Israel-pijinë pemomoxi penamata-ëjëtsijawa, petsewinacuata pejinawanapaecuenenua
Nazareocuenejawabelia penacajonejawa yabara peliwaisi
6
Jehová jumaitsi Moisés-jawabelia:2 —¡Jumaitsimëre israelitamonaejawabelia mapacueniaje: «Pajiwiyo jamatabënacajunua nazareocuenejawabelia, pebi, petiriwa-ata, natsatsiaya peponaponaenexa ëxanë Jehovánë taitabarata, bajarapajiwiyo exanaena mapacueniaje! 3 Apobi-apae vinora, bajarapacuenianua daxita poranë capitsapa piatanejawa, bajarapacuenia piajatu-uvacuaira, vinagrewënëra,a itsawiria piajatuvinagrera-ata. Bajarapacuenia apobexae uvacuai peyabarëmeniajawa, bajarapacuenia icotiata petsewia-exanae-uvacuainë.b 4 Paepatowajëto abaxë nazareocuenia ponaponaena najumecapanepaeya penaliwaisicajonecujinae, nexata bajarapajiwiyo apobexae caejawayo-ata pecapitsapaejawa uvamacanaejawawerena. 5 Bajarapacuenia-ata abaxë bajarapamatacabianëjawa apobenamatana̱caucubi. Paepatowajëto abaxë apoweretsi nazareocuenia penacajonejawa xanë Jehovánëjawaberena, saya becopata pematana̱witsabaponaenexa peweretsijawabelia penatocaëjëtsimatacabianënexa. Nexata, bajarapacuenia natsatsiaya beponapona Jehovánëjawaberena penaliwaisicajonecuenia. 6 Paepatowajëto abaxë ponapona nazareocuenia, bajarapajiwiyo apobi-imoxoyotsi petëpaejiwiyo, 7 totëpae-atatsi pijamonaejiwiyo, paxa, pena, pematapijiwi, pejuyapijiwi-ata. Nexata, apobi-imoxoyotsi, penacopatsiyaniwa bepenaxuirabinë taitabarata. Nexata, bajarapajiwiyo tsicarucatsi penajamatabëcuenexaniawaetaponaponaenexa xanë, Jehovánë, taitabarata. Bajarapanatsatsicuenia peponaponaejawa Diosojawabelia najamatabëcuene-itajëtabiaba pematana̱witsabaponaejawata. 8 Nexata, bajarapajiwiyo daxita paepatowajëto abaxë ponapona nazareocuenia najumecapanepaeya tanenaliwaisicajonecujinae Jehovánëjawaberena, bajarapajiwiyo nexata nawecuatsatsiaya beponapona daxitaxua bepenaxuirabia-exanaejawawecua, daxita pibisiacuene pexanaejawawecua-ata, penajamatabëcuene-itajëtsinexa penacuenetsatsijawa xanëjawaberena nazareocuenejawalia penacajonejamatabëcuene,» ¡jamëre! —jai Jehová.
9 Orijibia Jehová jumaitsi nazareocuenia peponaponaejiwiyo yabara:
—Pajiwiyo nazareocuenia peponaponaejawata taitabarata, itsa jemata itsajiwiyo tëpa pecanacujitsita, nexata bajarapajiwiyo baja nacopata bepenamatana̱xuirabijiwi, pejamatabëcuene-itajëtsina̱mi natsatsiaya peponaponaejawa xanë Jehovánëjawaberena taitabarata. Nexata, beponapona siete pamatacabibejecuenia bepenaxuirabinëcuenia petaenëtsi, pacuenia picani pacatocaëjëtatsi papecatowerewerecaenexa bepanenaxuirabicuenemi. Bajaraxuacujinae, sietematacabita namatasibiana. 10 Bajaraxuacujinae pijinia, ocho matacabita tocaponaena tajacarpabo peyacaranatsipanapijibaupajawabelia anija-ucucutobeje tsiquiriwirianëyobeje, itsa jume, pinijiwirianëbeje, perajutsinexa sacerdotenëjawabelia. 11 Nexata, sacerdotenë altar-jumata totajuitsiana caenëyo, pewecua-ajibia-exanaenexatsi bepenaxuirabijawami petëpaenë pejamatabëcuene. Itsanëyo pijinia daxitanëyo totajuitsiana, tanejamatabëcuenecaewia-exanaenexa pijaneconimi. Nexata, bajarapacuenia bajarapajiwiyo petotajuitsicujinaetsi, itaxutuajamatabëcuenecaewianajë bajarapanaxuirabicuenemiwecua. Nexata, bajarapamatacabita pejanacuenia taxuxuabijitsia icatsia pijanazareocuene. Icatsia taxuxuabiana penamatana̱witsabia-exanaenexa. 12 Nexata, pamatacabibejewajëto picani copiaya natocaëjëta nazareocuenia peponaponaenexa, bajarapamatacabibejewajëto icatsia beponapona pejanacuenia. Baitsi, pamatacabianëwajëto ponapona nazareocuenia bepenaxuirabijiwiyo penaexanaewajënaeya to-amatamobitsi baja. Nexata, petowerewerecaecujinaetsi cotocaewi penajumeliwaisicaëjëtsijawa pejanacuenia xanë Jehovánëjawaberena, bajarapaepatota caponaena oveja pebito petajuitsinexa xanëjawaberena tasiwajamatabëcuenecaewinexa pijaneconimiwecua. Bajaraponëyo abaxë caewai pexainaenëyo.
13 »Pajiwiyo towerewerecatsi nazareocuene penacajonejawami, nexata exanaena mapaliwaisicueniaje. Itsa baja, towerewerecatsi penatocaëjëtsijawa nazareonëcuenia peponaponaejawa, nexata bajarapajiwiyo naitajëtsiana pijadajubibeje yajawa tajacarpabopanabo peyacaranatsipanapijibaupajawabelia. 14 Capatsiana caenë oveja, pejananë pebito caewai pexainaenë, daxitanë peperabëxanepanaenë, daxitanë petajuitsinexa altar-jumata ofrendacuenia. Capatsiananua caenë oveja pejananë pesorowato, daxitanë peperabëxanepanaenë, sacerdotenë petotajuitsinexatsi pijaneconi yabara. Bajarapacuenia capatsiananua caenë oveja pebito, penaweretsinë, daxitanë peperabëxanepanaenë, petajuitsinexa penasitsijawanë caejamatabëcuene patanajuaxainaexae namata-enetsia, tasiwajamatabëcuenecaewixae pijaneconimi. 15 Bajarapacuenia capatsiana tanerajutsinexa caemapire pejejawa pan, pexanaejawanë bitso pexaniawiriatrigobenota levadurajawa matajërëabinejewa, olivocuaipiji-aceitera peyajawamatajërëabimatabë pexanaepan. Bajarapacuenianua capatsiana pitafacaecarëcarënaepan pexanaejawa levadura matajërëabinejewa, petsimatatsicabijawa olivocuaipiji-aceiterata. Bajarapacuenia yajawacapatsiana pesebitrigoxu taneyajawarajutsinexa ofrendacuenia. Bajarapacuenia capatsiana vinora-ata pe-epanaxuabiranexa taitabarata ofrendacuenia. 16 Nexata, sacerdotenë daxita bajaraxuanë nerajutsiana xanë Jehovánëjawaberena. Tanerajutsijawata, totajuitsiana padajubi capata ofrendacuenia, bajarapacuenia padajubi capata petotajuitsinexa daxitanë pijaneconimijamatabëcuene. 17 Bajaraxuacujinae, sacerdotenë totajuitsiana penaweretsi-oveja pebito penasitsijawanë caejamatabëcuene patanajuaxainaexae namata-enetsia tasiwajamatabëcuenecaewixae pijaneconimi. Bajarapanasitsijawanë yajawatotajuitsiana pamapire pan-yajuwënëjawa capata, pexanaejawanë levaduranejewa. Nexata, ofrendacuenia tanerajutsinexa, vinora epanaxuabiana irajawabelia. Bajarapacuenia pesebitrigoxu totajuitsiana. 18 Nexata, nazareocuenia peponaponaenëmi, pamatana̱ta najamatabëcuene-itajëtabiaba Jehovánëjawaberena natsatsiaya peponaponaejawa, bajarapamatana̱mi namatabococasibiana tajacarpabo peyacaranatsipana pejonebaupa canacujitsita. Nexata, bajaraponë penamatasibina̱mi xuabiana isotojawabelia, pa-isotota tajuita dajubi penasitsijawanë, penajamatabëcuene-itajëtsinexa tajamatabëcuenecaewijawa pijaneconimi. 19 Bajaraxuacujinae, sacerdotenë pitsiana bajarapa-oveja pecofeferewijawa pesetsijawa. Bajarapacuenia pitsiananua caepan, levadura matajërëabinejewa pexanaepan, xua capata mapireta, bajarapacuenia caepan-ata, pitafacaecarëcarënaejawa levaduranejewa pexanaejawa. Nexata, bajaraxuanë rajutsianatsi nazareocuenia peponaponaenëmijawabelia, penamatacasibicujinae. 20 Bajaraxuacujinae, sacerdotenë yobajarabiana pemipabëpana, petopa, xuanë-ata sacerdotewi pijajawanënexa nerajutsiaya Jehovánë. Nexata, xuanë yobajarabiaya nerajuta, bajaraxuanë canacopatsiana ësacerdotenë pexaenexa. Bajaraxuayajuwënëjawa apobenaxae nazareocuenia peponaponaenëmi. Matapania, bajarapacuenia pexanaecujinae, toxanepanatsi nazareocuenia peponaponaenëmi icatsia vinora piapaenexa, bajarapacuenia daxitaxuanë uvamacanaeyajuwënëjawata pexanaejawanë.
21 »Daxita mapaliwaisianëje pacatonajumecopatatsi, pamonae nazareocuenia penacajonewi pexanaenexa bajarapacuenia itsa towerewerecatsi penatocaëjëtsimatacabianë. Nexata, pacuenia najumeliwaisicajunua pexanaenexa, ëbajarapacuenia toxanepanaenatsi pexanaenexa. Bajarapijinia pacuenia petowerewerecaematacabitsi nazareocuene becapata dajubimonae, patacatonajumecopatsiliwaisicuenia pexanaenexa. Pajiwi pijinia pematatsënëa jamatabëcapata tanerajutsinexa ofrendacuenia itsajawa patacatocaëjëtsijawawecua, itsa cuenecaëjëpatsi, apo-itsacuene —jai Jehová Moisés-jawabelia nazareocuenia penajumeliwaisicajonewi pexanaecuene yabara.
Pacuenia sacerdotewi cuene-itajëtsijitsia Dioso pexaniacuenia peyawenonaenexa jiwi
22 Jehová icatsia bajaraxuacujinae jumaitsi Moisés-jawabelia mapacueniaje:
23 —Tsipaebianame Aarón-jawabelia, pexi sacerdotewijawabelia-ata, bajarapamonae peyapëtaenexa pacuenia exanaejitsia pacujinae yapëtaeya-exanaejitsia israelitawi pexaniacuenia tayawenonaenexa. Jumaitsi tsane pexaniacuene peyapëtaeya-exanaejawata tawënëta: 24 «Jehová pacayawenonae. Paca-ewetsi pexaniacuenia. 25 Bajaraponë pexaniacuenia pacanaëcotsi, papecasiwabarëyaxae. Pacatsitajëtsi papeca-itaxutotsoniataejamatabëcuenenua. 26 Bajarapacuenianua pacatae papeca-asiwawicuenia, panejinawanapaenexa barëyaya itsacuene pataenejewamë», jai tsane pexaniacuene pepaebijawata.
27 »Nexata, bajarapacuenia bajarapamonae jumaitsi tsane xanë tawënëta peyapëtaeya-exanaejawata Israel-pijinë pemomoxi, pexaniacuene pewajënaeyabelia petaewanapaenexa tajamatabëcuene. Bajarapajumecowëya itsa jumaitsi tawënëta, xanë juya pexaniacuenia yawenonaenajë pejumaitsicuenia —jai Jehová Moisés-jawabelia.
C7—C10 […]