Pacuenia sacerdotewi pepopenamatacaitorobinë joneyabiabijitsia Lugar Santísimojawabelia caeto caewai canacujitsia
16
Aarón pexënatobeje petëpaecujinae, ponëbeje tëpa itaxutejema bitso Jehová pijataxunae pimoxoyotsixaebeje, bajaraxuacujinae Jehová barëcuaicuaijai Moisés-jawabelia. 2 Nexata, Jehová jumaitsi:—¡Jumaitsimëre nematapijinë Aarón-jawabelia, bajaraponë bitso itaxutejema pejoneyabiabiyaniwa carpabo-ënë peyatu-ucutsipana pënëyabetsia Lugar Santísimojawata, bajarajota penucaeyaniwa tajabaula pematapawajënaeya, jiwi pijaneconimi tasiwajamatabëcuenecaewitaxunae, bajaraponë petëpaeyaniwa! Bajarapacuenia apobe-exanae, tsipaji raja xanë naitajëtabiabajë bajarapabaulamatapa matatsënëta itarërëbojawata. 3 Aarón pejonewajënaeya tajacarpabo-ënëjawabelia, becapata anijadajubibeje petajuitsinexa pijaneconijamatabëcuene. Nexata, becerro pejananë pebito tajuitsiana pijaneconi yabara tasiwajamatabëcuenecaewinexa. Bajarapijinia pacuenia oveja pejananë pebito tajuitsiana daxitanë pijaneconimatamotsiaya. Matapania bajarapacuenia penato-exanaecujinae, jonena Lugar Santísimojawata. 4 Itsiata, pejonewajënaeya Aarón benawanenua merata. Bajaraxuacujinae, naxatatsiana sacerdotenë penaxatatsilinowirianawa, xua ësacerdotewi penaxatatsijawa. Bajarapacuenia naxatatsiana bëpënëa petsiwajënaerutsijawa linowiriapanata pexanaejawa. Na-epacëtsiananua linopanata pexanaejawa. Bajarapacuenia namataxatatsiana linopanata pexanaejawa. Daxita bajaraxuanë saicaya taitapetsijawa sacerdotewi penaxatabijawanexa. Daxita bajaraxua pexanaecujinae, xanepana baja pejonejawa. 5-10 […]
11 »Xuacujinae, Aarón capatsia-exanaena itsajiwi pabecerro pebito pewajënaeya nato-itapeta penatotajuitsinexa pijaneconi yabara. Nexata, bajarapabecerro wësinepecaucutsiaya beyaxuabiana. Xuacujinae, altar-jumata tajuitsiana tasiwajamatabëcuenecaewinexa pijaneconimi, bajarapacuenia pijabopijiwi pijaneconimi yabara-ata. 12 ¡Bajaraxuacujinae, pitsiana incienso petajuitabiabiwaxiyo, pejenexa pitajuruajawi-iso-ita-ire pepitsijawa pepo-altar-wecua panabo penucaejawa! Pitsiananua anijacobejapatobejecuenia pexaniacuenia pecaquiatsi-inciensonanipërëjawanë pexaniatuxujuwijawa peya-etabiabiwaxiyowecua incienso petajuitabiabi-altar-nexa pejumata, pecaponaenexa peyacaranatsipana pënëyabetsia, Lugar Santísimojawabetsia. 13 Nexata, jiwi pijaneconimi tasiwajamatabëcuenecaewitaxunae pewajënaeya, penucaenë përëcaena inciensojawa iso-ita-irejumawereca, petajuenexa. Nexata, bajarapapexaniatuxujuwi-ëtsëxë junaenina, pemata-acatsinexa bajarapatsëxëta tajabaula pematapajawabetsia. Nexata, bajarapacuenia Aarón itsa exanaena, Lugar Santísimo jone-ata, apotëpae tsane. 14 Bajaraxuacujinae, pitsiana becerro pejanayajuwënëjawa, ponë beyaxuaba pijaneconimi tasiwajamatabëcuenecaewinexa. Nexata, pecobesitota tsicabiana tajabaulamatapa pewajënaewetsina. Pijinia muxubërëtsicabiana pecobesitota siete xuabeje bajarapamatapajawa. 15 Bajaraxuacujinae, tajacarpabo panabuabelia icatsia wësinepecaucutsiaya beyaxuabiana chivo, ponëyo beyaxuabijitsia daxita israelitawi pijaneconimi tasiwajamatabëcuenecaewinexa. Nexata, bajarapachivojana caponaena tajacarpabo-ënëyatu-ucutsijawabetsia, Lugar Santísimojawabetsia. Bajarajotatsia, tsicabiana tajabaula jiwi pijaneconimi tasiwajamatabëcuenecaewimatapata, pacuenia exana imata becerrojanata. Baitsi, jumatsicabiana jiwi taitaxutsoniataetaxunaejawata, bajarapacuenia bajarapamatapamuxubërëjawa. 16 Nexata, bajarapacuenia pexanaejawata, wecua-ajibia-exanaena daxita bepenaxuirabicuenemi xaina baja Lugar Santísimo, petsijumajopaexae Israel-pijinë pemomoxi pibisiacuene pexanaeneconijamatabëcuene, bajarapijinia pacuenia bajarapamonae pijaneconi apotanejumecowënëtabiabijawami, daxita papibisiacuene pexanabiabijawamiwecua. Bajarapacuenianua tsicabiana copiaya peyatu-ucutsitaxunae tajacarpabopijijawa, Lugar Santojawa, pewecua-ajibia-exanaenexa paneconi xaina jiwi pijaneconimi, tajataxunae bajarapamonaetuatuajëta pe-ecaexae —jai Jehová Moisés-jawabelia.
17 Icatsia, Jehová jumaitsi:
—Pacujinae Aarón junua tajacarpabo-ënëta Lugar Santísimojawabetsia pejumatsicabinexa tajabaulamatapa becerro, chivobeje pejanata tanejamatabëcuenecaewia-exanaenexa israelitawi pijaneconimi yabara, bajarapaepatota itsajiwiyo-ata apobejone tajacarpabo-ënëabelia Lugar Santojawata pepitsapaejawabelia bajaraponë. Aarón petsicabicujinae tanejamatabëcuenecaewia-exanaenexa bajaraponë pijaneconimi, daxita israelitawi pijaneconimi yabara-ata, 18 bajaraxuacujinae, pitsapaena tajacarpabopanabuabelia itsajota nuca altar-jawa. Bajarapa-altar-jawata pexanaejawa pemata-etocuenia tsautsiana bajarapadajubibeje pejanata. Bajarapacuenia daxita matatoyorotsia altar-jawa tsicabiana. 19 Bajaraxuacujinae, pecobesitota jumatsicabiana pejanata daxitanenia siete xuabeje tsaponae. Bajarapacuenia nexata wecua-ajibia-exanaena bajarapa-altar-jawa bepenaxuirabicuene pexainaejawa, penucaexae Israel-pijinë pemomoxituatuajëta, bajarapamonae pibisiacuene pexanawanapaewixae —jai Jehová Moisés-jawabelia. 20-34 […]
C17 […]