Atúuha najok bapaalaay mꞌbugara Isirayeel
19
1-2 Gayooŋ gara Isirayeel ngúpur Refidim.
N'funak fútiyaara fara fujenna fúfaaten mꞌbápureruliil nꞌEsípt,
ngútiiŋ nꞌerampaasa yan guroge mee Sinay,
nguyihen dó síguuhiil jooŋoor nꞌemontaañ yan to mee.
3 Móyiis najiŋ nꞌemontaañ yaayu bu búrehoor nꞌAtúuha.
Acehériit mee nawoogulool dó fatiya nꞌemontaañ yaayu,
narogool :
« Urok fiil fara Sakob,
gammee gayooŋ gara Isirayeel :
4 “Buguul fannauul jiñoñow min itek mee bugara Esípt.
Jiñoñow may min íguhuluul mee bu baabe nꞌínje nogoor naŋ etaaluñ etebe muleeh yo nꞌubeeh yo.
5 Maareer éeni jijamom,
njijok bapaalaayom,
dó mꞌbugan gaagu peepe buguul jibil mee gáani buganom gújan.
Maregen ínje icile bugan gaagu peepe,
6 bare buguul bu gáani bu nꞌínje úsimena gahomenoore nꞌjáyiih,
njóoni bugan gaseset.”
Gaage gurim nubil mee elob bugara Isirayeel. »
7 Móyiis nábaañul bu tan guyihen mee síguuhiil,
nawook unafaan bugara Isirayeel min agaaniil peepe wan Acehériit mee arogool mee.
8 Ñeer bugara Isirayeel peepe ngujok furim fanur ngurogool :
« Elí be ekaan peepe wan Acehériit mee arok mee mbil ukaan.
»
Móyiis nabaañ ajiŋ bu gátiiŋen Acehériit mee elob yan gayooŋ gaagu gulobool mee.
9 Acehériit mee narok Móyiis :
« Injé be éjool nꞌfumooc fáamak bu to nꞌaw min bugara Isirayeel gujam nan ibil mee elob nꞌaw.
No bugo bu gáyineni bu nanoonan.
»
Móyiis nabenen átiiŋen Acehériit mee wan bugara Isirayeel gulobool mee.
10 Acehériit mee nabaañ arok Móyiis :
« Ujow urok bugara Isirayeel gusehenooro jaat son gajom,
ngutaas may wañiil uset.
11 Nguhomenoor jak bu nꞌfunak fúfaaten,
mara funak faafu ínje Acehériit mee bu gawaloúl bu nꞌemontaañ yan guroge mee Sinay fácil gayooŋ gaagu peepe.
12 Aw be ekaan élinga ebosen emontaañ yaayu mimbil gayooŋ gaagu gúkaanum.
Nurogiil jambil an ajiŋ nꞌemontaañ yaayu,
jambil an agor ubereberef waawu,
mara anooan agor yo mee ngumugool.
13 Jambil gañen gugorool bare gutegool sílankiin jaram acet mba nguyahool silaŋen jaram acet.
Eéni may énunkureŋ,
be etek yo sílankiin necet mba nguyah yo silaŋen necet.
Nan gábilleen gaagu gubil mee erok,
no kindiŋ guceeiil gubil mee éjuh gujiŋ nꞌemontaañ yaayu. »
14 Móyiis nawaloúl bandiŋ bu bo nꞌgayooŋ gaagu min arogiil :
« Jisehenooro.
» Ngutaas wañiil.
15 Púr to,
narogiil :
« Jihomenoor bu gájomenum.
Jambil an anap nꞌakoña. »
Acehériit mee nawaloúl bu nꞌemontaañ yan guroge mee Sinay
16 Nan funak fúfaaten faafu fútiiŋ mee,
noono mꞌbújom,
fumooc fáamak nfugongen emontaañ yaayu nak yij wap,
upapamboora nurok.
Ngujam gábilleen gurok máamak.
Ñeer bugara Isirayeel tan gommee nꞌsíguuhiil,
ngutelen jálako.
17 Ñeer Móyiis nápurenul gayoŋ gaagu peepe tan guyah mee síguuhiil bu búrehoor nꞌAtúuha.
Nguyuho to nꞌetaam emontaañ yaayu.
18 Fakoor fújelelel nfugongen emontaañ yaayu yan guroge mee Sinay naŋ fakoor fara éfuur.
Negoroor máamak mara Acehériit mee dó nꞌfakoor faafu nawaloulo.
19 Baroger gábilleen gaagu mbureg mbubaje sembe.
Móyiis nalob,
Atúuha násuupulool dó mꞌbaroger upapamboora waawu.
20 Acehériit mee awaloulowalo káŋ bu nꞌgawulena emontaañ yaayu yan guroge mee Sinay,
náwoogul dó Móyiis.
Móyiis najiŋ.
21 Acehériit mee nabaañ arok Móyiis :
« Uwalo min ujow urok gayooŋ gaagu jambil gusommen eñowom,
mara gameeŋe mꞌbugo gújuhe gucet.
22 Haani úsimena gabil mee ecigom,
bugo bu gasehenooro.
Eéni gukaanut mo,
ínje Acehériit mee be etegiil. »
23 Móyiis narok Acehériit mee :
« Gayooŋ gaagu mat gujiŋ nꞌemontaañ yaayu,
mara aw fannai urogandok ikaan élinga ebosen emontaañ yaayu ban nikaan yo esambo. »
24 Acehériit mee nabaañ arogool benen :
« Uwalo min újiŋul buguul nꞌAharoŋ.
Bare úsimena waawu bugo nꞌgayooŋ gaagu,
jambil gusommen bújiŋul bu baabe nꞌínje,
mo mat itegiil. »
25 Ñeer Móyiis nawaloúl be elob nꞌgayooŋ gaagu.