Josué barëcuene-amoneyaba nacua-ewetsinë Jabín, Hazor tomarapijiwimi
11
1-9 […] 10 Josué, Israel pemomoxi yajawa, pecuene-amoneyabicujinae cuatro patomarapijiwajabitsaëwibeje, bajaraxuacujinae nawiata Hazor tomarajawaberena, pebarënawajabitsaëtsinexa nacua-ewetsinë Jabín pijajiwi wajabitsaëwijawabelia. Bajaraponë Jabín pepopeyanacua-ewetsinë bajarapanacuapijiwimi Hazor tomarawerena, tsipaji bajarapatomara bitso penamatamotsitomara bajarapanacuapijiwiminexa. Nexata, Josué bajarapatomara pewetsinëmi beyaxuaba. 11 Bajarapacuenia werebiaba daxita bajarapatomarapijiwimi. Daxitaxuanëminua xaina bajarapatomarapijiwimi tobijiana. Bajaraxuacujinae, tajuita Hazor tomarami. 12 Bajarapacuenia Josué exanapona itsatomaranëpijiwijawabelia-ata, patomaranëpijiwimi naliwaisicajunua pepopeyanacua-ewetsinë Jabín-jawabelia. Nexata, tobepona bajarapatomaranë pewetsiwimi, bajarapacuenia pijinia pamonae jinawanapa bajarapatomaranëta. Nexata, pacuenia tonajumecopatatsi Moisés-pijinë Jehová pijajiwitonë pexanaenexa, bajarapacuenia Josué exanapona. 13 Itsiata baitsi jane, israelitawi apoyatajuitsi daxita patomaranë petsutonëjumata ena. Caetomara saya petsutojumata pe-ecaetomara tajuita, Hazor tomara. 14 Daxita bajarapatomaranëpijiwimi beyejeba espadanëta. Apocopatsi caejiwiyo-ata piasaëtsaponaponaenexa. Nexata, daxita bajarapamonaemi pexainaejawanëmi nota; pacuenia pijadajubi, daxitaxuanë-ata bajarajota xaina pecobecowëjawanëmi.Josué barëcuene-amoneyabanajetaruca Canaán nacuapijiwimi
15 Pacuenia Jehová copiaya itoroba pexanaenexa Moisés-pijinëjawabelia, nexata bajarapacuenia juya Moisés itoroba Josuéjawabelia. Nexata, Josué juya exanapona bajarapajumecowëya caeliwaisiyo-ata xenetsinejewa. 16 Nexata, Josué barëcuene-amoneyaba daxita pamonae jinawanapa bajarapanacuanëjawata, pija-iranëmi penotaponaenexa Israel-pijinë pemomoxi pijanacuanexa. Pita baja daxita petsutonacuanë, daxita Neguev nacuanë, daxita Gosén nacuanë,a bajarapacuenia daxita penamatajëpaetusatonë, pebobenae-iranë Jordán menemuxubërëa itsapanawelia, itsapanawerena-ata. 17-18 Bajarapacuenia pitanua pa-ira boca Halac-tsutojawaweliacujinae pepatsijawabelia Seir nacuajawabelia, Baal-gad tomarajawabelia, patomara eca Hermón-tsutomuxuneneta, Líbano nacuata pe-ecaetsuto. Daxita bajarapanacuanë Josué barënotapona bajayajebi pebarënawajabitsaëtsicujinae bajarapanacuanëpijiwijawabelia, matapania pecuene-amoneyabijawabelia. Nexata, Josué taicapona daxita bajarapanacuanë pepopeyanacua-ewetsiwi. Beyaxuabaponanua. 19 Daxita bajarapatomaranë yacajërëtapona pebarënawajabitsaëtsijawata bajarapatomarapijiwimijawabelia. Caetomarapijiwijawabelia-ata aponajumeliwaisicajone pitaxutotsoniataenexa. Caetomarapijiwi saya, Gabaón tomarapijiwi, heveowiriawi, itsiata israelitawi naliwaisicajunuab pebarënawajabitsaëtsiyaniwa. Nexata, pijatomara apowecuapitsi. 20 Itsiata, itsatomarapijiwijawabelia aponajumeliwaisicajone pewerebiabiyaniwa, tsipaji Jehová jamatabëcuene-atajaya-exana bajarapamonae, pitoyanexa israelitawi pebarënawajabitsaëtsinexa. Nexata, israelitawi bajarapacuenia werebiabanajetarubena bajarapamonaemi itaxutotsoniataenejewa, pacuenia baja Jehová tonajumecopatatsi Moisés-pijinëjawabelia.
21 Bajarapamatacabitanua Josué cuene-amoneyaba anaquitamonae, Anac-pijinë pemomoxi, Hebrón-tsutonëjawa pejinawanapaewimi, bajarapacuenia Debir tomarapijiwimi, Anab tomarapijiwimi, bajarapacuenia daxita pejinawanapaewimi patsutonëjawa Judá pemomoxi xaina pijataxunaebonë, bajarapacuenia patsutonëjawanua itsamonae Israel-pijinë pemomoxi xaina pijataxunaebonë. Daxita bajarapamonae anaquitawi pijatomaranëmi yajawawerebiaba. 22 Nexata, bajarapacuenia pebeyejebixae Anac-pijinë pemomoxi, aponacopatsi caejiwiyo-ata Israel-pijinë pemomoxi pejinawanapaenacuata. Itsiata baitsi jane, nacopata itsamonae Anac-pijinë pemomoxi Gaza tomarata, bajarapacuenia Gat tomarata, Asdod tomarata-ata. Bajarapamonae piapiawi pacuenia Anac-pijinë piapianëmi.
23 Nexata, bajarapacuenia Josué cuene-amoneyabanajetaruca daxita bajarapa-iranëjawa pejinawanapaewimi, pacuenia baja Jehová tonajumecopatatsi Moisés-pijinëjawaberena pexanaenexa. Bajaraxuacujinae jane baja, Josué tsicobetsana Israel-pijinë pemomoxi, caenë pexi pemomoxibitsaëto canacujitsia penacopataponaenexa pija-iratupayo Canaán nacuata. Bajaraxuacujinae baja, bajarapamonae aponawajabitsaëtsi bajarapanacuata. Nexata, jinawanapa jamatabëcuenexanepanaeya daxita bajarapanacuanëjawa.
C12—C23 […]