SALMO 51
Dioso wajanaca-itaxutotsoniataejawa peliwaisi
(Mapasalmo pepopeyanacua-ewetsinë David yaquina profeta Natán pemuxujiobicujinaetsi, peyacajërëtsixae Uriapijinë pijawa, Bestabé). Taema 2Sa 11-12
1 ¡Diosomë, jiwi asiwaya netaenë, nitaxutotsoniataema! ¡Newecua-ajibia-exanare pibisiacuene ta-exanaeneconi! 2 ¡Nejamatabëcuenequiare pibisiacuene ta-exanaeneconi! ¡Newecua-ajibia-exanare pibisiacuene ta-exanaeneconi!
3 Yapëtaniji xamëjawabelia tananeconitsijawa pibisiacuene ta-exanaexae. Daxitamatacabi, merawijebi-ata, najamatabënanotabiabajë pibisiacuene ta-exanaejawa. 4 Pibisiacuene itsa exanajë, pacuene xamë nitawetame, naneconitajë xamëjawabelia. Pibisiacuene itsa exanajë, xamë netaneme. Nexata, xanepana pacuenia nenaneconitsia-exaname pibisiacuene ta-exanaexae.
5 Taena tanenacoxitsijawaweliacujinae, pibisiacuene jamatabë-exanabiabajë. Taena pecototowecua tanaexanaecujinae, pibisiacuene exanabiabajë. 6 Xamë jitsipame taxaniajainexa tajamatabë-ëthëtojawawetsina. ¡Necujarubare tajamatabë-ëthëtota tayapëtaenexa pexaniajailiwaisi!
7 ¡Nejamatabëcuenequiare pajanata nejamatabëcuene axuirajibia-exanaejitsiamë! Nexata, tajamatabëcuene-axuirajawa, ajibi tsane. 8 Tanenaneconitsia-exanaecujinaemë, nejamatabëcuenebarëyaya-exanaename jamatabëcuenebarëyaya icatsia taponaponaenexa. 9 ¡Pëtsa baja najamatabënapitame pibisiacuene ta-exanaejawanë! ¡Newecua-ajibia-exanare pibisiacuene ta-exanaeneconi!
10 ¡Diosomë, netocopare tajamatabëcuenexanepanaenexa! ¡Netocoparenua tasiwanajamatabëxainabiabinexa ëpexaniacuene! 11 ¡Pëtsa nenawecuaxuabame daxitamatacabijawabelianexa naxuabiaya tacawecuaponaponaeyaniwa! ¡Pëtsa newecuapitamenua nijaEspíritu Santo! 12 ¡Icatsia jamatabëcuenebarëyaya neponaponaeya-exanare, tajaneconi tanewecua-ajibia-exanaexaemë! ¡Nejitsipaeya-exanarenua, tacajumecowënëtabiabinexa pacuenia nitorobame!
13 Nexata, pibisiacuene pexanabiabiwijawabelia, nejumeliwaisi tsipaebabiabianajë. Nexata, pibisiacuene pexanabiabiwi-ata pibisiacuene pexanabiabijawawecua, najamatabëcuenepënëyorotsiana xamëjawabelia. 14 ¡Diosomë, pëtsa nebeyaxuabame tanenaneconitsia-exanaenexamë pibisiacuene ta-exanaeneconi pejamatabëcuene! Xamë raja caenëmë cacaëjëpa tanewecua-ajibia-exanaenexamë ta-exanaeneconi. Nexata, xanë wajita canaxëanaenajë pibisiacuene ta-exanaeneconimi tanewecua-ajibia-exanaejawamë.
15 ¡Necuaicuaijaiya-exanare! Nexata, xamëjawabelia jumaitsinë tsane: «¡Diosomë, xamë bitso ayaijamatabëcuenenëmë!», janë tsane. 16 Apojitsipaemë saya jema dajubiwi ofrendacuenia tacarajutsijawa. Itsa jitsipaejitsipame, carajutsipatsi. Xamë aposiwabarëyamë dajubinë ofrendacuenia tacatobeyaxuabijawa. Apojitsipaemë dajubiwi ofrendacuenia altar-jumata tacatotajuitsijawa. 17 Xamë jitsipame pajiwi bitso yajamatabëcuenebëjai pibisiacuene pexanaeneconi. Aponaitaxutojematsimë pajiwi bitso yajamatabëcuenebëjai pijapibisiacuene pexanaeneconi.
18 ¡Israel-pijinë pemomoxi nitaxutotsoniataexae, pexaniacuene to-exanare! ¡Yawenonare bajarapamonae icatsia pexanebinexa Jerusalén tomara matatoyorotsia peyacaranatsijawaxaneto! 19 Nexata, nijajiwi pejamatabë-ëthëtojawawetsina pecajumecowënëtawanapaewi, ofrendacuenia becerro itsa catobeyaxuaba, bajarapawi altar-jumata itsa catotajuita, siwabarëyamë tsane.
C52—C67 […]