Israel-pijinë pemomoxi nawajabitsaëta Madianitawijawabelia
31
Jehová nexata jumaitsi Moisés-jawabelia mapacueniaje:2 —Xamë netëpaewajënaeya,a itorobianame Israel-pijinë pemomoxi petsimaxëponaenexa madianitawi penayamatamotsinexab peyamaxë-itojorobijamatabëcuenetsi. Bajarapamonae yamaxë-itojorobatsic xanëwecua, asiwaya penawajëcabiabinexa jumapecataeya pexanaenëjawabelia. Bajarapacuenia nebarë-exanaecujinae, xamë jane baja tëpaename —jai Jehová.
3 Nexata Moisés jumaitsi Israel-pijinë pemomoxijawabelia:
—Pa-itapetsianame itsamonae paxamëyajuwënëwi, pebijiwi, petsimaxëponaenexa madianitawijawabelia. Bajarapamonae benota, pecaponaenexa pecanawajabitsaëtsijawanë, pewerebiabinexa madianitawi Jehová pewënëta. 4 Itorobiana mil ponëbeje caenë pemomoxibitsaëto canacujitsia —jai Moisés.
5 Nexata jane baja, caenë pemomoxibitsaëtod canacujitsia itapetapona mil ponëbeje pijamonae wajabitsaëtuatuajëta. Nexata, daxitata namata-ëjëta doce mil ponëbeje panawajabitsaëtsiwinexa. 6 Bajarapamonae Moisés itoroba pebarënajawabitsaëtsinexa madianitawijawabelia. Itoroba mil ponëbejetsaponae caenë pemomoxibitsaëto canacujitsia pitapetsiwi. Bajarapamonae yajawa, napona Finees, sacerdotenë Eleazar pexënato. Bajaraponë capona xuanë sacerdotewi canacuenebabiaba Dioso pijacarpaboxanetota, caponanua trompetajawanë. Bajarapatrompeta obijitsia, peyapëtaeya-exanaenexa Israel-pijinë pemomoxi paepatota tsimaxëpatsijitsia madianitawijawabelia.
7 Nexata jane baja, pepatsijawata barënawajabitsaëta madianitawijawabelia, pacuenia Jehová tonajumecopata Moisés-jawabelia. Werebiaba daxita pebijiwi. 8 Beyaxuabanua cinco ponëmibeje Madian nacua peyanacua-ewetsiwi; Evi, Requem, Zur, Hur, Reba-ata. Orijibia yajawabeyaxuaba espadata Balaam, Beor pexënato. 9 Itsiata, apowerebiabi petiriawi. Capona petaicaewicuenia, pexi yajawa. Notanua daxita pijadajubi, vaca, oveja, chivomonae-ata. Notaponanua daxita madianitawi pecobecowë penamatamotsijawanë. 10 Bajaraxuanë penotsicujinae, tajuita daxita bajarapamonae pijatomaranë, pijacarpabonë-ata. 11 Petajuitsicujinae, daxitaxuanë nota caetuata jane baja, jiwi-ata petaicaewi, dajubi-ata. 12 Bajaraxuanë pecaetuatsicujinae, capona jane baja Moisés, sacerdote Eleazar, daxita Israel-pijinë pemomoxijawabelia. Bajarapamonae bajarapamatacabita, xaina pijataxunaebo, Jordán mene-itapata, pe-iranamatajëpaejawata Moab nacuata, Jericó tomara payenepanawelia eca.
13 Imoxoyo baja pepuanajetarubenae, Moisés, sacerdote Eleazar, daxita pamonae pewetsiwi Israel-pijinë pemomoxituatuajëta, pitsapa pijataxunaebowecua pemata-enenaenexa penawiabanajetarubenaewi panawajabitsaëtsicujinae. 14 Moisés bitso bara-anaepana wajabitsaë pewetsiwijawabelia, penawiabanajetarubenaewi penawajabitsaëtsicujinae. 15 Nexata jumaitsi bajarapamonaejawabelia:
—¿Detsa xuajitsia apopabemë petiriawi? ¡Pacanajetarubename piasaëwi! 16 Bajarapapetiriawi raja, Balaam pemuxubijiapenetsicuenia, pacajitsipaeya-exana panenawajëcaenexa Jehováwecua, Baal-peor jumapecataya pexanaenëjawabelia. Bajarapacuenia panenawajëcaexae bajarapajumapecataenëjawabelia, Jehová pacatsi-itoroba paneyatëpaedomaenexa. 17 Bajaraxuata, aeconoxae pabeyaxuabaponaename, daxita pebinëxi, daxita petiriawi-ata, powaxi baja pibisiacuene pewitota exana pebijiwijawabelia. 18 Pacopatsianame saya piasaënexa powaxi, pepopejanawi, pebijawabelia abaxë apopenaperabëquenetsiataewaxi.
19 »Paxamë pijinia pamonae panebewi panenawajabitsaëtsijawata, panejayabiwinua petëpaewi, panacopatsianame wajataxunaebopënëyabelia siete pamatacabibeje. Penawecua-ajibiaya-exanaename bepenaxuirabicuenemie acueyabimatacabita, bajarapacuenia sietepamatacabita-ata. 20 Nexata, panenawecua-ajibia-exanaenexa panenaxuirabicuenemi, paquiatsianame daxita panenaxatabijawanë, xuanë-ata pexanaejawanë dajubibocotota, chivona̱ta, naejawanëtanua —jai Moisés bajarapamonaejawabelia. 21-54 […]
C32—C36 […]