Yesuw a mbəl à wele duwa ta wa ŋgat guluf ŋa
9
1 A pat duwa,
Yesuw a de a ika vatwa.
A ŋgat a wele duwa,
guluf ŋa.
A gər ana ta wa ŋgat a,
aka ŋgat a vatwa tsa.
2 Gà ɓəzla mazazama Yesuw ta gwaɗar:
«Mala medzeŋge a mə̀r,
ta wa wele aaha guluf ŋana,
aɗaba bakal ŋgar a?
Tsəna,
agəra biy gà tsir ŋgar a?»
3 Yesuw a gwaɗa a tar aaka:
«Guluf ŋgar aaha ka,
aɗaba bakal ŋgar tsa,
dite agəra biy gà tsir ŋgar tsa asa.
Ta wa ŋgat guluf ŋa tùtùrkùmma ka,
dite ndzəɗa Mbulum mə̀ pàt aba nda təv ŋgar.
4 Say ki gekwe a meslire wele ana a slərra iye ya,
i təv ana pat a riŋ mba ya.
Həvəɗ aka à mege.
Aka ge ka,
ku weke tekeɗe,
a sle a aà megemir ŋa asa tsa.
5 I təv ana iye ɗa ika gər ahəɗ mba ya ka,
iye i ne təv dzaydzay gà mburma gər ahəɗ.»
6 A tsik a tar aba mifefile ata ya ka,
a tif tìzle a bəɗ,
a həlaɓ,
dite a ndə̀ɗ metìrfèneh ŋana,
a bah aà are mala guluf ata.
7 A gwaɗar:
«Da,
ta bara are a duluv ana tə zalar Siluwam a.»
Zləm təv ata ka,
kərga megweɗe ya,
wele ana tə slərra ya.
Mala guluf ata a daha,
a bara are ŋgar a fata.
Dite wurat are ŋgar a hə̀ndə̀k ba.
Aləka a màra ka,
a ŋgat a vatwa lele kuɗa.
8 I dəba ŋa ya,
gà ɓəzla biye hərmaga ŋgar ana ta mberaha ya,
nda gà na ta ŋgatawar à ŋgèl a duwa aà guva vatwa ya,
ta gwa:
«E/?,
naha ka,
wele ana a ndzawa aà guva vatwa,
a ŋgalawa duwa ya dìgiyè?»
9 Gà misle ŋgiɗ ta gwa:
«Kaɗəŋ,
ŋgat ŋa.»
Gà asiŋ ŋa ta gwa:
«Awaŋ,
ŋgat tsa,
ama kə̀la ka,
a ndzikiɗ ba ŋgat pəra.»
Aɗaba taŋa,
wele ata a gwaɗa a tar aaka:
«Iye ŋa ndzer dukw ŋgar.»
10 Ta gwaɗar aaka:
«Dite meme na are yak a hə̀ndə̀k ba seyiŋ a?»
11 A gwaɗa a tar aaka asa:
«A hə̀ndə̀k ba ka,
wele ana tə zalar Yesuw a,
a həlaɓ ahəɗ,
a giŋ metìrfèneh ŋa aà are,
dite na a gweɗiŋ:
“Da,
bara are a duluv Siluwam” a.
I da,
i ta bara are a fata kaɗəŋ ka,
dite na araha i ŋgat a vatwa kuɗa ya.»
12 Ta gwaɗar:
«Mburma ŋa i ŋga,
na kinehe ya?»
A gwaɗa a tar:
«I sər tsa.»
Gà *Farisa tə tsam bazlam aà wele ana a ndzawa guluf ŋa ya
13 I dəba ŋa ya ka,
tə da à wele ata are ŋgar a hə̀ndə̀k ba ya,
a təv gà Farisa.
14-15 Tə daha ka,
gà Farisa ata tə tsam ihər bazlam a.
Ta gwaɗar:
«Meme na kà mbəl,
are yak a hə̀ndə̀k ba kinehe kuɗa dər a?»
A gwaɗa a tar:
«I ŋgat a vatwa ka,
Yesuw a giŋ metìrfèneh ahəɗ aà are,
dite i bara are,
tsam ka,
na i ŋgatar a.»
Tsaatsa,
pat ana Yesuw a həlaɓ metìrfèneh ahəɗ,
a ge aà are a wele ata,
a hə̀ndə̀k ba ya ka,
a pat mesifikaba.
16 Gà asiŋ gà Farisa ta gwa:
«Mì samata wele ana a ge a kataya ya ka,
a sle aà madàra i təv Mbulum a tsa,
aɗaba ana a ge a megemir,
a tike a gər a məpala ahəm kwa a pat mesifikaba tsiye.»
Ama gà misle ŋgiɗ asa ta gwa:
«Meme na wura a sle a aà mege medzibe gà dukw mene aà mburma aaha ya,
na ŋgat mala bakal a?»
Aɗaba taŋa tə ndzakaya ba iba ya vatwa pampam.
17 Gà Farisa ta gwaɗa a wele ana are ŋgar a hə̀ndə̀k ba ya asa:
«Dite kər a gè,
kù gwa aà wele ana a hə̀ndə̀k are yak ana,
meme?»
A gwaɗa a tar:
«I gweɗe a là,
ŋgat ka,
mala məmà à bazlam Mbulum ndzer.»
18 Ama gà bàba gà Yahuda ta gəs bazlam ŋgar ata a gwa:
«Iye piŋŋe ka,
guluf ŋa,
dite i mbəl kinehe» ya tsa.
Aɗaba taŋa tə daha,
tə zal a gà tsir ŋa,
19 aà matsama tar bazlam a.
Ta gwaɗa a tar:
«Wànà naha ana,
kəla kurum kaɗəŋ a?
Kù gwaɗum,
kà wum ŋgat ka,
guluf ŋa ya?
A ge ba dze ana,
meme,
na dite a ŋgat a vatwa asa yà?»
20 Gà tsir wele ata ta gwaɗa a tar aaka:
«Haya,
mì sər,
ŋgat ka,
kəla mə̀r.
Mì wa ŋgat ka,
guluf ŋa dukw ŋgar.
21 Ama kinehe ka,
mì sər meme na are ŋgar a hə̀ndə̀k ba ya tsa,
dite mì sər wur ana a hə̀ndə̀kar ikəka ya tsa asa mbaŋa.
Tsàmum aà ŋgat ŋa dukw ŋgar.
Ŋgat ka,
kəla ndirkiz mba tsa,
a sle a aà metsike a kurum a dukw ana a geba nda ŋgat a.»
22 Gà tsir ŋgar ti tsik kataya ka,
aɗaba ana magəɗa gà bàba gà Yahuda a ge a ter a ya.
Aɗaba gà bàba gà Yahuda tàa mbər medzè akaba bazlam aka ndəv.
Ta gwa:
Wele ana aka gwa,
Yesuw ka,
*Kiristi,
mala məmbala à mburma ana Mbulum a gwa,
i ti slir a kurumehe a ya ka,
ti delewere a ŋgat i gà ga Mbulum tar ata ya.
23 Aɗaba taŋa na gà tsir wele ata ta gwaɗa a tar:
Tsàmum aà ŋgat ŋa,
dukw ŋgar a.
Ŋgat ka,
kəla ndirkiz asa tsiye ya.
24 I dəba ŋa ya,
gà Farisa tə zal a wele ata a ndzawa guluf ŋa ya masula ŋa asa.
Ta gwaɗar:
«Tsik dukw Mbulum ndzer ŋana kwaŋ,
aɗaba mì sər ndzer,
wele ata ka,
mala bakal.»
25 Dite a gwaɗa a tar aaka:
«Bəla ŋgat mala bakal,
bəla ŋgat mala bakal tsəka,
i sər tsa.
Ama dukw ilik kə̀la ka,
i sər.
Aɗaba piŋŋe ka,
iye guluf ŋa.
Ama kinehe ka,
Yàa ŋgat a vatwa dzaydzay lele kuɗa.»
26 Ama tar ka,
hiywe tar riŋ ihər tì tsèmeye ahər a pəra,
ta gwaɗar:
«A ge aà kər dze ana,
meme?
Dite meme na a hə̀ndə̀kək ika are ya?»
27 Wele ata a gwaɗa a tar:
«Yàa tsik a kurum dukw ana a geba nda iye ya aka ndəv,
ama kàa dzùmar zləm tsa.
Dite aàmala na a sàs a kurum metsereke masula ŋa asa ya?
Wànà a sàs a kurum mene gà ɓəzla mazazama ŋgat mbaŋa kəla ya?»
28 Tə tsaraka taŋa ka,
tə ndavayar pìslìɗìɗe hinne,
ta gwaɗar:
«Kər ka,
mala mazazama wele ata.
Ama mə̀r ka,
gà ɓəzla mazazama Musa.
29 Mì sər ka,
Mbulum aka fàfəl a Musa akahər ata.
Ama wele ata ka,
mì sər təv ana a dara iɗəm a tsidze.»
30 Wele aaha a gwaɗa a tar aaka:
«Ee,
tsaka naha ka,
dukw mene à mburma ya,
na a hìndìkiŋ ika are ya,
dite meme na kurum ka,
kà sərum təv ana a dara iɗəm tsiye?
31 Kà sərakwa ka,
Mbulum a dze a zləm a mifefile gà ɓəzla bakal tsa.
Ama a dze a zləm ka,
a wele ana a dzer a gurmits a bəɗ,
dite a ge a dukw ana a sasar a.
32 Daga aà gər ana ta ge gər ahəɗ a,
wura aka tsaraka ka,
tàa hə̀ndə̀k ika are ya a wur ana ta wa ŋgat guluf ŋa ya tsa.
33 Na mege wele aaha a dara ka,
i təv Mbulum a tsəka,
a sle a aà mege duwa tsidze.»
34 Ta gwaɗar aaka:
«Iyyàh,
kər ka,
ta wa kər i bakal dukw yak daga piŋŋe ana,
dite meme na ki ɗif a mə̀r a à duwa ya?»
Tsam ka,
tə dalawara ŋgat i təv mayahaba gər tar a sarrrà.
Yesuw a fàfəl aka gər gà mburma ana ta ŋgat a vatwa ya,
ndəna ta ŋgatar tsiye
35 Yesuw a tsaraka,
tàa dalawara ŋgat i təv mayahaba gər tar ata ya ka,
a dza ba aà mayaha ŋgat.
Aləka a le aà ŋgat ka,
a gwaɗar:
«Kàa gəs *wur ana a dara i təv Mbulum a nda gəzləŋ a?»
36 Wele ata a gwaɗar:
«Wur ana a dara i təv Mbulum ana,
weke,
Əbay gà,
na dite i gis a ŋgat a?»
37 Yesuw a gwaɗar:
«Wele ana kər riŋ ihər ki ŋgeteriŋa,
a fèfilek a kinehe ya gè.»
38 Wele ata a gwaɗar aaka:
«Yàa gəs kər Batsah ga ŋa.»
A daha,
a dzar gurmits a bəɗ aka miɗ ŋgar.
39 Yesuw a gwaɗar:
«I dara aka gər ahəɗ a ka,
aà masasa ikaba seriye a mburma ya.
Gà ɓəzla guluf ta ŋgat a vatwa.
Ama gà mburma ana ta gwa,
mì ŋgat a vatwa ya ka,
ti ne a gà ɓəzla guluf ivaɗ.»
40 Gà asiŋ gà *Farisa ana i təv ŋgar a,
tə tsaraka bazlam ata ka,
tə tsam ahər,
ta gwaɗar:
«Wànà kər kù gwa ana,
mə̀r gà guluf ŋa mbaŋa ya?»
41 Yesuw a gwaɗa a tar aaka:
«Na mege ki gwim gà ɓəzla guluf ka,
ana ki gwim a i bakal tsa.
Ama kù gwaɗum kinehe,
mə̀r gà guluf tsəka,
kurum i bakal hiywe ivaɗ.»