SALMO 96
Pejanawaji penaxëanaenexa Jehovájawabelia
1 Panaxëanare pejanawaji Jehovájawabelia. Patonaxëanare padaxitanacuanëpijiwimë.
2 Panaxëanare Jehovájawabelia. Pexaniacuenia pawënëcacuaicuaijamëre, panenaxëanaejawata. Caematacabi canacujitsia panawajunupaebianame daxitanacuanëjawa papecacapanepaejawa papecatsi-ayaijawawecua.
3-4 Pawajunupaebianame daxitanacuanëjawa Jehová ayaijamatabëcuenenëcuene. Pawajunupaebianamenua daxitajiwi pijatomaranëjawa papinijicuenejawanë-ata pacatsita-exanabiaba, tsipaji raja bajaraPonë bitso ayaijamatabëcuenenë daxitawecua. Daxitanacuanëpijiwi tsicarucatsi Jehová pexaniacuenia pewënëxaniatsinexa ayaijamatabëcuenenë yabara daxita itsawiriadiosowiwecua.a Bitso wajanacajamatabëcuenenabenajacaeya-exanaenënua, daxita itsadiosowiwecua.
5 Padiosowijawabelia itsamonae siwanajamatabëcuenecopababiaba, bajarapadiosowi piamatamobiwi. Biji rajane, Jehová pepopiasaënë, tsipaji daxita athëbëpijicuene pexanaenë.
6 Jehová peponaponaetaxunaetab wënëca daxita peyaiyataecuene, pexaniacuenianua pewënëxaniatsijawa bitso pitabëcuene. Bajarapacuenia najamatabëcuene-itajëtabiaba pepo-ayaijamatabëcuenenëcuene, pepopiacuenesaënëcuene-ata.
7 Padaxitanacuanëpijiwimë Jehová pexaniacuenia pawënëcacuaicuaijamëre ayaijamatabëcuene pexainaejawa, pepopiacuenesaënëcuene-ata yabara. 8 Pexaniacuenia pawënëcacuaicuaijamëre, tsipaji bajarapacuenia toxanepanatsi daxitajiwi pexanabiabinexa. Panepatsijawata Jehová pijatemplobopijipanabota, pacapatsianame xuanë parajutsijitsiamë ofrenda. 9 Panubenaename panematabacabëta ayaijamatabëcuenenë Jehová pitabarata, panenajamatabëcuene-itajëtsinexa asiwaya paneyaiyataejawa. Bitso cajena toxanepanatsi daxitanacuanëpijiwi pematabacabëta penubenaejawa jamatabëcuenenabenajacaeya Jehová pitabarata.
10 Pajumaitsimëre daxitanacuanëpijiwijawabelia: «Jehová raja pepopetuxanenë», pajamëre. BajaraPonë mapanacuaje copataruta pejitsipaetaxunaeta. Nexata, apowecuatixitsi tsane bajarapataxunaewecua. Pexaniajaicuenia tocanaëjëtsiana daxitajiwi pexainaeneconi. 11 Bajarapitsijamatabëcuenenëxae, daxita athëbëpijicuene, irapijicuene-ata, bitso xanepana pejamatabëcuenebarëyajawa Jehovájawabelia. Bajarapijinia pacuenia, toxanepanatsi manuamene, daxitaxuanë-ata xaina, penajumebinexa, pejamatabëcuenebarëyaxae Jehovájawabelia. 12 Bajarapacuenia wayafopijicuene, daxita pejuwijawanë-ata, bitso xanepana pejamatabëcuenebarëyajawa Jehovájawabelia. Toxanepanatsinua daxita-unuanëjawa penubenaenaejawanë penajumebinexa, pejamatabëcuenebarëyaxae Jehovájawabelia.
13 Bitso cajena xanepana daxitanacuanëpijiwi pexaniacuenia pewënëxaniatsijawa jamatabëcuenebarëyaya Jehová pitabarata, tsipaji raja patsiana peyanacua-ewetsinexa daxitanacuanëpijiwi. Patsiananua pexaniajaicuenia petocanaëjëtsinexa daxitanacuanëpijiwi pexainaeneconi.