SALMO 22
Mapasalmo David yaquina pacujinae Israel nacua pewetsinë Saúl bejiobia-exanabiabatsi
Israel nacua peyanacua-ewetsinë, David-pijinë, peyaquinaesalmoyo.
1 Petsi-ayaijawatatsi David jumaitsi pewajëcaejawata Diosojawabelia mapacueniaje:
—Taja Dioso, TajaDioso, ¿Detsa xuajitsia taja-epatoa necopatame? ¿Detsa xuajitsia tajë newecuaponaponame tanecapanepaeyaniwamë? ¿Detsa xuajitsia nenamuxujematame tacawajëtsijawa? 2 TajaDioso daxitamatacabijebi cawajëcabiabatsi, itsiata aponejumetaemë, taneyawenonaenexamë. Bajarapacuenia merawijebi-ata aponajumecopatsinë nacuera-ewetsinejewanë.
3 »Xanë itsiata yapëtaniji xamë nianeconijibinëcuene. Pexaniacuene nexanaponaponaenëxae, daxita Israel-pijinë pemomoxi cawënëxaniatabiaba. 4 Xamëjawabelia patajasalinaiwimib casiwanajamatabëcuenecopaba neyawenonaenexa, pebejiobia-exanaejawatatsi. Nexata, xamë capanepame. 5 Bajarapamonaemi cawajëca neyawenonaenexa. Nexata, xamë capanepame. Casiwanajamatabëcuenecopatanua xamëjawabelia neyawenonaenexa. Nexata, xaniajaiya yawenoname. Apocopatsimë yawenonaenejewamë.
6 »Xanë itsiata beweliajamatabëcuenenënë. Jiwi xaniawaetsia aponetae jiwitonënëcuenia.c Caranata saya, netane be-orotonëcuenia, bijiaya tanenanaëcotabiabinexa. Bajaraxuata tsaena, aponesiwajamatabëcuenebëjai taneyawenonaenexa. Xanë saya jiwi jëajëajaiya necapo̱capo̱nabiaba. 7 Daxita tanetaewi pibisiacuenia nebaracuaicuaijai tsabiabi. Nexata, tanecuenebaracuaicuaijaijawata, bajarapamonae namatabocowewetabiaba,d tanejamatabëcuene-itajëtsinexa tajemajainëcuene. Najumecapo̱capo̱naeya neyabarajumaitsi tsanubenae: 8 «Maponëje pina siwajamatabë-itaxutuajamatejema Jehovájawabelia peyawenonaenexatsi. Nexata, Jehová yawenonae pecapanepaenexa. Jehová pina bitso bajaraponë jitsipa. Nexata, itsa xaniajai becapanepatsie pitaxutuajamatejemanë», neyabarajai tsanubenae.
9 »Xamë nenaexanaeya-exaname taena pecototowecua. Nexata, neyapëtaeya-exaname taca-itaxutuajamatejemacuene, taena tami-apaejawata. 10 Taena pecototowecua tanaexanaewajënaeya xamë baja cajena ne-ewetabiabame, tanaexanaejawaweliacujinae-ata xamë tajaDiosomë tsaponaponae. 11 ¡Pëtsa tajë newecuaponaponame, tsipaji yajamatabëcuenebëjanë tajawajabitsaë tane-imoxoyotsijawata! Ajibi itsajiwi-ata taneyawenonaenexa.
12 »Tajawajabitsaëwi nematatoyorotsia nubena tane-itsacueniabinexa betoro pianaepanaewi, bitso piasaëwi-ata pacuenia Basán nacuata pejinawanapaewi. Nexata, tapanepaecuene neto-ajibi bajarapamonaewecua. 13 Pacuenia pinijiwirianewëthë, petsobianë, nacuaibowësatsiaya pefiabinë pewaetabinexa tsijumajirewa pexaenënexa, bajarapacuenia tajawajabitsaëwi neconi netsijumaxuaba ayaijumeta tanebaracuaicuaijaitsabiabijawata tananeconitsicuenia tatëpaenexa.
14 »Pacuenia mera ajibi tsaponae pe-epanaxuabicujinae, bajarapacuenia asaëjibinë tsaponae. Daxita tasitoxi sitixipajunujunuajë. Pacuenia jabëmanixuxuto yacueyacueca piatajujawata pepora penaexanaenexa, bajarapacuenia jamatabëcuenefaefaenajë bitso. 15 Cuaibotsewajë bitso, pacuenia petoxotoxocaemuxupayo pecotiata pebobocaejawa. Nexata, ta-ebarëcuitoxae, ne-ebarëcanatsana tamataxaxanawijawabetsia. Xamë nejamatabëcuene, Jehová, imoxoyo raja tatëpaejawa, caewëarena atsapërë tanaexanaenexa.
16 »Pacuenia awiri pianaepanaewi matatoyorotsia banubena pecueyawi, bajarapacuenia xanë-ata pibisiacuene penajamatabëxainaewi, tajawajabitsaëwi, nematatoyorotsia nubena daxitajawa. Bajarapamonae be-awiri netaxujorone. Necobejoronenua.f 17 Tanejumalibijawata necaëjëpa tanayenesinamata-ëjëtsijawa. Tajawajabitsaëwi aponecopatabiabi tanenaitaxutocaewetsijawa. 18 Bajarapamonae natsicobetsana tanaxatatsijawami.g Canaëjëbiaya natsibixabajaraba pecanaëjëbijawaxita peyapëtaenexa ponë canacopatsijitsia.
19 »¡Itsiata baitsi jane, Jehová, pëtsa tajë newecuaponaponame! ¡Naxatsiayo patsiaremena taneyawenonaenexamë, tsipaji raja xanë najamatabëcueneyaëtajë xamëta taneyawenonaenexamë! 20 ¡Tajawajabitsaëwecua necapanepare, bajarapamonae tanebeyaxuabiyaniwa, pamonae acujirubeje pacuenia awiri pianaepanaenë!
21 »¡Necapanepare tajawajabitsaë pecuaibowecua, tsipaji bajarapamonae jamatabënebeyaxuaba tanebaranatsipaebijawata, pacuenia pinijiwirianewëthë petsobianë nawonuatiticaejitsipa pexaenë! ¡Necapaneparenua tane-itsacueniabiyaniwa nematatoyorotsia penubenaewi, pacuenia toro pianaepanaewi, piaitatsacawi-ata!