Dioso itaweta jiwi penawajëcaeyaniwa itsacuenejawabelia bajaraPonëwecua
—Pamatacabi Jehová pacabarëcuaicuaijai paxamë Horeb-tsutojawawetsica, bajarajota pacabarëcuaicuaijai pecotiajawawerena. ¡Apopataemë paxamë itsacuenejumape-ata bajarapaepatota! Nexata, apopayapëtaemë Jehová pitsijumapecuene xaina. ¡Bajaraxuata, xaniawaetsia panajamatabëcuene-ewere mapacuenejawanëwecuaje, ayaineconi panexainaeyaniwa! 16-18 ¡Pëtsa paxamë panajamatabëcuenebijianame pane-exanaejawata itsawiriajumapecataenëanë, asiwaya panesiwanajamatabëcuenecopababiabinexa bajaraxuanëjawabelia, papecayawenonaenexa! ¡Pëtsa jumapecataeya pa-exanabiabame pebijiwijumapecataenëcuenia, petiriwajumapecataewacuenia-ata, bajarapacuenia pamonae jinawanapa matatsënëwereca, pepunaewi, pecotobëxëta pejinawanapaewi, menepijidujuai-ata! 19 ¡Pamatacabi panaëcotame athëbëabetsia, itsa pataneme matacabipijijuameto, merawipijijuameto, tulupu-ata, daxitaxuanë itaboxotatsia perubenaejawanë,a pëtsa bajaraxuanëta panajamatabëcueneyamaxë-itojorobame, bajaraxuanëjawa belia panenawajëcaenexa, panesiwanajamatabëcuenecopatsixae, tsipaji bajaraxuanë Jehová Dioso pecobecowë! To-exananua bajaraxuanë daxitajiwi mapanacuataje pejinawanapaewi peto-itayotsinexa 20 Pacuenia hierronani pecanacuenebinë bitso piatajuyaihornojawawerena bajuta piatajuhierronanijawa, jamatejema pexanaenexa pejitsipaecuenia xua jamatabë-exana, bajarapijinia pacuenia, paxamë Jehová pacajutanua Egipto nacuawecua, bajarapamonae bitso ayaicuenia papecabejiobia-exanaecujinae, penatojitsipaecuenia pijajiwi papeca-exanaenexa saicaya daxitawiriawiwecua.
21 »Itsiata, Jehová nebara-anaepana xanëjawaberena paxamë panejamatabëcuene. Nexata, najumecapanepaeya pepacuene aponetocopatsi tanicabijawanexa Jordán-mene itsapanabelia. Aponetocopatsinua tajonejawa papexanianacuajawabelia Jehová Dioso pacarajutsiapaeba, panecanacopataponae-iranexa. 22 Bajaraxuata, xanë tëpaejitsianë mapanacuataje Jordán-mene nicabinejewanë. ¡Paxamë itsiata panicabiaremelia bajarapapexania-irajawabelia, panepitsinexa bajarapanacua panija-iranexa! 23 ¡Nexata, xania baja tsane! ¡Bajaraxuata, pajamatabënajinawanapare! ¡Pëtsa panacofënëtame papecanajumeliwaisicajonejawa bajaraPonë, pane-exanaeyaniwa jumapecataenëanë! Jehová Dioso bitso papecacuene-asiwanë, asiwaya panenawajëcaeyaniwa itsawiriadiosowijawabelia. ¡Pëtsa baitsi pa-exaname itsacuenewiriajumapecataenë asiwaya panenawajëcaenexa bajaraponëjawabelia, pacuenia Jehová Dioso pacacuene-itaweta, 24 tsipaji itsa pa-exanaejitsipame papeca-itawetsijawa, Jehová Dioso pacawerebiabijitsipa! Pacuenia isotoxaneto baweriajawanajetaruca daxitaxua nubena pewajënaeya, bajarapacuenia Jehová Dioso pecuene-itsinë. Wajanacacuene-asiwanënua daxita pibisiacuene waja-exanaeyaniwa —jai Moisés Israel-pijinë pemomoxijawabelia. 25-31 […]
Dioso raja ayaijamatabëcuenenë daxitawecua
32 Icatsia, Moisés jumaitsi Israel-pijinë pemomoxijawabelia:
—Xaniawaetsia paneyapëtaenexa itsa Dioso bajarapitsipinijicuenejawanë to-exana itsamonaejawabelia pacuenia pacato-exana paxamë, payanijobianame daxitanacuanëjawa pejinawanapaewi. Payanijobianamenua bajayapijicuene peyapëtaewi, Dioso jiwi pexanaejawaweliacujinae. Payanijobi-atamë tsane apopawënëtaemë tsane. ¿Jica, itsamonae paxamëwecua meta to-exanatsi bajarapitsipinijicuenejawanë? ¿Itsamonae meta wënëtane Dioso peto-exanaejawa bajarapacuenia itsamonaejawabelia paxamëwecua? 33 ¿Jica, itsamonaejawabelia Dioso meta barëcuaicuaijaitsi pecotiajawawerena bajarapamonae tëpaenejewa? 34 Jica, ¿Bajayata meta Dioso nato-itapeta itsawiriawi daxitajiwiwecua pijajiwinexa, pacuenia paxamë Dioso paca-itapeta? ¿Bajayata meta itsawiriadiosonë tsitajëta bitso piacuenesaënëcuene, pacuenia Jehová panijaDioso tsitajëta Egipto nacuapijiwijawabelia papecacapanepaejawata? Pacanaëjëre: bajaraPonë pacayapëtaeya-exana pinijicuenesaë pexainaenëcuene pacujinae tsita-exana pinijicuenejawanë, piayaicuenejawanë-ata. Pacajamatabëcuene-ëjëba papecajamatabëcueneyapëtaenexa, piacuenesaënëcuenia papecayapijiwinawajabitsaëtsijawata, bajarapacuenia pepopecujunawijawanë-ata petsita-exanaejawata. Pacuenia Jehová Dioso pacato-exana, ¿bajarapacuenia meta itsa diosonë exana? ¡Jume cajena! 35 Daxita bajaraxuanë Jehová Dioso pacatsita-exana paxamë panecueneyapëtaenexa Jehová pepoDiosonëcuene papecajutsijawata Egipto nacuapijiwiwecua. Ajibi itsadiosonë pecuenejëpaenëtsi pepoDiosowecua. 36 Nexata, bajaraPonë athëbëwetsica pacabarëcuaicuaijai, panejumetaenexa papecacuenexanebijawata. Bajarapacuenia irajawatatsica pijinia, pacatsitanaitajëta pecunuacotiajawawerena papecabarëcuaicuaijaijawata. 37 BajaraPonë bitso asiwa panijasalinaiwimi. Nexata bajaraxuata, paca-itapeta papijajiwinexamë. Pijacuata pacajutanua bajarapamonae papemomoxixaemë tsaponaerena, papecacapanepaenexa pinijicuenesaë petsitajëtsijawata Egipto nacuapijiwimi pecuene-amoneyabijawata. 38 Canaán nacuata jinawanapa itsamonae ayaibitsaëto paxamëwecua. Bitso pecuene-aitatsacawinua. Itsiata baitsi jane, bajarapamonae Jehová Dioso pacatsiwajënaecapitsapanajetarucaena, panepitaponaenexa bajarapamonae pijanacuanëmi, panecanacopataponaenexa panija-iracuenia. Bajarapacuenia panemomoxi-ata juya canacopataponaena pewajënaeyabelia, pacuenia baja ajena canacopata itsamonae paxamëyajuwënëwi.b
39 »¡Bajaraxuata, xaniawaetsia panejamatabë-ëthëtota pacanaëjëtawanapare panewajënaeyabelia paneyapëtaenexa Jehová Diosonëcuene, caenë pepoDiosonë tsaponaponaecuene-ata! Ajibi itsaDiosonë bajaraPonëwecua pacuenia bajaraponë cuene-itsi, tsipaji bajaraPonë itaboxojawatatsia, irajawatatsica-ata Dioso tsaponaponae. 40 ¡Nexata jane baja, pa-exanawanapare daxitaxuanë papecatonajumecopatsiliwaisianë, bajarapacuenia papeca-itorobiliwaisianë-ata, xua xanë ajena pacayapëtaeya-exanatsi panejumecowënëtawanapaenexa! Bajarapacuenia itsa pajumecowënëtawanapaename, nexata xaniawaetsia pajinawanapaename bajayajebi papecarajutsi-irajawata, panacuata Jehová panijaDioso pacarajutsijitsia daxitamatacabijawabelianexa. Bajarapacuenia panemomoxi-ata jinawanapaena bajayajebi bajarapanacuata —jai Moisés Israel-pijinë pemomoxijawabelia. 41-49 […]
C5—C8 […]