(Audio de Hébura 10.1, 4 disponible dans Gagur gara Mútiliŋ)
10
Fuyuhoum fara Móyiis, bálandiŋ déhooro bara waaf wajak mee wabil mee éjool. Bare fo faŋo fo let fo fommee waaf waawu. Fuyuhoum faafu furoge be ekaan báyolout émihoomit búsimen banur baabu, yo ecil mee fújuhut fukaan bugan gacik mee Atúuha nguset wic. 2 Eéni búsimen baabu bújuheene búpuren síjunubeiil ñáleb, maheen gujogooro bugan gabaje síjunube ban boheen ekat ekaan búsimen banooban. 3 Bare éeni uñeer wári, búsimen baabu bukaanekaan bugan nguwosen síjunubeiil émihoomit. 4 Maregen maregen, fúsim fara gujiŋa nꞌfara gújikal fújuhut fúpuren síjunube saasu. 5 Yo ecil mee nan Kirista ajaalo mee n'dúniya, narok Atúuha :« Uruukenut búsimen bara sikaj, uruukenut may ucee wan bugan gújiei mee
bare uteepanteep eniin.
6 Esow sikaj jaram sireem son búsimen banooban bakaanei mee bu mara gabonket síjunube
dit seni gásuumaay ganoogan.
7 Ñeer nirok : "Atúuha, nijaalojow be ekaan wan ucamen mee naŋ min busafer baabu bulob mee múmbaam.
8 Kirista amundummundum arok : « Ucamenut búsimen banooban, ucamenut ucee nꞌwan bugan gújiiei mee, ucamenut sikaj sasowei mee jaram reem son may búsimen bakaanei mee bu mara gabonket síjunube. Dó peepe ubajériit dó gásuumaay ganoogan. » Ban búsimen baabu bukaaneikaan naŋ min fuyuhoum faafu fara Móyiis furok mee. 9 Púr to, nabenen arok : « Injé umee. Nijaalojow be ekaan wan aw ucamen mee. » Mee nápuren mee mee búsimen bútiyaara baabu, min akaan to boola. 10 Yéesu Kirista akankaan ñeer wan Atúuha acamen mee. Asensen eniinool naŋ búsimen ñanur ban búreh, min ñeer akaanolaal nóoniaal bugan gaseset.
11 Asímena anooan nja ayihoyiho funagóofunak min akaan gújagagool. Ho nja akaan ñameeŋe búsimen banur baabu, bare búsimen baabu kum bumusut bújuh gápuren síjunube. 12 Ban Kirista, ho búsimen banur pat nakaane bu mara gabonket ñáleb síjunube, afaak nalako nꞌgañen gárib gara Atúuha bu nanoonan. 13 Maareer ñeer umu nenaak min Atúuha abet ulahoorool nꞌetaam nakagiil. 14 Mꞌbájier banur pat nábeesule bugan gan apagen mee nꞌjúnube min góoni bugan gaseset ñáleb. 15 Búyeget Baset mee bulobolaalob yo may nan burok mee :
16 « Acehériit mee naroge : Bapaalaay baabu ban ibil mee ejok mꞌbugo
gunak gaagu bawujer ubee :
Injé be ekaan dó nꞌúyegehiil guyuhoumom,
nisafer go nꞌsísigiriil.
17 Injé bu gápuren mꞌbúyegehom síjunubeiil son wan gukajen mee. »
18 Ban éeni síjunube sibonkehi, tíiŋut ñeer ekaan búsimen bu mara gápuren so.
Ucigaal Atúuha núyinenaalool
19 Gutiom nꞌgúliinom, seholaaset ñeer nújuhaale unogenaal tin tareg mee bañaao nꞌyaŋ Atúuha mara bakaaner fúsim fara Yéesu. 20 Nápeegulolaapeegul bulago buwuugul barondoŋ, bara esaat bu nꞌgaagu gahaja gara gábil gáginden mee ñara dáara yaŋ Atúuha, yo yommee eniinool. 21 Maareer nubajaale ásimena háamak halakeni min ajawulen yaŋ Atúuha. 22 Ucigaal ñeer Atúuha nꞌésigir yaseset, nꞌgáyinen gátintiiŋ dó, mꞌbúyeget bara maregen babajut gapinoor ganoogan gajagut, ban nꞌeniin yataasi mꞌmal maseset. 23 Ujogaal liŋ nꞌgáyinen gan ulobaale mee mara go, ban jambil úleelenaal, mara Atúuha éeni arok be ekaan waaf, ho be ekaan wo.
(Texte de Hébura 10.24-25 disponible dans Wan Yéesu arok mee gáyinen mee gukaan)