(Texte de ce chapitre disponible dans Wan Yéesu arok mee gáyinen mee gukaan)
5
27 Upooya waawu ngúŋarul epootaar yaayu gútiiŋul, ngubaŋiil bújooŋoor fujoj fáamak faafu be ecafiil. Ñeer anafaan úsimena waawu nasonkeniil arogiil : 28 « Let úfirenenuufiren fereŋ galiigen bugan nꞌgajow gara an aahu umu ? Buguul ubuge min baliigeneruul buyiisoore Yéruusalem peepe, ban njicamen be erok éli umuge amaañen aahu umu. »29 Bare Piyeer bugo mꞌbugaagu epootaar ngurogiil : « Elí be ekaan wan Atúuha arok mee, bare let wan bugan gucamen mee. 30 Atúuha hara sipaayolaal gufaan ayihene Yéesu nꞌgacet mee, Yéesu aahu han buguul jimuk mee nan jifaaŋool mee nꞌekuruwa. 31 Atúuha natebenool abaŋ nꞌgañenool gárib min áani Ajawulena, náani may Apagena mimbil bugara Isirayeel gújuh gúlowul bakaaneriil nguyab gabonket gara síjunubeiil. 32 Elí ommee úseedo dáaru peepe, éli son Búyeget Baset mee ban Atúuha asen mee bugan gasoŋool mee. »
33 Nan bugara fujoj faafu gujam mee balober epootaar yaayu, giiñiil ngureg ngutiñe, ngupinoor bu jamugiil. 34 Bare Afarisiit acee gajaool Gamaliel nayiho nꞌetut fujoj faafu min arok gúpuren para maa epootaar yaayu. Ho ápajula fuyuhoum Atúuha háamak han bugara ésuk yaayu peepe gúkaanume. 35 Nan gúpureniil mee, narok gan dó mee : « Buguul bugan bugara Isirayeel, mbil jíkaanum máamak wan jipinoor mee be ekaan umaañen waawu ubugu. 36 Piyout nan Teyudas harok mee ho an háamak ápurulo, ban galagenool mee jooŋoojooŋoor bugan siceme sibaagiir (400). Gumugoomuk kum. Ulagenaool peepe guyiisooyiisoor ; bajut haŋañoe. 37 Púr to ho, nan gulako mee ganaay epin bugan, Yudas hara Gálile nápurul may ban bugan gameeŋe ngulagenool. Ho may gumugoomuk, ban ulagenaool may guyiisooyiisoor peepe. 38 Yo ecil mee jaat ínje be elobuul set : jambil úyegehuul woono mꞌbugan gaagu ubugu, jikaheniil. Eéni bapinooreriil son bakaaneriil mꞌbugan mbúpurulo, bo be enim. 39 Bare éeni maregen bakaaneriil nꞌAtúuha mbúpurulo, mat jíjuh ganimen bo. Jíkaanum jambil jibajoor nꞌAtúuha ! »
Ngusoŋ furimool 40 min ñeer gúwoogul epootaar yaayu, nguboñ gukaruwaasiil, ngubaañ gúfireniil elob nꞌgajow gara Yéesu kindiŋ gukaheniil. 41 Ñeer epootaar yaayu ngúpurul dó nꞌfujoj faafu nꞌgásuumaay ró mara Atúuha najoge gáyineniil gútintiiŋ min gúlaam mara gajow Yéesu. 42 Ban gukahut galiigen bugan funagóofunak Furim Fásuum mee fara Yéesu ammee Kirista aahu, dó nꞌyaŋ Atúuha son siyaŋ sara bugan.