SALMO 23
Dioso raja tane-ewetsinë be-oveja pewetsinëcuenia
Israel nacua peyanacua-ewetsinë, David-pijinë, peyaquinaesalmoyo.
1 Pacuenia oveja pewetsinë xaniawaetsia ewetabiaba pija-ovejabitsaëto itsacueneyaniwa, bajarapacuenia Jehová ne-ewetabiaba. Nexata, itsacuenejawa-ata aponetsisajinae tsane.
2 Pacuenia oveja pewetsinë jinawanapaeya-exana pija-ovejabitsaëto itsajota nawita pejanajuwipo̱na,a xaniawaetsia penacuera-ewetsinexa, bajarapijinia pacuenia Jehová neponaponaeya-exanabiaba pexaniataxunaeta, nacuera-ewetsiaya taponaponaenexa. Pacuenia pewetsinë matacaponabiaba pewainae-ecaemenethaibëjawabelia,b pija-ovejabitsaëto jamatejema piapaenexa, bajarapacuenia Jehová nematacaponabiaba itsaxuayo nejamatabëcuenexanepanaeya-exanaejitsia, apotanetsi-ayaijawata.
3 Nejumalixanepanaeya-exana. Nejamatabëcuene-asaëya-exananua. Nematacaponabiaba pexaniacuene ta-exanabiabinexa, xaniawaetsia tapatsinexa itsabelia ponajë. Ne-ewetanua pibisiacuene ta-exanaeyaniwa. Bajarapacuenia xanëjawaberena exanabiaba, daxitajiwi peyapëtaenexa Jehová pexaniajamatabëcuene pexainaejawa.
4 Neyamerawibi-ata tsane, itsajota bitso netsi-ayai tanebeyaxuabinexa, itsiata apojunawinë tsane, tsipaji Jehovámë neyajawaponaponabiabame. Pacuenia oveja pewetsinë pijanaebobejec cobena-ewetabiaba, pe-upitoxorotsinaebo, peyapijiwiconitsinaebo-ata, pija-ovejaxi peto-itsacuenebiyaniwatsi, bajarapacuenia xamë ne-ewetabiabame. Nexata, casiwajamatabëcuenexanepanaeyaponaponabiabatsi.
5 Netsiwëjunatame, taxaejawa tanaxaenexa xamëjawata. Nexata xamëjawata, taxaejawa tsunaxaniji tajawajabitsaë pitabarata.d Tanecopiapitsinexamë xaniawaetsia, netsimata-epaname petuxujuwi-aceitera. Papeca-apaejawatae nerajutame tamatawëjëa-apaeranexa, netowënëtame pematapitsipaejawabelia. Nexata, bitso barëyanë.
6 Pepacuene tane-asiwajawamë, tanebejiobiataejawamë-ata cabarëyanë tsabiabi tsane, daxita ta-asaëmatacabianëtsaponaponaejawata. Cayajawaponaponaenatsi nijatemplobota daxitamatacabijawabelianexa.
C24—C26 […]