Asiria nacua pewetsinë capona Israel nacuata pejinawanapaewi, Asiria nacuajawabelia
17
Acaz baja itsa xaina doce pawaibeje peyanacua-ewetsijawa Judá nacuapijiwi, bajarapamatacabi Oseas, Ela pexënato, taxuxuaba pijinia peyanacua-ewetsijawa Israel nacuapijiwi Samaria tomarata. Bajaraponë yanacua-ewetaponapona nueve pawaibeje Samaria tomarajawata. 2 Oseas daxita pexanaponaponaecuene Jehová pitabarata bitso tsitapibisiacuenetsi. Itsiata, papibisiacuene exanaponapona Oseas apocuenecaëjëpae bitso pitsipibisiacuene exanawanapa pamonaemi copiaya Israel nacuapijiwi pepopeyanacua-ewetsiwimi.3 Itsamatacabi, Salmanasar, Asiria nacua pepopeyanacua-ewetsinë, tsimaxëpata pebarënawajabitsaëtsinexa Oseas Israel nacua pepopeyanacua-ewetsinëjawabereca. Salmanasar pecuene-amoneyabixae Israel nacuapijiwi, nexata Oseas toyanacua-ewetaponapona petonacuenebaponaponaenëcuenia, bajarapacuenia matamotabiabanua impuestomatamo caewai canacujitsia. 4-6 Itsiata baitsi jane, Salmanasar belia yapëtane Oseas pewecuapitsapaejawanexa Asiria nacua pewetsinë peyanacua-ewetsijawatsi. Bajaraxua yapëtane tsipaji wënëliwaisitane bajaraponë pitorobijawa pijajiwi Sojawabelia, Egipto nacua pepopeyanacua-ewetsinë, pejamatabëcueneyanatsinexatsi pebarënawajabitsaëtsinexa Salmanasar-jawabelia. Copatanua pematamotaponaejawami impuestomatamo caewai canacujitsia, pacuenia picani exanabiaba. Nexata Asiria nacua pepopeyanacua-ewetsinë barëpata pijajiwi wajabitsaëwi Israel nacuayaberena. Pepatsicujinae Israel nacuajawata, barënawajabitsaëtapona daxita Israel nacuajawa pepatsijawabelia Samaria tomarajawaberena. Nexata, bajarapatomara matatoyorotsia nawajabitsaëtsiaya jinawanapa acueyabi pawaibejecuenia. Bajarapacuenia peya-ewetawanapaexae Asiria nacuapijiwajabitsaë, itsa baja xaina nueve pawaibeje Oseas peyanacua-ewetsijawa Israel nacuapijiwi, Asiria nacua pewetsinë pijajiwi wajabitsaëwi cuene-amoneyaba Samaria tomarapijiwimi. Nexata, Salmanasar itoroba pijajiwi wajabitsaëwi pewaetabinexatsi Oseas, penaneconitsia-exanaenexatsi. Nexata pecuene-amoneyabicujinaetsi, etatsi Oseas penaneconitsiwi pejebabiabibota. Nexata, daxita Israel nacuapijiwi caponatsi pijanacuamiwecua, pecaponaenexatsi pijanacuayabelia. Nexata, Asiria nacuata jinawanapaeya-exanatsi israelitawi Halah-jawata, Habor nacuata pe-ecaetomara, bajarapacuenia Gozán mene imoxoyojawata, medowiriawi pijatomaranëjawa.
7 Bajarapacuenia Israel-pijinë pemomoxi tocopiapatatsi, tsipaji pibisiacuene exana Jehová, pijaDioso pitabarata. BajaraPonë picani juta pijasalinaiwimi Egipto nacuawecua, Egipto nacua pewetsinë pesaëwecua pepitsapaenexanua, bajarapasalinaiwi pemomoxi juya pejinawanapaenexa Israel nacuata. Itsiata, bajarapamonae nawajëcabiaba asiwaya itsadiosowijawabelia Jehováwecua. 8 Picani pamonae Jehová wecuajuta Canaán nacuawecua pibisiacuene pexanawanapaexae, bajarapamonae nacuenejëpapona. Yapëtae-ata picani Jehová pewecuajutsicuenetsi bajarapanacuapijiwimi bajarapapibisiacuene pexanawanapaexae, juya perajutsinexatsi Israel-pijinë pemomoxijawabelia, itsiata bajarapamonae pecuenecowëya exanawanapa. Orijibia, papibisiacuene tocaëjëtatsi peyanacua-ewetsiwitsi pexanabiabinexa, bajarapacuenia Israel-pijinë pemomoxi exanawanapa, Jehová picani cuene-itawetsi-ata.
9 Bajarapamonaenua muetsiacuenia exanawanapa Jehová pijaDioso petonajumecopatsiliwaisitsiwecua. Bajaraxuata, tonacuenebapona jumapecataenëanë pijataxunaenënexa, caetomaranë canacujitsia petsutojumata, tomara peyacaranatsijawa pematatujawa-ata. Nexata, bajarapataxunaetabeje asiwaya nawajëcabiaba jumapecataenëanëjawabelia peyawenonaenexatsi. 10 Bajarapacuenia natonuba Asera jumapecataenë, itsawiria jumapecataenëanë-ata, daxitatsutonëjuma, pinijinaejawanëbëxëpana-ata. 11 Pacuenia exanabiaba pamonaemi Jehová wecuajuta bajarapanacuawecua, bajarapacuenia Israel-pijinë pemomoxi totajuitabiaba bajarapajumapecataenëanëjawabelia inciensonanijawanë, petsutonëjawa penubinëanëjawabelia-ata. Papibisiacuenejawanë exanawanapa copiayapijiwimi pejutsiwajënaeya, xua yabara Jehová bara-anaepanatsi, bajarapapibisiacuenejawanë Israel-pijinë pemomoxi exanawanapa. Nexata, bajarapamonae bajarapacueneta bitso anaeya-exanapona Jehová. 12 Orijibia, asiwaya nawajëcabiaba jumapecataeya pexanaenëanëjawabelia, ponëanë yabara picani Jehová tajëwelia cuene-itawetatsi ayaicuenia pexanaeyaniwa.
13 Bajarapacuenia pexanawanapaexae, Jehová muxujiobiaya tsiwajënaeyapëtaeya-exana pitsicuene be-exana, penacuenexanetsinexa bajarapamonae pejumepaebiwitsi pejamatabëcueneta, itsamonae-ata bemajitsinaebota pebarëcuaicuaijaiwitsi. Nexata bajarapajumepaebiwi cuene-itawetapona, bajarapitsicuene pexanaeyaniwa. Itorobanua bajarapamonae Jehovájawabelia penacuenepënëyorotsinexa daxita pibisiacuene pexanawanapaejawamiwecua, Dioso pitorobiliwaisianë jumecowënëtsiaya pejinawanapaenexa. Itorobanua pexanawanapaenexa daxita pacuenia bajaraPonë tonajumecopatatsi bajayata pijamonaemijawabelia. 14 Itsiata baitsi jane, bajarapamonae apojumecowënëtawanapae. Biji caranata, pewajënaeyabelia ajamatabëcuenetaja tsaponae pejumecowënëtsiyaniwa, pacuenia jamatabëcuene-itsi pijasalinaiwimi. Bajarapamonaemi aposiwanajamatabëcuenecopabi Jehovájawabelia peyawenonaenexatsi. Bajarapijinia pacuenia bajarapamonae-ata exana. 15 Daxita petonajumecopatsiliwaisianëtsi, pitawetsiliwaisianëtsi, pitorobiliwaisianëtsi-ata bajarapamonae beweliacuenia tane. Jehová penajumeliwaisicajonejawami bajarapamonaejawabelia pijaDiosonënexa, peyawenonabiabijawanexatsi, bajaraxua-ata natsiquejemaliwaisicuenia tane. Caranata saya, bajarapamonae jumapecataenëanëjawabelia siwanajamatabëcuenecopatabiaba, asiwaya pewajëcaponaenexa, ponëanëjawabelia piacuenematamobinëanë. Bajarapadiosonëanëjawabelia asiwaya penawajëcabiabixae, bajarapamonae Jehová pitabarata amatamobiaya jinawanapa. Baitsi, pacuenia bajarapanacuanëpijiwi, Israel nacua matatoyorotsia pejinawanapaewi, natsiquejemawicuenia jinawanapa Jehová pitabarata, bajarapijinia pacuenia Israel-pijinë pemomoxi jinawanapa. Jehová picani itaweta pexanaeyaniwa bajarapamonae pecuenecowëya. 16 Bajarapamonae Jehová pitawetsiliwaisi copaba-othopa. Nexata, exananuta anijanëbeje becerro jumapecataenëbeje, broncenanitota pexanaenëbeje. Exananubanua Asera jumapecataenëanë naejawanëta, asiwaya penawajëcaenexa bajaraxuanëjawabelia. Orijibia, pematabacabëta nawajëcabiabanua daxita tuluputonëjawabelia, juametobejejawabelia-ata. Nawajëcabiabanua Baal jumapecataeya pexanaenëanëjawabelia. 17 Bajarapajumapecataeya pexanaenëanëjawabelia bajarapamonae totajuitabiaba pexijiwixi altar-jumata. Ca-asaënua tsawanapae penajorobicuene, pe-ëjëbicuenenua pijacujirucuenia, peyapëtaenexa xua tocopiapatabiabijitsiatsi. Jumecowënëtabiabanua bolecuene. Bajarapamonae na-ewetabiabanua penacëbijawanëta, penayajiwicajinawanapaejawanëtanua.a Nexata, bajarapamonae bajarapacuenia exana pibisiacuene Jehová pitabarata. Bajarapacuenia itsa exanapona, bitso anaeya-exanapona Jehová.
18 Bajarapacuenia bajarapamonae pexanawanapaexae, Jehová nexata bara-anaepana ayaicuenia, daxita Israel nacuata pejinawanapaewijawabelia. Bajaraxuata, capitsapatsi pijanacuamiwecua, tajë pejinawanapaenexa Dioso pijatemplobowecua. Itsiata, pamonae Israel-pijinë pemomoxi, Judá nacuata pejinawanapaewi, bajarapamonae nacopaba abaxë pijanacuata. 19 Itsiata baitsi jane, Judá nacuapijiwi bajarapacuenia itaxutobejiobiatae-atatsi, bajarapamonae-ata apojumecowënëtawanapae paliwaisi Jehová pijaDioso tonajumecopatatsi. Saya catsitecawanapa papena-ewetsicuenejawanë Israel nacuapijiwimi exanawanapa pecapitsapaewajënaeyatsi pijanacuawecua. 20 Bajaraxuata, Jehová nawecuatsata daxita Israel-pijinëmi pemomoxi, Israel nacuata pejinawanapaewimi, Judá nacuata-ata pejinawanapaewi. Nexata, pijawajabitsaë bejiobia-exanaponatsi bajarapamonae. Tsicopatatsinua itsanacuanëpijiwi, peyacajërëbabiabiwi, bajarapamonaemi peyacajërëbinexatsi pexainaejawanëmi. Nexata, bajarapacuenia Jehová wecuacapitsapa pijanacuamiwecua, itsajota barëponaponatsi picani. 21 Pacujinae caenacuapijiwimi Israel nacuami Jehová tsata anijanacuapijiwibejenexa,b nexata wecuatsata caenë pemomoxibitsaëto David-pijinë pijamonae peyanacua-ewetsicuenenexa. Pamonae pijinia nacopata Israel-wënë nacuata nato-itapeta Jeroboam, Nabat pexënato, pepopeyanacua-ewetsinënexatsi. Bajaraponë matacapona Israel nacuata pejinawanapaewi saicaya Jehová petonajumecopatsiliwaisitsiwecua. Matacaponanua bitso pibisiacuene pexanawanapaenexa Jehová pitabarata. 22 Nexata, daxita papitsipibisiacuene exanaponapona Jeroboam, bajarapacuenecowëya exanawanapa Israel-pijinë pemomoxi, Israel nacuata pejinawanapaewi. Bajarapamonae apocopatawanapae bajarapapibisiacuene pexanaejawa. 23 Nexata baja, belia Jehová nawecuatsata bajarapanacuapijiwi pacuenia baja tajëwelia najumecapanepaeya picani yapëtaeya-exanatsi pamonae pejumepaebiwitsi pejamatabëcuene. Nexata, bajarapacuenia Israel nacuata pejinawanapaewimi caponatsi Asiria nacuayabelia, amoneya petonacuenebawanapaewinexa. Ajena pamatacabijawaberena-atac bajarapamonae jinawanapa bajarajota. 24 Bajarapacuenia Asiria nacua pepopeyanacua-ewetsinë, pewecuajutsicujinae Israel-pijinë pemomoxi pejinawanapaetomaranëwecua, patomaranë ena Samaria nacuata, bajaraponë capona bajarapatomaranëpijiwimi Asiria nacuajawabelia. Xuacujinae, juya capata itsamonae Babilonia nacuapijiwiyajuwënëwi Samaria nacuajawaberena pejinawanapaenexa Israel-pijinë pemomoxi pejinawanapaetomaranëmita. Capata baitsi itsamonae Cuta tomarapijiwimi, Ava nacuapijiwimi, Hamat tomarapijiwimi, itsamonae Sefarvaim tomarapijiwimi-ata. Nexata bajarajota, Asiria nacua pepopeyanacua-ewetsinë tocopata bajarapaBabilonia nacuapijiwimi pejinawanapaenexa Samaria nacuata, pape-enaetomaranëjawa Israel-pijinë pemomoxi copiayami jinawanapa. Bajarajota nexata, Babilonia nacuapijiwimi jinawanapa. 25-41 […]
C18—C24 […]