(Audio de ce chapitre disponible dans Fuliik Atúuha)
Yéesu naboñ gucee bu gacookoor Paak yaayu
26
17 Nꞌfunak fútiyaara fara gagaan gara fúmbuur fabajut mee élewiir,
ulagena Yéesu ngújool gurogool :
« Tuu nucamene ucookoor múcahoaay maamu mara gagaan gara Paak yaayu ? »
18 Násuupiil arogiil :
« Jijow bu nꞌésuk yaayu jitook anne njirogool ínje anafaanuul iroge funagom fútintiiŋ.
To nꞌyaŋool nibile fúcaho nꞌgagaan gara Paak yaayu,
ínje nꞌulagenaom. »
19 Ulagenaool ngukaan wan alobiil mee,
ngúsiil múcahoaay maamu mara Paak yaayu.
Fúcaho'oor Yéesu fúsola nꞌulagenaool gammee guñen nꞌgúruba
20 Bu gárusa gaagu,
Yéesu nalako fúcaho nꞌulagenaool gammee guñen nꞌgúruba.
21 Nan gommee nfúcaho,
Yéesu narogiil :
« Be elobuul maregen :
acee mꞌbuguul be ecumbom. »
22 Nan gujam mee furim faafu,
bugo peepe njogiil máamak jaram anooan mꞌbugo nasonkenool arogool :
« Acila,
ínje pére ? »
23 Yéesu násuupiil arogiil :
« An aahu hárur mee gañenool nu ganur nꞌínje mꞌbúcahum baabu,
ho abilaam mee ecumb.
24 Maregen maregen,
Aleeh An be ecet naŋ min Busafer baabu bulob mee moola.
Wáob,
mátaañie bu gáani nꞌan aahu habilool mee ecumb !
Waregeene bajak,
an aahu jambil abajeeni. »
25 Ñeer Yudas habilool mee ecumb narogool may :
« Anafaanóli,
ínje pére ?
» Yéesu narogool :
« Ulolob yo ufaak. »
26 Bugo nfúcaho faafu,
Yéesu naŋar fúmbuur,
nasal Atúuha afaak,
nasaahoor fo asen ulagenaool,
narogiil :
« Jiyab jitiñ :
úre eniinom. »
27 Naŋar éraanum yaayu nasal Atúuha,
naseniil yo,
narogiil :
« Jiyab jiremoor buguul peepe :
28 Dáare fúsimom,
fúsim faafu fakaan mee bapaalaay baabu mbútik,
fáyuhi mee bu mꞌbugan gamemmeeŋ bu gabonket síjunube.
29 Iroguulee :
Mat irem ébiiñ benen káŋ bu funak fan ibil mee ebaañ iremoor yo mꞌbuguul nꞌJáyiih jara Paayom. »
30 Nan gufooñ mee ufooñ wara esal Atúuha gufaak,
ngúpur gujow bu nꞌeking yan guroge mee « emontaañ yara uoliiw. »