatojebi mapanacuataje, tajamatabëcuenewetsina pexaniacuenia wënëxaniatabiabianajë Jehová taneyawenonabiabijawa yabara. 2 Daxita tasaëtsaponaponae-epatojebi mapanacuataje, pexaniacuenia wënëxaniatsianajë Jehová bitso ayaijamatabëcuenenë yabara. Wajianë-ata tonaxëanabiabianajë Jehová tajaDioso.
3 ¡Pëtsa pasiwanajamatabëcuenecopatame petuxanewijawabelia papecayawenonaenexa! ¡Pëtsa pasiwanajamatabëcuenecopatame itsajiwijawabelia-ata papecayawenonaenexa, tsipaji jiwi apocaëjëpaetsi papecacapanepaenexa, 4 tsipajinua saya jiwi bepijia tëpa! Atsabeno icatsia naexana. Itsa baja tëpa, tocopiarucatsi baja pacuenia picani exanaejitsia, penajamatabëxainaejawami.
5 Pajiwi xaina Jacob pijaDioso peyawenonaenexatsi, bajarapajiwi barëya. Pajiwi siwanajamatabëcuenecopata Jehová Dioso jawabelia peyawenonaenexatsi, bajarapajiwi barëya. 6 Jehová raja exana itaboxo, ira-ata, manuamene-ata. Daxita xua-ata tanetsi itaboxota perubenaejawa, irata-ata, manuameneta-ata, bajaraPonë yajawa-exana. Pacuenia bajaraPonë najumecapanepaeya jumaitsi pexanaenexa, bajarapacuenia exanabiaba daxitamatacabijawabelianexa. 7 Jehová raja pijajiwi yawenonabiaba, itsamonae itsa tobejiobia-exanatsi. BajaraPonë rajutabiaba pejanipaewi pexaejawanexa.
Jehová pijajiwi capanepabiaba, pijawajabitsaë pejamatabëcuene bejiobia-exanaejawatsiwecua. 8 Bitso pitatsëcënaewimi-ata, Jehová itaxutoxaniawaetabiaba. Pamonae pejumecowënëtsijawa pejamatabëcuenecueranaewi-ata, Jehová jamatabëcuene-asaëya-exanabiaba. Jehová raja asiwa tsabiabi pamonae pexaniacuene exanabiaba. 9 Itsanacuawerena pepatsiwi-ata, Jehová ewetabiaba itsamonae pitsacueniabiyaniwatsi. Yawenonabiaba tsonijiwixi. Yawenonabiabanua pamonajiwi pewecuatëpaewanëtsi-ata. Pibisiacuene pexanaewi, itsa najamatabëcuenewereta itsacuene picani pexanaenexa itsamonaejawabelia, bajarapamonae Jehová nacueratsia-exanabiaba.
10 Itsamatacabi Jehová daxitanacuanë ewetsiana daxitamatacabijawabelianexa. Israel papemomoximë, panijaDioso daxitanacuanë ewetsiana pewajënaeyabelia. Itsamonaejawabelia payapëtaeya-exanaename bajaraPonë ayaijamatabëcuene pexanaejawa yabara.