Nabucodonosor pijajiwi wajabitsaë cuene-amoneyaba Jerusalén tomarapijiwimi
25
Sedequías baja itsa xaina nueve pawaibeje peyanacua-ewetsicujinae Judá nacua, nexata bajarapawaita diez pajuametobejejawata diez matacabita Babilonia nacua pepopeyanacua-ewetsinë, Nabucodonosor, tsimaxëbarënajetaruca pijajiwi wajabitsaëwi Jerusalén-jawaberena, pebarënawajabitsaëtsinexatsi itsajota ponapona Sedequías. Nexata daxita bajarapatomara matatoyorotsia pijajiwi wajabitsaëwi exana pijataxunaeboxi pebarënawajabitsaëtsinexatsi, bajarapacuenia itsamonae pepitsapaeyaniwa, pejoneyaniwanua Jerusalén tomarata. Bajarapatomara pepënëya nacuenebanajetarubena bajarapamonae itsapiapiajawanë, itsajota bajarapamonae barënatseconawanapaejitsia. 2 Bajarapamonae yacajinawanapatsi anijawaibejecuenia, Sedequías pexainaejawabelia once pawaibeje peyanacua-ewetsijawa. 3 Bajarapawaita cuatro juametota, nueve matacabita, bajarapamatacabijawa bitso janibo tocopiapatatsi bajarapatomarapijiwi peyacapatsicujinaetsi pijawajabitsaëwi. Nexata, bajarapamonae apoxainae xua xaejitsia. 4 Belia itsamatacabi Caldeo nacuapijiwajabitsaëwi, Babilonia nacuapijiwi, wojoruta Jerusalén matatoyorotsia peyacaranatanutsipanajawalia, pejonenexa. Nexata, bajarapamerawi pijinia Sedequías, pijajiwi wajabitsaëwi yajawa, barënamueta tomarawecua perëcëpecaenexa. Bajarapamatacabi picani Babilonia nacuapijiwajabitsaëwi matatoyorotsia ya-ewetawanapa. Itsiata, bajaraponë barëpitsapa pabauparuca pepopeyanacua-ewetsinë pijapitabëtsipanabojawalia. Bajarapabaupa ruca wajabitsaëwi penaya-itacaranatsipared tomara-ata peyacaranatsipijipared-bejejawalia. Nexata, bajaraxuayolia barëpitsapa. Nexata, bajarapamonae pona panamuto ruca Jordán mene pemuxubërëjawa, Arabátusatonacuajawabelia pepatsinamutonexa. 5 Itsiata baitsi jane, Caldeo nacuapijiwajabitsaëwi pëbarajina pepopeyanacua-ewetsinë Sedequías. Nexata, bajaraponë pëcaxinatsi Jericó tomara imoxoyo pebocaewayafojawata. Daxita Sedequías pijajiwi wajabitsaëwi pewecuanacayajatecaecujinaetsi, waetabatsi bajaraponë. 6 Nexata Babilonia nacuapijiwajabitsaëwi pewaetabicujinae, pepopeyanacua-ewetsinë Sedequías caponatsi Riblá tomarajawabelia, itsajota ponapona Babilonia nacua pewetsinë, Hamat nacuata pe-ecaetomara. Nexata bajarajota, Babilonia nacua pepopeyanacua-ewetsinë Nabucodonosor tocaëjëta pacuenia bajaraponë pepopeyanacua-ewetsinëmi Sedequías naneconitsia-exanaejitsiatsi. 7 Nexata, Sedequías coxibeyajebatsi pitabarata petocuaibosicaucubicueniatsi Nabucodonosor petsi-itorobicuenia. Bajarapacuenia pexanaecujinae, nexata itoroba pitaxutojutsinexatsi Sedequías. Bajaraxuacujinae, itoroba pecëtsinexatsi cadenamaëtota, pecaponaenexatsi Babiloniajawabelia.Pacuenia Nabucodonosor pijajiwi wajabitsaë bijiana Jehová pijatemplobo
8 Nabucodonosor, Babilonia nacua pewetsinë, itsa xaina diecinueve pawaibeje pepopeyanacua-ewetsinëcujinaerena, bajarapawaita cinco juametota siete matacabita Nabucodonosor pijajiwitonë Nabuzaradán, wajabitsaëwi pepopenamatacaitorobinë, barëpatajopa Babiloniapijiwajabitsaëwi Jerusalén-jawata. 9 Nexata, bajaraponë tajuitsia-exana Jehová pijatemplobomi, bajarapacuenia Jerusalén pewetsinë peponaponaebomi-ata, daxita bajarapatomarapijiwi penamatamotsibonëmi-ata. Tajuitanua daxita Jerusalén tomara pewetsiwi pijabonëmi. 10 Nexata, bajaraponë daxita pijajiwi wajabitsaëwi yajawa, Jerusalén matatoyorotsia penaya-itacaranatanutsi-ibopanajawami barëbijiana. 11 Bajaraxuacujinae, Nabuzaradán, penamatacaitorobinë wajabitsaëwi, capona Babilonia nacuajawabelia daxita penacopabiwi Jerusalén-jawata Sedequías pebarënajetabijirawicujinae. Caponanua pamonae caejamatabëcuene pexainaewi Babilonia nacua pewetsinëjawabelia, pamonae-ata petsiyapëtaewi penacuenebijawa. Pamonae Jerusalén-jawata pejinawanapaewi, daxita caponatsi petaicaewitsicuenia Babiloniajawabelia. 12 Saya caemonae copata Jerusalén-jawata, pamonae bitso bepejiobiwi, bajarapamonae peto-ewetababiabinexa pabianë, bajarapacuenia uvabacabonë bajarapanacuata.
13 Templobo petajuitsia-exanaewajënaeya, Nabuzaradán itoroba pijajiwi wajabitsaë petonotsinexa bajarapabopijijawanë penamatamotsijawanë, pecaponaenexa Babilonia nacuajawabelia. Nexata, bajarapacaldeowajabitsaëwi, Babilonia nacuapijiwi, toxobaba daxitaxuanë broncenanitonëta pexanaejawanë templobopijijawanëmi, pacuenia panaesiturutobeje nuca templobowajënaeya baupamuxuneneta, bajarapacuenia mera pecaetuatetabiabiwaxixaneto, bajarapacuenianua diez xuayobeje palanganajawanë pe-etsimesaxia yajawa. Nexata daxita bajarapabroncejawanë capona Babiloniajawabelia. 14 Bajarapacuenia capona daxitaxuanë canacuenebabiaba templobo-ënëta, broncenanitota pexanaejawanë, pacuenia ipumana pecaponabiabijawanë, pecajucabiabipalajawaxi-ata. Bajarapacuenia capona peca-itacaëbabiabijawanë lámparaxi, bajarapacuenia pecanacuenebabiabiwaxianë-ata. Daxitaxuanë exana broncenanitonëta bajarapabota pecanacuenebinexa, bajaraxuanë daxita capona. 15 Bajarapijinia pacuenia Nabuzaradán capona daxitaxuanë oronanitota pexanaejawanë, bajarapacuenia palatananitota pexanaejawanë-ata. Pawaxianë canacuenebabiaba pecaponaenexa iso-ita-ire incienso petajuitsijawanexa, bajarapacuenia itsawaxijawanë yajawa, daxita bajaraxuanë capona Babiloniajawabelia. 16 Daxita broncenanitota Salomón-pijinë pexanaejawanëmi Jehová pijatemplobonexa, pacuenia naesiturutobeje, mera pecaetuatsiwaxixaneto, diez xuayobeje palanganajawanë pe-etsimesaxi-ata. Bajarapamonae cajena daxita bajaraxuanë apocuenecaëjëpaetsi pecanaëjëbinexa piarewecuene pecaponaewajënaeya. 17 Caebroncenaesituruto canacujitsia apia ocho pametrobeje pematatsënëa. Bajarapacuenia bajaraponaebeje upixatatabeje athëbëyo itsajawa broncenanitota anijametrobeje pematatsënëa pexainaejawa athëbëabetsia. Bajarapamataxatatsijawa xainanua daxitamuxubërëa matatoyorotsia itsajawa pitabëtsijawa broncenanitota pexanaejawa. Bajarapa-itabëtsijawa exana granadacuaijumapecataeya. Bajaraponaebeje nexata daxitanaebeje najëpabeje.
Nabuzaradán capona Judá nacuapijiwimi Babilonia nacuajawabelia
18 Pecaponaenexa Judá nacuapijiwi petaicaewicuenia Riblá tomarajawabelia, Nabuzaradán, Babilonia nacuapijiwajabitsaëwi penamatacaitorobinë, itoroba pewaetabinexa Seraías, ponë sacerdotewi pepopenamatacaitorobinë tsaponaponae, bajarapacuenia-ata Sofonías, ponë peyajawanacuenebinë Seraías cotocaewi sacerdotenëcuenia, acueyabi ponëbeje-ata templobo pewetsiwi. 19 Bajarapacuenia waetaba ponë pewetsinë Jerusalén-pijiwajabitsaëwi, itsamonae-ata cinco ponëbeje peyajawanacuenebiwi pepopeyanacua-ewetsinë Sedequías peyanacua-ewetsiliwaisi pemuxujiobiwicuenia, bajarapacuenia ponë petaicaponaponaenë itsamonae Judá nacuapijiwajabitsaëwinexa, bajarapacuenia-ata itsamonae sesenta ponëbejeb bajarapatomarata pejinawanapaewi. 20 Daxita bajarapamonae petaicaecujinae, wajabitsaëwi penamatacaitorobinë, Nabuzaradán, nexata capona bajarapamonae Riblá tomarajawabelia, itsajota ponapona Babilonia nacua pewetsinë, Nabucodonosor. 21 Nexata bajarajota, Babilonia nacua pewetsinë itoroba pijajiwi wajabitsaëwi petobeyejebinexatsi bajarapamonae Riblájawata, Hamat nacuajawata pe-ecaetomarayo. Bajarapacuenia raja Judá nacuata pejinawanapaewimi caponatsi tajë pijanacuamiwecua.
Penacopabiwi Judá nacuata rëcëpa Egipto nacuajawabelia
22 Pecaponaecujinaetsi Judá nacua pepopeyanacua-ewetsinëmi Sedequías, nexata Nabucodonosor, Babilonia pepopeyanacua-ewetsinë, itapeta Judá nacuapijiwiyajuwënënë Gedalías-wënë peto-ewetsinënexa Judá nacuata gobernador-nëcuenia. Gedalías raja Ahicam pexënato, Safán pemomo. Bajaraponë tocopata penamatacaitorobinënexa tsaponaponae pamonae jinawanapa Judá nacuajawata penacopabiwi. 23 Nexata, itsa wënëtane bajaraxua, Judá nacuapijiwajabitsaëwi penamatacaitorobiwi pona Mispá tomarajawabelia, pebarëcuaicuaijainexa Gedalías gobernadornë. Pona Ismael, Netanías pexënato, bajarapacuenia Johanán, Carea pexënato, Seraías, Tanhumet pexënato, Netofa tomarapijinë, bajarapacuenia-ata Jaazanías, Maacateo nacuayopijinë pexënato. Bajarapamonae barëpata pijajiwi wajabitsaëwi. 24 Nexata Gedalías barënajumeliwaisicajunua bajarapamonaejawabelia, bajarapacuenia pijajiwi wajabitsaëwijawabelia-ata. Bajaraponë jumaitsi bajarapamonaejawabelia pecujunawiyaniwa pamonae caldeomonae pijajiwi wajabitsaëwi penamatacaitorobiwi. Muxujiobanua xaniawaetsia petonacuenebawanapaenexa Babilonia nacua pewetsinë. Jumaitsi:
—Itsa xaniawaetsia pajinawanapame mapanacuataje, bajarapacuenia itsa patonacuenebawanapame Babilonia nacua pepopeyanacua-ewetsinë, penacopabicaldeomonaenua mapanacuataje, nexata apopaca-itsacueniabitsi tsane. Jamatejemaya saya pajinawanapaename —jai Gedalías penajumeliwaisicajonejawata.
25 Itsiata baitsi jane, anijajuametobeje pepuapanepae penajumeliwaisicajonecujinae, siete juametota Nabucodonosor pepopeyanacua-ewetsinë penaexanaecujinae, bajarapajuametota Ismael tsimaxëpata pebeyaxuabinexa Gedalías. Ismael raja Netanías pexënato, pemomo Elisama, pepopeyanacua-ewetsinëmi Sedequías pijamonaeyajuwënënë. Nexata, bajaraponë yanabatsi diez ponëbeje. Nexata bajarapamonae daxita najuabeyaxuaba Gedalías, bajarapacuenia itsamonae caejamatabëcuene pexainaewi yajawa judíomonae-ata, caldeomonae-ata peyajawajinawanapaewimi Gedalías Mizpa tomarajawata. 26 Bajarapacuenia petobeyaxuabixae Babilonia nacua pepopeyanacua-ewetsinë pitapetsigobernadornë, nexata daxita Judá nacuata pejinawanapaejudíowi rëcëpa Egipto nacuajawabelia, pecujunawixae caldeomonae. Barëpona baja wajabitsaëwi penamatacaitorobiwi, daxitajiwi yajawa pamonae peyaiyataewitsi, bajarapacuenia daxita pamonae beweliajamatabëcuenewi-ata. 27-30 […]