SALMO 2
Pacuenia Jehová petsimata-epanaenëtsia yanacua-ewetsiana mapanacuapijiwije
1 Itsanacuanëpijiwi, pamonae apojudíowi, bitso anaepanabiaba Jehovájawabelia. Saya jema natocaëjëbabiaba picani pecuenecaranatsinexa Jehová, apocuenecaëjëpae-atatsi pexanaenexa.
2 Pinijinacuanë, tomaranë-ata, pewetsiwi nacaetuatabiaba penajumejaitsinexa pacuenia wecua-ajibia-exanaejitsia Jehová pitorobicuene, ponë-ata petsimata-epanaenëtsi peyanacua-ewetsinexa. 3 Nexata, najumaitsi tsabiabi: «Nawajabitsaëtsianatsi Jehovájawabelia, petsimata-epanaenëtsijawabelia-ata, wajanawecua-ajibia-exanaenexa bajaraPonëbeje wajanacanamatacaitorobicuenemi. Nexata, pacuenia jitsipatsi wajacuata, exanabiabianatsi», najai tsabiabi bajarapamonae.
4 Itsiata, Jehová, Ponë athëbëtatsia yanacua-eweta daxitacuene, cuenecapo̱capo̱naena bajarapamonae, tsipaji apocaëjëpaetsi Jehová pecuene-amoneyabinexatsi. 5 Biji rajane, Jehová bitso anaeya cuenexanetsiana bajarapamonae. Nexata pecajunawi, bitso neconecojai tsane. Orijibia, anaeya jumaitsi tsane bajarapamonaejawabelia: 6 «Xanë raja ta-itapetsinë peyanacua-ewetsinënexa, tocopatajë peyanacua-ewetsinexa mapanacuapijiwije Sión-tsutojumawetsica.b Nexata, ecaena Jerusalén tomarata, tajatsutojumata pe-ecaetomarata», jai tsane Dioso anaeya.
7 «Xanë tane-itapetsinë pacayapëtaeya-exanaenatsi xua Jehová nesiwanajamatabëcuenewereta xanë, tayanacua-ewetsicuene yabara. Jehová raja jumaitsi: ‘¡Ajena raja, pamatacabi, canutatsi daxitajiwi pitabarata, pecayapëtaenexa xanë taxënatocuenemë!c Xanë raja axanë tsaponaponae. 8 ¡Nexata, newajëre tacarujutsinexa neyanacua-ewetsijawa daxitanacuanëpijiwi! Catocopatsianatsi newetsinënexa daxitanacuanë, tajënacuanë-ata. 9 Pacuenia hierronaebota jiwi batoxobiaxuaba atsananitomita pefaratsicanalito, Xanë neyanacua-ewetsisaëta ajibia-exanaename daxita itsamonae reyjiwi peyanacua-ewetsicuenemi’, neyabarajai Jehová», jai pitapetsinëtsi pewetsinënexa.
10 ¡Nexata baja, pinijinacuanë, tomaranë-ata pane-ewetsiwi, xaniawaetsia panenamuxuna-ewere patacamuxujiobiliwaisi! ¡Pajamatabëcuenecaeware Jehovájawabelia papecacuenexanetsinexa! 11 ¡Yaiyataeya, barëyayanua, patonacuenebabiabare bajaraPonë! 12 ¡Payaiyataemanua Ponë pacayapëtaeya-exana pexënatocuene, papecabara-anaepanaeyaniwa, papecawerebiabiyaniwanua paperujujiwiwajënaeyamë, tsipaji bepijia bara-anaepanabiaba pibisiacuene jiwi pexanaejawa yabara! Itsiata, bitso jamatabëcuenebarëya daxita pamonae siwanajamatabëcuenecopata Jehovájawabelia, pewetsinexatsi daxita piayaicuenewecua.
C3—C7 […]