Dioso apoyawenonae israelitawi Acán pibisiacuene pexanaejamatabëcuene
7
Israelitawi apojumecowënëtsi Jehová pitorobicueniatsi, pepitsiyaniwa picani Jericópijiwimi pecobecowëyajuwënëjawa pecuene-amoneyabicujinae. Jehová xuanë tsata pewerebiabinexa, itsiata Acán pita bajaraxuayajuwënëjawa. Bajaraponë pexënato Carmi, Zabdi pemomo, pexënato Zera, Judápijinë pemomoxibitsaëtoyajuwënënë. Acán pepitsixae bajaraxua, Jehová bara-anaepana daxita Israel-pijinë pemomoxijawabelia.2 Bajarapamatacabijawa, Josué itoroba itsamonae pebijiwi, peya-enebinexa Hai tomarajawabelia. Bajarapatomara eca imoxoyowecua Bet-avén tomara, Betel tomarabejewecua pemutuabereca. Nexata, jumaitsi peya-enebiwinexajawabelia:
—Paponaename paneya-enebinexa ira, wajayapëtaenexa pajiwibitsaëtowajëto jinawanapa bajarapanacuajawa —jai Josué.
Nexata, bajarapamonae pona petaenexa pa-iranë bobena Hai tomara nacuajawa. 3 Bajarapamonae pepatsicujinae, peya-enebiwi jumaitsi Josuébanajawabelia:
—Apoxanepanae wajaponaejawa daxitatsi, tsipaji Hai tomarapijiwi tsiquiribitsaëtoyo. Pa-itorobianame saya peponaenexa dos mil, itsa jume, tres mil ponëbeje wajabitsaëwi, pebarënabewinexa —jai.
4 Nexata, bejamatabëcujiru tres mil ponëbeje pona, pebarënabenexa picani bajarapatomarapijiwijawabelia. Itsiata baitsi jane, israelitawimi cuene-amoneyabatsi Hai tomarapijiwi. 5 Bajarapamonae beyaxuaba treinta y seis ponëbeje israelitawimi. Pecajunawi israelitawi wecuarëcëpeca. Nexata, bajarapamonae pëbaraponatsi tomara baupajawaweliacujinae Sebarim-taxunaejawabelia.a Bajarajota, Hai tomarapijiwi capanepaeya cuene-amoneyaba israelitawi fotojawata. Bajarapacuenia israelitawi itsa natane, nexata jamatabëcuenejunawa. Jamatabëcuenefaefaenanua.
6 Pebarënawajabitsaëtsiwi pijataxunaejawabelia pepatsicujinae, tsipaeba pacuenia tocopiapatatsi. Nexata, Josué, daxita israelitawi pewetsiwi yajawa, pejumetaejawata, ayaicuenia pejamatabëcuenebëjaixae, penaxatatsijawanë mipatitica. Natsimata-othocaponanua atsabenojawanë. Nexata, pematabacabëta irataeya nubena Jehová penajumeliwaisixaniawaetsibaula pewajënaeya, caniwiyo-epatojawabelia.
7 Pewajëtsijawata, Josué jamatabëcuenebëjaiya jumaitsi Jehovájawabelia:
—Tajatuxanenëmë, Jehová, ¿Detsa xuajitsia panenicabia-exaname Jordán mene itsapanaberena, amorreomonae patanewerebiabinexa? Juya tsaena panecopatsipame patajinawanapaejawa bajarapaJordán mene itsapanawetsina. 8 Tajatuxanenë, ¿Detsa xanë jumaitsinë tsipae xamë yabara, itsa ajenaconoxae nijajiwi, israelitawi, cuene-amoneyabatsi pijawajabitsaë? 9 Bajaraxua yabara, daxita cananeomonae, daxita itsamonae-ata bajarapanacuata pejinawanapaewi, cawënëtaena apopecacuenecaëjëpaejawa nijajiwi neyawenonaenexa pecuene-amonaeyabiyaniwatsi pijawajabitsaë. Nexata, panetsimaxëpatsiana, matatoyorotsia pataneyacapatsinexa patanewerebiabijawabelia. ¿Detsa nexata xamë xua exanaename, bajarapacuenia pecawënëbejiobitsiyaniwa? —jai Josué.
10 Jehová nexata jumecanawiata Josuéjawabelia:
—¡Namatacore! ¿Detsa xuajitsia paxamë bajarapacuenia irataeya saya panubename, pibisiacuene pane-exanaejawa yajawa patanewajëcaenexamë? 11 Israelitawi raja pibisiacuene exana, tsipaji xanë aponejumecowënëtsi tanajumeliwaisicajonejawa bajarapamonaejawabelia, xua picani itawetajë Jericópijiwimi pecobecowë yabara. Xuanë xanë tsatajë pebijianaenexa tawënëta, bajaraxuayajuwënëjawa bajarapamonae nacobetoxota. Yapëtae-ata pibisiacuene pexanaejawa, itsiata yajawamatayaba pijajawanë. Orijibia, yajawanajumetsënëtanua. 12 Bajaraxuata, Israel-pijinë pemomoxi apocuenecaëjëpaetsi pecuenecaranatsijawa pijawajabitsaë. Saya nexata, wecuarëcëpeca. Bajarapamonae pibisiacuene pexanaexae, tocopatajë pijawajabitsaë pewerebiabinexatsi. Pacuenia xanë pacatocopatatsi panewerebiabinexa daxita Jericópijiwimi pecobecowëjawanëmi, bajarapacuenia pacatocaëjëtatsi panijawajabitsaë papecawerebiabinexa panenacobetoxotsijamatabëcuene xanë tatsatsijawanëmi panebijianaejawanexa. Nexata, xanë apopacayajawatsi tsane, itsa paxamë apopanawecuabijianaemë panenotsijawanëmi, xua xanë paca-itorobatsi panebijianaenexa. 13 Nexata, ponare nitorobinexa israelitawi penacuenexaniawaetsinexa. Jumaitsimëre: «Jehová wajaDioso raja pacajumaitsi mapacueniaje: ‘Panacuenexaniawaere, tsipaji baja merawia panubenaename xanë taitabarata, patacacuenecanaëjëtsinexa. Paxamëtuatuajëta itsanë xaina xua paca-itorobatsi picani panewerebiabinexa. Nexata, itsa apopanawecuaxuabimë tsane daxita xua bajaraponë pita, apopacacuenecaëjëpae tsane panecuene-amoneyabinexa panijawajabitsaë,’ pacajai raja Jehová», jamë tsane, —jai Jehová.
Icatsia, Jehová jumaitsi Josuéjawabelia:
14 —Merawia bajayacunua caenë pemomoxibitsaëto canacujitsia pijasalinainë pewënëta naitajëbaponaena taitabarata. Nexata, Jehovánë pacayapëtaeya-exanaenatsi papemomoxibitsaëtojawata ponapona penaneconitsinë. Bajarapamonae natixibiana pewajënaeyabetsia penubenaenexa. Natsanaeya nubenaena pijasalinainë pexi pewënëta, clan-cuenia.b Nexata, xanë pacayapëtaeya-exanaenatsi paclan-jawata nuca penaneconitsinë. Bajarapaclan-pijiwi natixibiana pewajënaeyabetsia, natsanaeya penubenaenexa pijamonae canacujitsia, pexi, pemomoxi yajawa. Nexata, bajarapamonaetuatuajëta pacayapëtaeya-exanaenatsi pabopijiwi pepocuene naneconita taitabarata. 15 Bajaraponëjawata, itsa pacaxitajarabame xua paca-itawetatsi panepitsiyaniwa, nexata bajaraponë, pijabopijiwi yajawa, patajuitsianame isotota, daxitaxua-ata xaina pecobecowë yajawa. Bajarapacuenia pabeyaxuabianame, tsipaji bajaraponë bitso pibisiacuenia paca-uraba paxamë pa-israelitawimë taitabarata. Apojumecowënëtsinua xua yabara pacanajumeliwaisicajunuatsi —jai Jehová Josuéjawabelia.
Acán naneconitsia-exanatsi israelitawi
16 Josué pepobajayacunua namatacota. Nexata, patsia-exanapona caenë pemomoxibitsaëto canacujitsia pijasalinainë pewënëta, penubenaenexa Dioso pitabarata. Bajarapaepatota, Dioso yapëtaeya-exana Judápijinë pemomoxibitsaëto penaneconitsijawa. 17 Bajarapabitsaëtojawata, yapëtaeya-exana Zera pijaclan-jawata penaneconitsijawa. Bajarapaclan-jawata pijinia yapëtaeya-exana Zabdi pijamonae penaneconitsijawa. 18 Bajaraxuacujinae, Zabdi nuca daxita pexi, pemomoxi yajawa. Nexata, caenë canacujitsia naitajëtapona Dioso pitabarata. Bajarapamonaetuatuajëta Dioso yapëtaeya-exana Acán penaneconitsinëcuene. Bajaraponë pexënato Carmi, pemomo Zabdi, Zerapijinë-ata.
19 Nexata, Josué jumaitsi Acán-jawabelia:
—Tajamonaenëmë, pexaniacuenia wënëxaniare Jehová, israelitawi pijaDioso, tanenawajunupaebijawatamë xua xamë exaname. Jumaitsimëre itsaliwaisi-ata nayawajunuxainaenejewamë —jai Josué.
20 Nexata, Acán jumecanawiata Josuéjawabelia:
—Pepacuene cajena xanë pibisiacuene exanajë Jehová pitabarata, israelitawi pijaDioso. Xanë bajarapacuenia exanajë. 21 Xanë taniji wajawecuanotsijawanëmijawata, pexaniajawa Babilonia nacuapijiwi penaxatatsimantonawa. Tanijinua doscientos ponëbeje palatanëanë, caelibra pijinia oronanijawa. Bitso itaxutuajinajë bajaraxuanë. Nexata, pitajë baja. Daxita bajaraxuanë matayatsia mëthëtajë tajacarpabojawata —jai Acán.
22 Nexata, Josué itoroba itsamonae, pejaitsinexa bajaraxuanë bajaraponë pijacarpabojawabelia. Bajarapamonae cujinaeyecalia, pejaitsinexa pijacarpabojawabelia. Pejaitsijawata, caxibajaraba jane baja Acán pejumaitsicuenia, pematayabajebijawanë xuanë methëcajeba. Bajaraxuanëbëxëpanajawata, bobena palatananijawanë, oronanijawanë-ata. 23 Nexata, bajarapamonae bajaraxuanë tocapona Josuéjawabelia, petsitajëtsinexa daxita israelitawi pitabarata. Bajarapacuenia bajaraxuanë jeba irata Jehová pitabarata.
24 Bajaraxuacujinae, Josué, daxita israelitawi yajawa, capona Acán, pemomo Zerapijinë, Acor-ira penamatajëpaejawabelia. Yajawacaponanua pepitsipalata, mantonawa, oronanijawa, pexi, pebijiwi, petiriwaxi-ata, daxita pijabueyu, pijaburro, pija-ovejabitsaëtonë-ata, pijacarpabo, daxita xua-ata xaina bajaraponë.
25 Bajarapatusatojawata pecapatsicujinae, Josué jumaitsi Acán-jawabelia:
—¿Detsa xuajitsia bajarapapiabejecuene paneto-exaname? Nexata, xamë juya Jehová piabejecuene cato-exanaena —jai Josué. Nexata, bajarapaepatota daxita israelitawi ibotonëta tsecona bajarapamonaemi, pijadajubi yajawa. Pebeyajebicujinae, bajarapamonae tajuita, daxita pecobecowë yajawa. 26 Petajuitsicujinaetsi, israelitawi pejumawereca najumajeba ibotonë, pecunua-ibotsuto pexanaenexa. Bajarapa-ibotsuto nuca ajena pamatacabijawaberena. Bajarapacuenia pexanaexae, Jehová jamatabëcuenecaewia-exana bitso pebara-anaepanaejawa israelitawijawabelia. Bajaraxuata, bajarapataxunae wënëruba Acor,c ajena pamatacabijawaberena.