MASULA
wakita ana
YUHANA
a wetse ya
Yuhana a ge wusa a mayahaba gər gà mburma Mbulum
1
1 Iye batsah mburma ana ika magər gà mburma Mbulum a,
i wetseha wakita aaha ka,
a kər mayahaba gər gà mburma Mbulum ana kà ne mama gà ɓəza,
Mbulum a zla kər a,
dite a gà ɓəza yak ana ti yahawuba gər a təv yak,
i waya tar ndzer a mbaŋa.
Iye ɗekɗek tsa na i waya kurum a.
Gà mburma ana tə sər bazlam ndzer ŋa ana i təv Mbulum a tekeɗe ka,
ta waya kurum mbaŋa asa.
2 I waya kurum ka,
aɗaba ana bazlam ata ndzer ŋa mandza ŋa i gəzləŋ kwa ya.
A ndze a i təv kwa ka,
aà biybiy.
3 Gà Mbulum Tsir kwa nda Yesuw Kiristi Kəla ŋgar ti ta vile a kwe a ŋgwal tar ana kà ndzakwa a tar dər are tsehe ya,
dite ti ta vile a kwe a matasla yam a gəzləŋ.
Gà dukw ata ka,
ki ŋgetekewiŋa,
na kwa ana ki zezemekwe a bazlam ndzer ŋana i təv Mbulum a,
ki weyekwe a ba ika magər kwa mbaŋa.
Wayakwa ba ika magər kwa nda ndzer ŋa
4 Yàa ŋgaya ba hinne,
aɗaba i samata,
gà misle ŋgiɗ i liwiŋ gà ɓəza yak ka,
tar ihər ti zezem a gà dukw ana ndzer ŋa,
kamala ana Mbulum Tsir kwa a tsik a kwa,
kà zazamakwa ya.
5 A kər mama gà ana i waya kər hinne ya,
i gek a kamkam:
Wayakwa ba ika magər kwa ilik ilik tserdze.
Məpala ahəm aaha i wetse a kurumaha ya ka,
biy na awiya ŋa kàa tsarakum ilik zukw tsiye tsa.
Kà sərakwa ka,
daga piŋŋe,
aà gər ana kà Dzawa ba aà mazazama Yesuw Kiristi ya.
6 Mawàyà Mbulum ata ki weyekwe a ŋgat a ka,
kamala megweɗe ya,
gekwa dukw ana Mbulum a tsik a kwa ya kəla pat.
Mbulum a gwaɗa a kurum ka:
Wayum mburma tserdze kəla pat.
Taŋa ka,
dukw ana kà tsarakum daga piŋŋe ya.
Zazamakwa vatwa ndzer ŋana
7 I tsik a kurum taŋa ka,
aɗaba ana gà ɓəzla məbànà mburma a riŋ tì sìweye a ika gər ahəɗ hinne ya.
Aɗaba tar ka,
ti niw megìse Yesuw Kiristi ana a dara aka gər ahəɗ kamala mburma ya.
Ama wur ana a niw taŋa ya ka,
ŋgat ka,
mala məbànà mburma,
dite ŋgat asa ka,
mala mene are a Yesuw Kiristi mbaŋa.
8 Aɗaba taŋa kinehe ka,
gwim metsehe,
megemir kurum ana kì geywim tserdze ya ka,
ma ti ne taf masakəŋa tsa.
Ama ka,
ɗum,
ki ŋgetwime a dukw mayaba kurum ata Mbulum a gwa,
i vile a kurum a ya fit dze ivaɗ.
9 Sərum der ka,
wur aaha a zazamawa bazlam ana Yesuw Kiristi a dzeŋge a kwa ya tsa,
hə̀rə̀ts hə̀rə̀ts à ses aakiŋa.
Wele ata ka,
wala a gəs Mbulum tsa.
Ama wur ana a zezem a dukw ana Yesuw Kiristi a dzeŋge a kwa ya ka,
ŋgat a gəs gà Mbulum Tsir kwa,
nda Kəla ŋgar fit məma mbaŋa.
10 Aɗaba taŋa i tsik a kurum ŋa:
Na wura a dere a a təv kurum a,
a dzeŋge a kurum a dukw ana Yesuw Kiristi a dzeŋge a kwa ya tsəka,
ka ta gəsum aàba ŋgat a ga a ma kurum tsa.
Ka ta gwimer wusa ɓav tsa asa mbaŋa.
11 Aɗaba na wura a ge a wusa a medzibe gà mburma ata ka,
ta gew a ba nda wele ata a təv bakal ŋgar ana a gewa ya mbaŋa.
Mandəva à mege wusa
12 Gà bazlam pampam na i waya aà metsike a kurumaha zləmana ya,
ama a sèsiŋ na i wetse a kurumaha aka wakita ya tsa.
I dzala ka,
iye ŋa i dehe a tsìm a təv kurum,
ki fèfilekwe akaba a nda bazlam,
na dite maŋgayaba kwa ana ki ŋgeyekwe a ba ya ka,
mà rah a gəzləŋ kwa lele ya.
13 Ama mayahaba gər gà mburma ata a ne damər yak dəm ŋa,
gà ɓəza ŋgar ana ti yahawuba gər a təv ŋgar a ka,
ta ge a kurumaha wusa asa mbaŋa.