1 Tesalunike 2

Mege megemir Mbulum ana Pul a ge i Tesalunike ya

1 Gà damər mə̀r, aɗaba kurum kà sərum nda gər kurum, mede mə̀r ana mì daha a təv kurum a ka, a ne taf masakəŋa tsa. 2 Ama ələk mì ta medeha a təv kurum ka, tàa sèwèr a mə̀r are i Filipiya hinne. Tàa ge a mə̀r matawak ka, kurum kà sərum. Ama ku mege gà ɓəzla mene are mə̀r riŋ hinne tekeɗe, Mbulum aka vəl a mə̀r ndzəɗa, na dite mì ɗif a kurum à bazlam ŋgwal ŋa ana a dara i təv ŋgar a ya. 3 I təv ana mì wiz mburma, dite ta gəs bazlam ata ya ka, mì mà à dukw ana a dara i madzala gà gər mə̀r a tsa. Mì tsik ka, lele, wirwir iɗəm tsidze. Dite kwets mìi bene a mburma tsa asa mbaŋa. 4 Ama mì tsik ka, dukw ana a sàs a Mbulum mì ɗif a tar dər a ivaɗ. Aɗaba a samata, mə̀r ka, mì tsahən ahər, na dite a vəl a mə̀r bazlam ŋgwal ŋa ata a ahər, mì ɗif a dər a mburma ya. I təv ana mì tsikewa ya ka, a sàs a mə̀r, dite na mì da a gər a mburma ya tsa. Ama mì waya ka, na mìi de a a gər a Mbulum a ivaɗ. Ŋgat na a sər dukw ana i gəzləŋ mə̀r tserdze ya.

5 Kurum kà sərum, mə̀r ka, maa tsik a kurum bazlam ana lifeɗiɗe nda wirwir a ilik tsa, nda gà maa yaha dər duwa tsa asa mbaŋa. Dukw ana i wetse i faha ya ka, ndzer, Mbulum aka mbər mesire. 6 Mìi yehe a ka, mezlibe ana gà mburma tì zlibe à mə̀r a tsidze, ku mege i təv kurum, ku mege i təv gà misle ŋgiɗ tekeɗe ya. 7 Ama ka, mìi sle a aà mewize aà kurum duwa kamala ana mə̀r gà bàba ŋa ya dukw ŋgar, aɗaba ana mə̀r ka, gà ɓəzla meslire Yesuw Kiristi ya. Ama mì waya ka, kataya tsa. Mì gəs kurum ka, lele, kamala məmər kəla ana a gele a gà ɓəza, a ge a ter a gər a ivaɗ. 8 Mì waya kurum ka, hinne. Aɗaba taŋa, i təv ana mə̀r mandza ŋa i təv kurum a ka, a sàs a mə̀r na mìi ɗif a kurum a à bazlam ŋgwal ŋa ana a dara i təv Mbulum a ya. Ama ka, taŋa ɗekɗek tsa, a sàs a mə̀r ka, mìi mete a aɗaba kurum, agəra ana mì waya kurum ka, hinne ya.

9 Gà damər mə̀r, megemir ana mì ge i təv kurum a ka, nda ndzəɗa na mì mə̀r aba ya. Ama ka, mə̀ məts a kurum gər tsa, ndzum dər i gər hiywe: Aɗaba akahər ata mì ɗif a kurum à ŋgwal bazlam ana a dara i təv Mbulum a ya ka, maa ge megemir hinne, ku mege ndaavəɗ, ku mege ndaapat tekeɗe ya. Mì ge dər kataya ka, a sàs a mə̀r na mì nikiɗ à kurum à dukw mezime ya tsiye. 10 Kurum ka, kà sərum mede mə̀r ana ŋgwal ŋa ya, dite Mbulum tekeɗe, a sər mbaŋa asa. Aɗaba akahər ana mə̀r mandza ŋa ika magər kurum, gà na tàa gəs Mbulum a ka, mede mə̀r ata ka, ŋgwal ŋa, bakal iɗəm tsa. Wura ilik a sle aà metsike aà mə̀r a dukw ana ŋgwal ŋa tsiye tsidze. 11 Kurum kà sərum mbaŋa, mì zlak kurum ika magər kurum ilik ilik tserdze ka, kamala tsir kəla ana a ge a gər a gà ɓəza ŋgar a. 12 Mì màwa a kurumaha à arəv, mì vəlawa a kurum ndzəɗa, dite mì hamawa a kurum ka, hinne asa mbaŋa, na dite mede kurum ana ki dwim a ya, mà tsahən aà Mbulum a. Ŋgat a zal a kurum ka, na dite ki dwim a a mekwere ŋgar, ki ti ndzwim a nda gà ŋgat i təv mezlibe ŋgar ana tì zlibe a dər a ya.

13 Mìi misek a à mege kəkaaha a Mbulum tsidze, aɗaba akahər ana mì ɗif a kurum à bazlam Mbulum a ka, kàa gəsum kamala taŋa ya. Kurum kà sərum, bazlam ata a dara ka, i təv Mbulum a, tsəka, bazlam gà mburma ana taf masakəŋa ya tsa. Ndzer kaɗəŋ, bazlam ata ka, biy Mbulum dukw ŋgar. Ar ka, ndzəɗa ŋa, a ge a megemir i ba kurum ana kurum gà mburma Mbulum a. 14 A kurum gà damər mə̀r, kà nwim ka, kamala gà mburma Mbulum ana ika ahəɗ Yuda, ta gəs Yesuw Kiristi ya. Gà Yahuda ana i fata ya ka, ta vəlawa a tar mesewere are hinne. Kamala taŋa ya, kurum kinehe tekeɗe, gà gwala kurum ihər tì sèwèr a kurum a are kataya mbaŋa. 15 Gà Yahuda ata ka, ta batsawa gà ɓəzla məma à guma Mbulum ana akahər ata ya. Dite gà asiŋ ŋa ibam, tàa kəɗ Yesuw Kiristi BATSAH kwa ŋa mbaŋa asa. Dite araha kinehe asa ka, hiywe gà asiŋ ŋa ihər ti ne a mə̀r a are hinne mbaŋa. Ama dukw ana ta ge a ya ka, a tsahən aà Mbulum tsidze. Tar ti ne ka, gà ɓəzla mene are a mburma tserdze. 16 A sàs a tar ka, məpala a mə̀r ahəm aà metsike bazlam Mbulum a gà asiŋ gà slala ŋgiɗ ana pampam tserdze, na dite Mbulum a mbil à ter a zləmana ya. Kamala taŋa ya, tə rah akaba à gà asiŋ gà bakal tar ana ta gewa ya fit kweleŋ tìsse, kamala ana ti live a duwa a kəzləm a. Ama matsəɓatsəɓ Mbulum tivvè ika gər tar, seriye ŋgar ibam, aka gəs tar kuɗa.

Gà mburma Mbulum ana i Tesalunike ya, ta kə̀v a Pul

17 Gà damər mə̀r, i təv ana mì mah ba, mì da aà kurum a ka, kàa kə̀vum a mə̀r hinne. Mì da aà kurum a, i ŋgat a kurum a tsəka, nda are ɗekɗek pəra. Ama i gəzləŋ mə̀r ka, kamala ana mə̀r mandza ŋa i təv kurum a hiywe. Mì yahawa vatwa ka, hinne na mì waya məfə̀rà aka kurum asa ya. 18 Aɗaba taŋa na a sàs a mə̀r məmbə̀ɗaha gər a təv kurum a. Iye Pul nda gər gà, i gwaɗawa, i dehe a, i ta fir aka kurumere a asa te ka, sik diŋ. Ama ka, Əbay sitene aka vəl a mə̀r vatwa tsa. 19 Mì dzalawa aka kurum hiywe ka, aɗaba ana kurum gà mburma Mbulum a. Dite i huɗ madzala gà gər mə̀r ata tekeɗe, mì dzalawa ka, aka dukw maya ba ana Mbulum a ta vile a kwe a ya. Mì dzalawa gà gər ata ka, aka gà asiŋ gà mburma Mbulum ŋgiɗ ɗekɗek tsa, aka kurum mbaŋa, dite na mì ŋgat maŋgayaba a gəzləŋ zayya ka, aɗaba kurum asa mbaŋa. Kurum kà nwim ka, kamala petek mendìwìɗè gər mə̀r ana mì ta ge a dər zlapa, nda gà maŋgayaba ika miɗ Yesuw Kiristi BATSAH kwa ŋa, a pat ana à mère a ya. 20 Kaɗəŋ ndzer, tar ihər tì zlibe a à mə̀r aɗaba kurum, dite mə̀r tekeɗe, mìi ŋgeye a ba aɗaba kurum mbaŋa.