15. Búrehoor Yéesu bugo n'akoña hara mof mara Samari
15. La rencontre entre Jésus et la femme de Samarie
Yéesu bugo nꞌakoña hara mof mara Samari
1 1 Efarisiit yaayu gujanjam gurok mara Yéesu nabajebaj ulagena gameeŋe,
nábatise jaram aregen Saŋ Bátiis.
2 2 (Ban maregen maregen,
let Yéesu fannaool nja ábatiseiil,
bare ulagenaool.)
3 3 Nan Yéesu ajam mee baloberiil,
nápur mꞌmof maamu mara Yúde abaañ nꞌgara Gálile.
4 4 Bare bala átiiŋ Gálile,
ho be emundum anogen mꞌmof man guroge mee Samari.
5 5 Najow jaram átiiŋ nꞌésuk yan guroge mee Sikar,
dó Samari,
cik barager ban Sakob asen mee aleehool Suseef.
6 6 Ekoloŋ yaayu yara Sakob dó nyoom.
Yéesu nemma nayoge nꞌejow yaayu,
nalako cik ekoloŋ yaayu náyolen.
Bunak bacaaŋer.
7 7 Ñeer mbaj akoña hara mof mara Samari ajaalo bu gamoj.
Yéesu narogool :
« Ujíom mal irem. »
8 8 (Tooge ulagenaool bajaer bu bo nꞌésuk yaayu funoom múcahoaay.)
9 9 Akoña aahu narogool :
« Buu nkaane aw ammee Asúiif nújuh úciinom mal bu marem,
ínje ammee an hara Samari ?
» (Alolob mee mara Esúiif yaayu dit gulako'oor mꞌbugara Samari.)
10 10 Yéesu narogool :
« Eéni úmiremmir gájii Atúuha,
númir may an aahu arogei mee újiiool mal arem,
aw ubileenool éciin mal bu marem,
ban ho boheen eseni mal macil mee buroŋ. »
11 11 Akoña aahu narogool :
« Anafaanom,
oogut waafóowaaf bu gamoj,
ban ekoloŋ yaayu éjupojupo.
Ñeer béy nubile éŋarul mal maamu macil mee buroŋ ?
12 12 Aw pére urege paayóli afaan Sakob,
hasenóli mee ekoloŋ ye ?
Ho fannaool nꞌguleehool dó ngureme,
nguremen dó may sikooreiil. »
13 13 Yéesu narogool :
« Anooan areme mal me,
marem be ejogool benen.
14 14 Bare an abil mee marem mal man ínje ibilool mee esen,
marem mat mumus mujogool benen.
Ban mal man ibilool mee esen bu gálowulo nu ho gafuy gayondériit dan buroŋ bafaagoériit bubile épurul. »
15 15 Ñeer akoña aahu narogool :
« Anafaanom,
usenom mal maamu umu jambil marem mujogom benen,
mo mat íbaañul benen bu taahe gamoj. »
16 16 Narogool :
« Ujow úwoogul araaŋi,
ufaak núbaañul bu taahe. »
17 17 Akoña aahu narogool :
« Ibajut amaañen.
» Ñeer Yéesu narogool :
« Ukonkooŋ nurok mee ubajut amaañen.
18 18 Nꞌumaañen goono futok nuñuuhoeene ban amaañen aahu han jilako mee maareer let araaŋi.
Wan ulobe mee maregen. »
19 19 Ñeer akoña aahu narogool :
« Anafaanom,
niñoñow mara aw anabiyoŋ.
20 20 Sipaayóli gufaan taahe nꞌemontaañ ye nja gunaak Atúuha :
bare buguul Esúiif jiroge to Yérusaleem bugan gubile enaak Atúuha. »
21 21 Yéesu narogool :
« Uyínen elobom :
funak ufu néjool fan úmire let taahe nꞌemontaañ ye,
let may Yérusaleem njibile enaak Paayolaal Atúuha.
22 22 Buguul bugara Samari jímirut fanfaŋ ay njinaake :
bare éli Esúiif yaayu unaanaak Atúuha ban númirool,
mara epak yaayu nꞌEsúiif népurulo.
23 23 Bare funak faafu ufu néjool,
ban fútiiŋe,
nan unaaka fanfanfaŋ gubil mee enaak Atúuha ammee Paayolaal,
mꞌbúyeget ban may mꞌmaregen.
Unaaka naŋ ubugu,
Paayolaal aŋese mee.
24 24 Atúuha búyeget,
ban ganaakeool mee fok gunaakool mꞌbúyeget ban may mꞌmaregen. »
25 25 Akoña aahu narogool :
« Nímimir mara an aahu han Atúuha acaap mee,
han guroge mee Kirista,
ho be éjool.
Nan abil mee éjool,
ho bu gápajuloli dáaru peepe. »
26 26 Yéesu narogool :
« Injé ho maame,
halobe maa maa nꞌaw. »
39 39 Ñeer bugara Samari gameeŋe gacin dó mee nꞌésuk yaayu ngúyinen Yéesu mara akoña aahu áseedoseedo arok :
« Alobanlob wan ikaan mee peepe. »
40 40 Yo ecil mee nan bugara Samari gujaalo mee bu to nꞌYéesu,
ngúciinool nalako to mꞌbugo.
Nakaan to gunak gúruba.
41 41 Ñeer gáyinen mee ngureg ngumeeŋe mara wan Yéesu fannaool alob mee,
42 42 ban nak gurok akoña aahu :
« Maareer ñeer let baloberi déhooro bucilóli núyinen,
bare mara éli fannaóli ujamoojam nelob.
Sehóliset ho fannaool ammee apagena aahu hara duniya. »