Israel-pijinë pemomoxi pewetsiwi rajuta itsajawanë Dioso pijatemplobo pexanaenexa
29
Bajaraxuacujinae, pepopeyanacua-ewetsinë David jumaitsi daxita penacaetuatsibitsaëtojawabelia:—Taxënato Salomón raja, bajaraponë Dioso itapetatsi petonacuenebinexa pijatemplobo. Bajaraponë pewëjëato. Abaxë apopenaweretsinë. Itsiata baitsi jane, bajarapatemplobo penacuenebijawanexa bitso ayaijawa, tsipaji pabo nacuenebijitsia jiwitonë apopeyanacua-ewetsibonexa, Jehová Dioso raja pijatemplobonexa. 2 Xanë bitso ayaicuenia tsiwajënaenacuenebia-exanajë bajarapabonexa xua namatawenonaejitsia pecanacuenebinexa. Nexata xanë tsiwajënaejebajë oronanijawanë, palatananijawanë, broncenanijawanë, hierronanijawanë, bajarapacuenia naejawanë-ata, daxitaxua canacuenebijitsia caewiriajawa canacujitsia. Bajarapacuenia tsiwajënaecaetuatsia-exanajë itsawiria ibotoxi-ata, bitso pexaniawirianamatamotsijawanë pacuenia cornalinawiria ibotoxi, bajarapacuenia pecataicae-ibotoxinexa ónicewiriajawanë, bajarapacuenia pecatsanae-ibotoxinexa-ata, bajarapacueneta pitabëtsi-ibotoxinexa-ata daxitawiriajawanë. Bajarapacuenia mármol-wiria ibotonë tsiwajënaeweretejebia-exanajë ayaijawa. 3 Bajarapacuenia tsiwajënaecaetuatsia-exanae-atanë bajarapatemplobonexa, itsiata tajaDioso ta-asiwaxae, orijibia rajutajë oronanitonë, bajarapacuenia palatananitonë-ata taxainaeyajuwënëjawa tajacuata. 4 Baitsi rajutajë cien mil pakilobeje oronanijawanë, bitso pexaniawiriajawa Ofir nacuapijijawanë, bajarapijinia pacuenia doscientos treinta mil pakilobeje palatananijawanë, pexaniawiriajawanë. Bajaraxuanë bajarapatemplobopijiparéd-pënëwelia pijumaxatatsinexa. 5 Bajarapa-oronanitonë, palatananitonë-ata rajutajë pijinia daxita pecanacuenebinexanua xuanë penacuenebiwi jitsipa pecanacuenebinexa bajarapatemplobojawata. ¡Ajenaconoxaeta nexata panetsipaebare! ¿Jipatsa jitsipa penarajutsijawa jamatabëcuenebarëyaya Jehová pijatemplobonexa itorobinejewatsi? —jai David.
6 Nexata, pamonae penamatacajinawanapaewi pijamonaetuatuajëta, pamonae pijawiriamaëtowi pewetsiwi, pamonae pijinia pewetsiwi caenë pemomoxibitsaëto, pamonaenua penamatacaitorobiwi wajabitsaëwi, tsiquiribitsaëtoxi, pecunuabitsaëtonë-ata, pamonae-ata pewetsiwi tomaranë pexanebaponaenexa pepopeyanacua-ewetsinë petocaëjëtsicuenia, daxita bajarapamonae pewetsiwi rajuta caejiwi canacujitsia pacuenia nacuenecaëjëta. 7 Nexata, bajarapamonae rajuta templobonexa ciento sesenta y cinco mil pakilobeje oronanijawanë, bajarapijinia pacuenia diez mil pamonedabeje oronanitota pexanaejawanë. Rajutanua trescientos treinta mil pakilobeje palatananijawanë, bajarapijinia pacuenia seiscientos mil pakilobeje broncenanitojawanë, bajarapijinia pacuenia tres millones trescientos mil pakilobeje hierronanijawanë.
8 Bajarapacuenianua pamonae pexainaewi pexaniawiria-ibotoxijawanë, bajarapamonae rajuta bajaraxuanë Jehiel-jawabelia. Bajaraponë Gersón pemomoxiyajuwënënë. Jehiel raja tsicarucatsi templobo pijapalata pewetsinënexa; baitsi tesoreronë.
9 Nexata, penacaetuatsibitsaëto bajarapacuene itsa tane perajutsijawa, bajarapamonae bitso jamatabëcuenebarëya, tsipaji bajarapamonae pexaniajaijamatabëcueneta rajuta bajaraxuanë Jehovájawabelia. Bajarapijinia pacuenia pepopeyanacua-ewetsinë David itsa tane, nexata bajaraponë jamatabëcuenebarëya bitso.
David pexaniajamatabëcuene rajuta Diosojawabelia pewajëtsijawata
10 Nexata David paepato bitso pexaniajamatabëcuene rajuta Jehovájawabelia daxitajiwi pitabëta. Jumaitsi:
—Cawënëcacuaicuaijaitsi pexaniacuenia, pexaniajamatabëcuene nexainaejamatabëcuene, Jehová tajaDioso, Israel-pijinë pijaDiosomë daxitamatacabijawabelianexa. 11 Ëxamënexa raja, Jehovámë patajaDiosomë, daxitajiwi pecawënëxaniatsicuene ayaijamatabëcuenenëmë yabara, daxita niacuenesaënëcuene yabara-ata, neyaiyataecuenenua yabara, nejamatabëcuenematatoxenetsicuene yabaranua mapanacua ne-ewetsicapanepaejawanexaje. Daxitaxua rubena athëbëtatsia, bajaraxuanë nijajawanë. Mapanacuapijijawanë-ata xamë nijajawanë. Bajarapacuenia xamë catsicaruca daxita mapanacua neyanacua-ewetsicuene-ata. Xamë baja cajena caenëmë ayaijamatabëcuenenëmë daxitawecua. 12 Xamëjawawerena baja cajena najetaruca jiwi pexainaejawanënexa, bajarapacuenia peyaiyataejamatabëcuenenexa-ata. Xamë baja cajena ewetame daxitacuene mapanacuataje, bajarapacuenia-ata daxitasaë pecajamatabëcuenecaëjëpaecuene-ata nijajawa. Nexata, xamë jamatabëcuenecaëjëpaeya-exaname daxitajiwi pewënajiwi peyaiyataenexatsi ayaijamatabëcuenewicuenia. Bajarapacuenia necuenesaëjamatabëcueneta caëjëpaeya-exanamenua jiwi piasaëwinexa. 13 Bajaraxuata, ajenaconoxae patajaDiosomë, pacarajutatsi bitso pexaniajamatabëcuene, bajarapacuenianua pacawënëxaniatatsi pexaniacuenia newënëta. 14 Paxanë rabaja pabeweliajamatabëcuenewinë bitso xamë nitabarata. ¿Detsa xuajitsia nexata xanë, bajarapacuenia tajamonae-ata, panecuenecaëjëpa patacarajutsinexa bajaraxuanë? Paxanë payapëtaniji pacuenia daxita patacarajutsijawanë baja cajena najetaruca xamëjawawerena. Nexata, bajaraxuanë panecuenecaëjëpa patacarajutsinexa, bajaraxuanë patanerajutsixaemë copiaya. 15 Xamë nitabarata saya paxanë bepatapatsiwi itsanacuajawawerena, pataponaenexa itsanacuajawabelia, pacuenia baja patajamonaewimi meta najetarubena. Paxanë pajamatabëcuene-asaënë tsawanapae mapanacuataje cae-epatoyonexa saya bepitacaënaejawa. Pacuenia pitacaënaejawa apoxainae xua jamatabëcuene-ewetaponaponaejitsia piayapësaënexa, bajarapacuenia pajinawanapajë picani patawajënaeyabelia pajamatabëcuenesaënejewanë.
16 »Jehová patajaDiosomë, baja cajena daxita patacarajutsijawanë xamë bajaraxuanë nijajawanë picani. Xamëjawawerena baja cajena najetaruca pexainaejamatabëcuene, xuanë daxita majota paxanë patsiwajënaexaniawaetajëje, pecanacuenebinexa templobo xamë newënëta, pawënëta bitso peyaiyataewënënexa daxitawënëanëwecua. 17 Xanë yapëtaniji, tajaDiosomë, jiwi nejamatabëcuenecanaëjëtsinëcuene. Yapëtanijinua nesiwajamatabëcuenebarëyajawa pajiwi pexaniajamatabëcuenia penacuenebiwi pecatsitaxanepanaejawa. Bajaraxuata, xanë carajutatsi bajaraxuanë itsajamatabëcuene xainaenejewanë. Ajenaconoxaeta xanë taniji jamatabëcuenebarëyaya pecarajutsijawa mapamonaeje pecatocaetuatsiwi pija-ofrendajawanë jamatabëcuenexanepanaeya pijacuata penatocanaëjëtsicuenia. 18 Jehovámë, baja cajena patajasalinaiwimi pijaDiosomë, pacuenia Abraham, Isaac, Israel-ata. Nexata, xanë cawajëtatsi pitsijamatabëcuene mapanacaetuatsiwi najamatabëcuene-itajëta ajena, netsijamatabëcuenerucaeya-exanaenexa bajarapajamatabëcuene pewajënaeyabelia, bajarapacuenia tsitecaeya petsijamatabëcuenerubenaenexatsi, pecasiwajamatabëcuenebarëyanexa daxitamatacabijawabelianexa. Bajarapacuenia pejamatabëcuenejawalia jamatabëcuenexaniawaetarutamenua xamëjawabelia asiwaya pecasiwanajamatabëxainabiabinexa daxitamatacabijawabelia, xamëwecua peponaeyaniwa. 19 Bajarapacuenia cawajëtatsi taxënato Salomón-jawabelia nejamatabëcuenecaëjëpaeya-exanaenexa, bajaraponë pexainaenexa perowiajamatabëcuene, pecajumecowënëtabiabinexa pacuenia itorobame, caejamatabëcuene pexainaexae paliwaisianëjawalia cujarubame, daxita paliwaisianë itawetame, paliwaisianë-ata itorobame pexanaenexa. Bajarapacuenia cawajëtatsi necopatsinexa bajaraponë pecatonacuenebinexa bajarapatemplobo, baja tsipaji tsiwajënaexaniawaetajë tajëwelia bajaraxuanë pecanacuenebijawanënexa —jai David Jehovájawabelia pewajëtsijawata.
20 Bajaraxuacujinae, David jumaitsi daxita penacaetuatsiwijawabelia:
—Ajenaconoxae pexaniacuenia pawënëxaniatsianame Jehová panijaDioso —jai. Nexata bajarapamonae daxita Jehová pijaDioso wënëxaniata, pijamonaemi pijaDioso. Nexata, bajarapamonae yaiyataeya pematabacabëta nubenanua Jehová pitabarata, bajarapacuenia pepopeyanacua-ewetsinëtsi pitabarata. 21 Itsamatacabi bajayacunuajawabelia bajarapamonae jane baja tajuita altar-jumata Jehovájawabelia mil ponëbeje becerro, mil ponëbeje oveja pebitonë, bajarapijinia pacuenia mil ponëbeje pejana-ovejanacuetoxi-ata. Bajarapacuenia itsamonae dajubi tajuita daxitanëanë pijaneconijamatabëcuene. Itsadajubi pijinia tajuita, pexaniajamatabëcuene perajutsinexa Jehovájawabelia. Bajarapacuenia-ata capata vinorajawanë, pexaniajamatabëcuene rajutsiaya pe-epanaenexa Jehovájawabelia. Nexata daxita Israel nacuapijiwi bajarapacuenia exana Jehovájawabelia. 22 Bajarapamatacabita nexata, bajarapamonae najuaxaewanapa, bajarapacuenia najuamatawëjëa-apaewanapa piapaeranë bitso najuajamatabëcuenebarëya Jehová pitabarata. Bajaraxuacujinae cotocaewijawata, Salomón, David pexënato, icatsia wënë-itajëtatsi pepopeyanacua-ewetsinënexa. Nexata tsimata-epanatsi aceiterata daxitajiwi pitabarata, peyapëtaeya-exanaenexatsi Dioso pitapetsijawatsi pepopeyanacua-ewetsinënexa. Bajarapacuenia bajarapamatacabita Sadoc-ata tsimata-epanatsi aceiterata sacerdotenënexa. 23 Nexata bajarapacuenia Salomón canacopata baja pepopeyanacua-ewetsinë, pe-ecaenexa paxa pijataxunaeta, Jehová petocopatsicueniatsi. Nexata bajaraponë pewajënaeyabelia cuenecujanenajetarucatsi pewetsijawata. Salomón pecanacopatsixae pepopeyanacua-ewetsinë, nexata daxita Israel nacuapijiwi jumecowënëtatsi, 24 bajarapacuenia wajabitsaëtsiwi penamatacaitorobiwi, David-pijinë pijamonae-ata. Daxita bajarapamonae Salomón jamatabëcueneyawenonabiabatsi. 25 Nexata Jehová Salomón tocopata ayaicuenia peyaiyataenexatsi Israel-pijinë pemomoxi. Bajarapacuenianua tocopatatsi bajaraponë peyanacua-ewetsimatacabi pewënëcapitsapaenexatsi pexaniacuenia, jiwi peyaiyataenexatsi daxita Israel nacua peyanacua-ewetsiwiwecua.
Pepopeyanacua-ewetsinë David tëpa
(1Re 2:10-12)
26 Bajarapacuenia David, pexënato Isaí, yanacua-eweta daxita Israel-pijinë pemomoxi. 27 Bajaraponë yanacua-eweta Israel-pijinë pemomoxi cuarenta pawaibejecuenia. Bajaraponë copiaya yanacua-eweta Hebrón tomarajawata siete pawaibeje, xuacujinae treinta y tres pawaibeje Jerusalén tomarajawata. 28 Bajaraponë baja tëpa pepuaperujunë bitso, ayaijawa pecobecowë pexainaecujinae, bitso peyaiyataecuenetsi pepuaxainaponaerena. Nexata David-pijinë pexënato Salomón canacopata juya pewetsijawa paxapijinë pijataxunae.
29 David-pijinë pijaliwaisi nacayapëtaeya-exana petaxuxuabijawawerenacujinae peweretsijawaberena profeta Samuel-pijinë peyaquinaebaxutonëta, bajarapacuenia profeta Natán-ata peyaquinaebaxutonëta, bajarapacuenia profeta Gad peyaquinaebaxutonë-ata. 30 Bajarapamonae yaquina bajaraponë daxita peyanacua-ewetsicuene yabara, penamatacaitorobisaëcuene yabaranua, xuanë-ata bajaraponë taeponarena bajarapamatacabijawa, bajarapacuenia Israel-pijinë pemomoxi-ata, itsamonae itsanacuanëpijiwijawabelia-ata.