Jehová raja ayaijamatabëcuenenë
11
Moisés jumaitsi Israel-pijinë pemomoxijawabelia:—Pa-asiwamëre tsawanapae Jehová panijaDioso. Caematacabi canacujitsia pajumecowënëtawanapaename daxita pitorobiliwaisianë, paliwaisianë-ata pematatsënëa pacatonajumecopata. 2 Panajamatabënapitabiabare Dioso papecayapëtaeya-exanaeliwaisi, bajarapaliwaisi panejumecowënëtawanapaenexa. Apojumaitsinë panexijawabelia, tsipaji abaxë bajarapamonae apoyapëtae Jehová, wajaDioso, pecuenexanetsijawatsi. Apotae-ata Dioso ayaijamatabëcuenenëcuene. Aponatoyapëtae Dioso pinijicuenesaëta pecapanepaejawatsi. 3 Bajarapamonae apotae papiayacuenejawanë Dioso tsitoroba daxita Egipto nacuapijiwijawabelia, peyanacua-ewetsinë faraón-jawabelia-ata. 4 Apotaenua Egipto nacuapijiwajabitsaë pijacaballuanë, pijacarrozamonë-ata pacuenia Dioso bubunaeya-exana Mar Rojo manuamenejawata pacujinae paxamë pacabarajina. Bajarapacuenia Dioso werebiaba daxita bajarapamonaemi. 5 Apotaenua Dioso daxita xua nacato-exana wajanaca-ewetsijawa, wajajinarutsijawata petsewinacuajawa. 6 Apotaenua pacuenia Dioso naneconitsia-exana Datán, Abiram-bejejawabelia, pexënatobeje Eliab, Rubén-pijinë pemomobeje. Nexata, apotae pacuenia Dioso israelitawi pijataxunaebotuatuajëta ira woconaeya-exana, pequijoninexa bajarapamonaemi, pijamonae-ata, daxita pijacarpabonë, pijadajubi-ata yajawa. 7 Panexi apotae-ata bajaraxuanë, paxamë itsiata pataneme papinijicuenejawanë Jehová pacatsita-exana. Bajaraxuata paxamë bepayapëtaneme Dioso ayaijamatabëcuenenëcuene, bepajumecowënëtawanapamenua bajaraPonë —jai Moisés.
Moisés icatsia muxujioba Israel-pijinë pemomoxi
8 Icatsia Moisés jumaitsi Israel-pijinë pemomoxijawabelia:
—Bajarapacuenia pajumecowënëtawanapaename daxita paliwaisianë xanë ajena pacatsipaebatsi, jamatejema pane-ajamatabëcuenesaënexa panejonenexa pa-irajawabelia, panawajabitsaëtsijitsiamë panecuene-amoneyabijawabelia. 9 Bajarapamonae panecuene-amoneyabicujinae, tsitecaeya pajumecowënëtawanapaename bajarapaliwaisianë, jamatejema bajayajebi panejinawanapaenexa panacuatalia Jehová najumecapanepaeya rajutsiapaeba panijasalinaiwimijawabelia, bajarapacuenia paxamë papemomoximëjawabelia-ata, bajarapacuenia panejinawanapaenexa panacuata capitsapabiaba nawitsiaya daxitawiria pexaejawacuene. 10 Panacua raja payabaranawajabitsaëtsijitsiamë panepitsinexa, apojëpae Egipto nacuapiji-iranëmi. Panacuawerena papitsapame, Egipto nacua, bitso petsewi-iranacua. Nexata, bajarajotalia pe-ubiwi petonaxaniabinexatsi, yabacatsicababiaba pacuenia ba-exana jiwi bo-imoxoyojawata pe-ubijawaxi. 11 Itsiata baitsi jane, panacuayabelia paponaejitsiamë panepitsinexa, bajarapacuenia apopa-exanaemë tsane. Bajarapanacua raja xaina petsutonë, petsutonëtuatuajëta pebobenae-iranë pexaniabëxëfoto-iranë-ata. Bajarapanacuata pijinia ema runabiaba daxitanacuajawa, piracainejebia-exanaenexa. 12 Bajarapa-ira raja Jehová panijaDioso pewetsi-ira. Nexata, caematacabi canacujitsia bajarapa-ira naitaxutuacaewetabiaba daxitawaijebi.
13 »Nexata, paxamë itsa xaniawaetsia pajumecowënëtawanapaename paliwaisi ajena pacatsipaebatsi, pane-asiwatsawanapaexae Jehová panijaDioso panejamatabë-ëthëtowetsina, daxita panejamatabëcuenewetsina-ata, bajarapacuenia yaiyataeya-ata itsa pato-exanawanapaename pejitsipaecuenia, 14 nexata bajaraPonë pacatocopatabiabiana pijamatacabianëjawata ema perunabiabinexa, copiayapiji-emanë, cotocaewipiji-emanë-ata, bajarapacuenia pijamatacabianëta paxamë panenotabiabinexa pane-ubijawanë trigo, bajarapacuenia uvacuai, panexainaponaenexa vinoranë, bajarapacuenia panenotsinexa olivocuai, aceiteranë-ata panexainaponaenexa. 15 Bajarapacuenia pacatonaxaniabia-exanaena wayafopijipo̱nacuene, xaniawaetsia papecatowitsabinexa panijadajubi, panexainaponaenexa ayaibitsaëtonë. Nawitsia paxainaenamenua pexaejawacuene panexaewanapaenexa. 16 ¡Xania baja tsane! ¡Panajamatabëxaniawaere! ¡Pëtsa panacopatame itsamonae papecayamaxë-itojorobijawa, itsajamatabëcuene panexainaeyaniwa Jehováwecua! ¡Pëtsa panajamatabëcuenetsatame Jehováwecua jumapecataenëanëjawabelia, bajarapacuenia panenajamatabëcuene-itajëtsinexa pane-asiwajawa panematabacabëta panenawajëcabiabijawata! ¡Pëtsanua yaiyataeya pato-exanawanapame pejitsipaecuenia, Jehová papecatonajumecopatsiliwaisiwecua, 17 tsipaji bajarapacuenia itsa pa-exanaejitsipame, Jehová pacabara-anaepanaejitsipa paxamëjawabelia! Nexata, bajaraPonë apopacato-itorobi tsipae ema perunaenexa. Ema piajibixae bajarapapexania-irami apopacatocapitsapae tsipae pecuai pane-ubijawanë. Belia jemata paxamë-ata pawecuatëpaejitsipame bajarapapexania-iranacuami, Jehová papecarajutsi-irami —jai Moisés israelitawijawabelia, pejumecowënëtawanapaenexa Dioso.
Pacuenia Israel-pijinë pemomoxi exanaejitsia penacofënëtsiyaniwa Dioso petonajumecopatsiliwaisitsi
18 Icatsia, Moisés israelitawijawabelia jumaitsi:
—Nexata, Jehová papecatonajumecopatsiliwaisianë panenacofënëtsiyaniwa, xaniawaetsia paxainawanapaename panejamatabë-ëthëtota, panejamatabëcuenetanua, jamatejema panenajamatabënapitaponaenexa. Bajarapaliwaisianë panatoyaquinarubianame tsiquiribaxutoxita, jamatejema bajaraxuanë panena-itapacëbabiabinexa,a bajarapijinia pacuenia panenacobecëbabiabinexanua. Nexata, panetaejawata panajamatabënapitabiabianame Jehová papecatonajumecopatsiliwaisianë. Nexata, daxitaxua panajamatabëxainame, xua-ata pa-exanabiabamenua, pato-exanabiabianame Jehová panejumecowënëtsicuenia. 19 Bajarapaliwaisianë pacujarubabiabianame panexijawabelia, paepatota pajinawanapame panijabonëjawata, paepatota namuto panenajetarubenaejawata, merawi panemajitsiwajënaeya-ata, bajarapacuenia bajayacunua panenaëcobicujinae-ata. 20 ¡Nexata, bajarapaliwaisianë panenacofënëtsiyaniwa, panijabonë naesiturutonëjawa payaquinarubare, bajarapacuenia baupajawa-ata! 21 Bajarapaliwaisianë itsa panejamatabëcueneta paxainawanapaename, bajarapacuenia panenajamatabënapitabiabixae, nexata paxamë, panexi-ata bajayajebi pajinawanapaename panacuajawata Jehová panijaDioso najumecapanepaeya rajutsiapaeba panijasalinaiwimijawabelia. Paepatowajëto abaxë daxita mapanacuaje tsitecanucaena, nexata bajarapamatacabiwajëto paxamë panemomoxi-ata tsaponae pajinawanapaename papecarajutsinacuata.
22 »Itsa pepacuene xaniajaiya pa-exanawanapaename papeca-itorobiliwaisianë ajena paliwaisianë pacatsipaebatsi panejumecowënëtsinexa, itsa pijinia pa-asiwamë tsane Jehová panijaDioso, itsa caejamatabëcuenenua paxainaename bajaraponë panepënanajetarubenaenexa, xaniawaetsia papeca-itorobicuenia paneto-exanawanapaenexa, 23 nexata Jehová pacawecuacapitsapaena pejinawanapaewimi bajarapanacuata. Nexata, jamatejema papitsianame bajarapamonae pijanacuanëmi, bajarapamonae picani ayaibitsaëto-ata paxamëwecua, piacuenesaëwimi-ata. 24 Itsaxuayo paxamë panajetarubenaename, nexata panecowëjawa bajaraxuayo panija-ira tsanajetarucae tsane. Bajarapa-iranacua taxuxuabiana piapiajawa Cades-barnea tomara pebocaetusatojawata, pepatsinexa Líbano nacuajawabelia. Epatajërëtsialia pijinia taxuxuabiana Éufrates menejawata, juameto pepitsapaejawawetsina pebocae-ira, pepatsinexa Mediterráneo manuamenejawabetsia. 25 Itsajiwiyo-ata apocuenecaëjëpaetsi tsane papecayacaranatsijawa pija-irami panewecuapitsiyaniwa. Jehová Dioso pacatocopatsiana bajarapanacuanëpijiwi papecacujunawinexa paxamë. Nexata, panacuanëjawa panajetarubenaename, bajarapanacuanëpijiwi pacacujunawiana papecajumaitsicowëya najumecapanepaeya.
26 »¡Panejumetaema! Anijacuenebeje pacatsipaebatsi panenato-itapetsinexa ajena panetaeyabiabijawanexa; caejawa pexaniacuenia Jehová papecayawenonabiabijawanexa, itsajawa pijinia pibisiacuene papecatocopiapatabiabijawanexa. 27 Pexaniacuene itsa jamatabëpataewanapame, pajumecowënëtawanapaename papeca-itorobiliwaisi xua ajena pacatsipaebatsi. Nexata juya, Jehová, panijaDioso, pexaniacuenia pacayawenonabiabiana. 28 Pibisiacuene itsa jamatabëpataewanapame, apopajumecowënëtawanapaemë tsane paliwaisianë ajena pacatsipaebatsi. Itsa pijinia pawecuanatsanaename pepoDiosowecua, panepënaponaenexa itsawiriadiosonëanëjawabelia panenawajëcabiabinexa, nexata Dioso pexaniacuenia apopacayawenonae tsane. Pacatocopatsiana pibisiacuene panetaewanapaenexa panenaneconitsiwicuenia —jai Moisés Israel-pijinë pemomoxijawabelia. 29-32 […]
C12—C17 […]