SALMO 95
Jehová wajawënëxaniatsinexa barëyaya wajatonaxëanaejawa peliwaisi
1 ¡Naxatsia! Barëyaya tonaxëanatsi Jehová. ¡Tonaxëanatsi wajanaca-ewetsinë, wajanacacapanepaenënua!
2 ¡Pijatemplobojawabelia junuatsi pexaniajamatabëcuene wajarajutsinexa bajaraPonëjawabelia wajanacayawenonabiabixae! ¡Wajianë tonaxëanatsi wajatuxanenë wajayaiyataenexa, 3 tsipaji Jehová pinijiDioso, bitso ayaijamatabëcuenenë daxita jumapecataediosowi matatoxenetsia! 4 Eweta daxitanacuanë. Eweta iratuatuajëabereca-ata. Eweta pinijitsutonëjawa-ata. 5 Jehová exana manuamene. Exana ira-ata. Daxitacuene baja cajena bajaraPonë pijajawa.
6 ¡Naxatsia! Jehová pitabarata wajamatabacabëta nubenatsi. «¡Bitso ayaijamatabëcuenenëmë!», jaitsi tsane, tsipaji bajaraponë naca-exana. 7 Bajaraponë wajaDioso. Waxaitsi pijajiwitsi, bepija-ovejatsi. Naca-eweta. ¡Ajena panamuxuna-ewere pacuenia bajaraPonë pacajumaitsi!
8 BajaraPonë pacajumaitsi mapacueniaje: «¡Pëtsa pajamatabëcuenetajamë pacuenia panijasalinaiwimi ajamatabëcuenetaja pamatacabi jinawanapa petusato nacuata, Meribajawata, itsawënë Masah-jawata! 9 Bajarajota, panijasalinaiwimi taeyabiabi-ata pinijicuene ta-exanaejawanë, nejume-aeba tayawenonabiabijawanexa. 10 Nexata, cuarenta pawaibeje anaepanajë panijasalinaiwimijawabelia. Panijasalinaiwimi yabara jamatabë-itsinë mapacueniaje: ‘Mapamonaeje aponejamatabënajinae. Apojumecowënëtsinua tatonajumecopatsiliwaisi. 11 Nexata, bajarapamonae aponapatsi tsane tarajutsinacuayabelia, panacuata picani xaniawaetsia jinawanapaejitsia,’ jamatabëjanë panijasalinaiwimi yabara», pacajai Jehová.
C96—C99 […]