Salmos
Israel-pijinë pemomoxi pecanaxëanaewajianë
SALMO 1
Pexaniacuene pexanaewi, pibisiacuene pexanaewi-ata peliwaisi
1 Jamatabëcuenebarëya tsawanapae tsane pajiwi apojumecowënëtsi pibisiacuene pexanaewi pemuxubijiaxuabijawatsi. Apojumecowënëtsi pibisiacuene pexanaewi pejunatsijawatsi, pibisiacuene pebarë-exanaenexatsi. Apobarënajamatabëcuenejëpaenua pecapo̱napo̱naewi Dioso pijacuene. 2 Biji rajane, bajarapajiwi caematacabi canacujitsia, caemerawi canacujitsia-ata, Jehová pejumeliwaisi canaëjëtsiaya asiwaya najamatabëxainabiaba.
3 Pacuenia mene-itapata waja-ubanutsinae, xaniawaetsia nacuaitabiaba penacuaitsimatacabi, pebaxu-ata waita apotsaquenae, bajarajamatabëcuene-itsi tsabiabi bajarapajiwi. Daxita xua bajarapajiwi exana, toxanepanabiabatsi.
4 Juya piajamatabëcuenebejewi, bajara-apojamatabëcuene-itsi. Pacuenia arroz-xuboco caputatsi jowibota penaxuabinexa, bajarasaya itsi tsane piajamatabëcuenebiwi. 5 Bajarapamonae Dioso naneconitsia-exanaena, pamatacabi naneconitsia-exanaena pibisiacuene pexanaewi. Pibisiacuene pexanaewi aponanubenae tsane pexaniajamatabëcuenewi penacaetuatsijawata.
6 Jehová xaniawaetsia pejamatabëcueneyapëtaexae pexaniacuene pexanaewi, xaniawaetsia pijinia ewetabiaba. Juya, pamonae pibisiacuene pexanaewi, bajaraPonëwecua naxuabiana.