Yuhana 7

Gà damər Yesuw ta gəs ŋgat nda gəzləŋ tsa

1 I dəba ŋa ya, Yesuw a sùwaya riŋ ika ahəɗ Galile tserdze. A sasar mede aka ahəɗ Yuda tsa, aɗaba ana a sàs a gà bàba gà Yahuda aà makə̀ɗà ŋgat a. 2 Akahər ata ka, megirive gà Yahuda ana tə zalar *megirive mekiriwe ga ya, aka à mendze aɗəm i Yeruzalem. 3 Aɗaba taŋa na gà damər Yesuw ta gwaɗar ka: «Tàkwa i faha ya, a Yeruzalem, aka ahəɗ Yuda, dite ka, gà ɓəzla mazazama kər ana i fata ya, ta ŋgat a dukw mene aà mburma ana ki ge a ya mbaŋa ya. 4 Wura à kèhe a dukw ana a ge a ya tsa, na aka sasar ka, mburma tə sər ŋgat tserdze ya. Aɗaba na kər riŋ ihər ki ge a medzibe megemir ata ka, ge parakka, gà mburma tserdze ta ŋgatak, na dite ti sir a ya.» 5 Ama gà damər ŋgar ata ti tsikar kataya ka, ku mege tar tekeɗe, ta gəs ŋgat nda gəzləŋ ɓav tsa.

6 Yesuw a gwaɗa a tar: «Məpaslà ahər mede gà ana Mbulum a pesliŋ a ka, aka ndze aɗəm zukw tsa. Ama i kurum ka, aka sle, ku mege ndeɗime, ki ziwim a ka, gər kurum. 7 Kurum ka, gà mburma ti ne a kurum a are tətsa. Ama iye ka, ti niŋ a are, aɗaba ana i gwaɗawa, megemir tar ana ta ge ye a ka, lele tsiye. 8 Ama kurum ka, dum a megirive ata. Iye ka, aka sle mede gà zukw tsa, aɗaba məpaslà ahər mede gà aka ndze aɗəm tsa.» 9 A tsik a tar aba bazlam ata ya ka, ŋgat ŋa a ndzaba ika ahəɗ Galile.

Yesuw a da a *megirive mekiriwe ga a Yeruzalem

10 Aləka gà damər Yesuw tə da a megirive ata i Yeruzalem a ka, Yesuw tekeɗe, a dəɗ aka tar i dəba ya mbaŋa. Aləka ŋgat a ndzeha a fata ka, aka pàt aba a mburma parzakkà tsa kəla, a kaha ba. 11 Gà bàba gà Yahuda ana i fata ya, ti yaha ŋgat i megirive ata ya hinne. Ta gwa: «Ŋgat dze ana, i ŋga?» 12 Gà mburma tserdze ti tsikeye bazlam pampam nda akəl aka gər ŋgar hinne. Gà misle ŋgiɗ ka, ta gwa: «Wele ŋa ka, ŋgwal mburma.» Ama gà biy ŋgiɗ aaha ta gwa i tar: «Kataya tsa, ŋgwal mburma tsa, a bene a mburma.» 13 Ama a sàs a wura aà meɗe à bazlam ŋa a bəra parakka tsa, aɗaba ana ta ge magəɗa a gà bàba gà Yahuda ya.

14 I huɗ megirive ata ya ka, Yesuw a da a batsah ga Mbulum. A daha, a dza ba aà metsìkè guma ŋgar a mburma. 15 Bazlam ŋgar ata a tsik a ka, a ge aà gà bàba gà Yahuda ata kamala sunwa ya, tə dzala, ta gwa: «Meme na wele aaha a sər duwa hinne kataya ya? Dite kwets aka dzeŋge ɓav tsiye?» 16 Yesuw a gwaɗa a tar aaka: «Guma aaha i tsik a ya ka, a dara ka, i madzala gà gər gà ya tsa. Ama a dara ka, i təv Mbulum ana a slərra iye ya. 17 Wur ana a sasar a ge a dukw ana a tsahən aà Mbulum a ka, a sir a dər, guma gà aaha i tsik a ya ana, a dara ana, wànà i təv Mbulum a ya, tsəna, i madzala gà gər gà ya yà. 18 Wur ana a tsik a bazlam ana a dara i madzala gà gər ŋgar a ka, a yehe a ka, meɗè zləm, dite gà mburma tə̀ zlə̀b à ŋgat. Ama wur ana a waya ka, mburma tə̀ zlə̀b à wele ana a slərra ŋgat a ka, ŋgat ka, mala ndzer, bakal i təv ŋgar tsidze. 19 Magwaɗa ŋa ka, Musa aka vəl a kurum məpala ahəm Mbulum dze ana, dite wura aka gəs ahər ahəm i liwiŋ kurum a ilik tsidze ya. Aàmala na ki yehwim a vatwa aà mekìɗe iye asa ya?»

20 Gà mburma ata ta gwaɗar: «Ki be a a dala kəla yà? Weke na a yehe a vatwa aà makə̀ɗà kər a?» 21 Yesuw a gwaɗa a tar aaka: «I ge megemir a pat mesifikaba ilik pəra ka, a ge a kurum kamala dukw mene aà mburma ya tserdze dze ana, meme? 22 Kurum kà sərum, Musa a gwaɗa a kurum: “Kàa wum kəla, aka ge mehinne tsamakər ka, ki sèswimiŋa.” Nda ndzer kaɗəŋ ana, Musa yà na a lah metsìkè a kurum taŋa ya? Awaŋ, daga aà gər gà tsir kwa ya tsiye? Aɗaba bazlam Musa ata ka, ki seswim a mburma, ku mege pat ŋa aka ndze a pat mesifikaba tekeɗe ya. Taŋa dze ana, meme? 23 Haa kinehe kurum riŋ ihər ki seseywim a mburma na pat ŋa aka ndze a pat mesifikaba ya ana, aɗaba kà wayum bakal ma ta ge riŋ nda təv məpala ahəm Musa asa tsiye, dite aàmala na ki gwim a matsəɓatsəɓ nda təv gà, agəra ana i mbəl à mburma tsekwir tsekwir lele, a pat mesifikaba ya? 24 Miyakum à mege seriye dukw ana ki dzelwim a nda gər a. Ki gwim a seriye ka, nda ndzer ŋa.»

Gà mburma ta gwa: «Wànà Yesuw ana, *Kiristi ya?»

25 Gà asiŋ gà mburma ana i Yeruzalem a, ta gwa: «Abaya naha ka, wele ana gà mburma ti yehe a vatwa aà makə̀ɗà ŋgat a. 26 Samatum kwaŋ. A riŋ à fèfil a parakka ika magər gà mburma tserdze, dite ku wura a peler a ahəm tsa. Wànà gà Əbay kwa tə sər ŋgat ana Kiristi, mala məmbala à mburma ana Mbulum a gwa, i slir a kurumehe a ya kaɗəŋ kəla ya? 27 Ama ka, a ge a kataya tsa. Aɗaba mì sər na Kiristi a dere a ka, wura a sir a, a dara ana, i ŋga ya ka, ti sir a tsa. Ama wele aaha ka, kà sərakwa təv ŋgar ana a dara iɗəm a.»

28 Akahər ata ka, Yesuw a riŋ a tsik a guma ŋgar a mburma i ga Mbulum batsah ŋa ata ŋgəlakəkka. I huɗ guma ŋgar ata a tsik a ya ka, a gwa: «Kà sərum iye, dite kà sərum təv ana i dara iɗəm a ndzer a yà? Ama i dara ka, i ziwera gər gà ya tsa kəla. Wele ana mala ndzer ŋa ya, na a slərra iye ya. Ama kurum ka, kà sərum ŋgat tsa. 29 Iye ka, i sər ŋgat, aɗaba i dara ka, i təv ŋgar a, dite ŋgat na a slərra iye ya.» 30 I fata ya tsara ka, ti yaha vatwa aà magəsa ŋgat. Ama wura ilik aka ləm ahər tsa, aɗaba məpaslà ahər ana Mbulum a tiker a ka, aka ndze aɗəm zukw tsa. 31 Ama gà mburma i magər tar ta gəs ŋgat nda gəzləŋ tar. Gà mburma ata ta gwa: «Wele aaha ka, Kiristi ana Mbulum a gwa i sida ya, i slir a kurumehe a ya dukw ŋgar. Aɗaba meme na mburma ŋa a dere a, a ge a dukw mene aà mburma ka, à zè a dər biy na wele aaha a ge a kinehe ya ya?»

Tə slər gà ɓəzla makaslà ga Mbulum aà magəsa Yesuw

32 Gà *Farisa tə tsarakara dukw ana gà mburma ti tsik aà Yesuw nda akəl i liwiŋ tar a ka, tə dza akaba ahəm nda gà Əbay gà ɓəzla mandəva kuɗa a Mbulum. Tə daha, tə slər gà ɓəzla makaslà ga Mbulum ata, aà magəsa Yesuw. 33 Aləka tə daha ka, Yesuw a gwa: «I ndze a i təv kurum ka, zaakwa pəra, i dəba ŋa ya, i mbìɗ a gər a təv wele ana a slərra iye ya. 34 Ki ti yehwim a iye, ama ki ŋgetwime a iye tsa. Aɗaba ki slwim a aà mede a təv ana i ti de aɗəm a ya tsa.»

35 Gà bàba gà Yahuda ata tə tsaraka bazlam ŋgar ata kataya ka, ta gwaɗaba ika magər tar: «A ti de a dze ana, a ŋga, na dite ka, ki slekwe a aà mesire tə̀vəməŋa tsidze ya? Wànà a de a ana, a təv gà Yahuda ana ta gwitse aba aka ahəɗ diriŋ a liwiŋ gà Girek, a dzeŋge a ter a diriŋ i fata, dite ka, a dzeŋge a a gà Girek mbaŋa kəla ya? 36 Bazlam ŋgar ata a gwa: “Ki ti yehwim a iye, ama ki ta ŋgetwime a iye tsa, aɗaba ki slwim a aà mede a təv ana i de a a ya tsa” ana, a sasar megweɗe ana, là?»

Yam ana à ŋgìz a ùwaɗ ùwaɗ, a vile a mesife a mburma ya

37 A pat mandəvandəv megirive ata ka, megirive ŋgwal ŋa ana ndzer a kuɗa. A pat ata ka, Yesuw a hitse aà mbulum ika miɗ mburma tserdze, a fàfəl ŋgəlakəkka, a gwa: «Na yam aka kəɗ wura ka, ma dara a təv ga ya, ma sa. 38 Ar ka, kamala ana mewetse ŋa a riŋ i wakita Mbulum akahər ata, ta gwa: “Wur ana aka gəs iye nda gəzləŋ a ka, yam ana a vile a mesife a mburma ya, à ŋgìzere a i gəzləŋ ŋgar a ùwaɗ ùwaɗ.”» 39 Ama Yesuw a tsik a tar bazlam minew ata ka, aà Mezite Mesife Mbulum ana a ta vile a a gà na ta gəs ŋgat nda gəzləŋ a. Aɗaba akahər ata ka, gà mburma ata tàa ŋgat Mezite Mesife Mbulum zukw tsa, agəra ana Yesuw aka da a təv mezlibe ŋgar ana i təv Mbulum, tì zlibe a à ŋgat zukw tsiye.

Gà mburma tə ndzək ba ikaba ya təv pampam, agəra Yesuw

40 Gà misle ŋgiɗ ika magər gà mburma ata tə tsaraka bazlam ata tsara ka, ta gwa: «Wele aaka ka, mala məmà à bazlam Mbulum ana ndzer, Mbulum a gwa, i slir a kurumehe a ya.» 41 Gà asiŋ ŋa ta gwa asa: «Wele aaka ka, *Kiristi, mala məmbala à mburma ana Mbulum a gwa, i ti slir a kurumehe a ya.» Ama gà misle ŋgiɗ pam ta gwa: «Kataya tsa. Kiristi a dere a ana, ika ahəɗ Galile ya ɓav a? 42 Aɗaba wakita Mbulum a gwa ka, Kiristi a dere a ka, i gwala Dawda a i kwite Betelehem ana Dawda a ndzawa iɗəm akahər ata ya ana, meme?» 43 Kamala taŋa ya gà mburma tə ndzək ba ikaba ya təv pampam, agəra Yesuw. 44 A sàs a gà asiŋ ŋa, aà magəsa ŋgat zləmana, ama wura ilik aka ləm ahər tsa.

Gà Əbay gà Yahuda ta gəs Yesuw nda gəzləŋ tsa

45 I dəba ŋa ya, gà ɓəzla makaslà ga Mbulum ata ndeɗiŋa ya, ta mbəɗaha gər a təv gà Əbay gà ɓəzla mandəva kuɗa a Mbulum, nda gà *Farisa. Ti ndzeha ka, gà Əbay ata ta gwaɗa a tar: «Aàmala na kə̀ gə̀sumara ŋgat a tsiye?» 46 Gà mburma ata ta gwaɗa a tar aaka: «Wura aka fàfəl ilik kamala ŋgat a tsidze.» 47 Gà Farisa ta gwaɗa a tar: «E/?e, aka baza a kurum za mbaŋa ya? 48 Kà sərum, wura ŋgiɗ a riŋ ika magər gà Əbay kwa, nda gà asiŋ gà mburma mə̀r gà Farisa ya ana, tàa gəs ŋgat nda gəzləŋ a? wura a riŋ tsa. 49 Say gà mburma ana taf, tə sər məpala ahəm Musa tsiye, na a gəs ŋgat a. Tar tserdze tàa nəs, Mbulum aka vəl a tar mezelme.»

50 Wele duwa a riŋ ilik ika magər gà Farisa ata, zləm ŋgar Nikudimus, wele ana a da a təv Yesuw akahər ata ya. A daha, a gwaɗa a tar: 51 «Məpala ahəm kwa ka, aka vəl a kwa vatwa aà mege seriye aà mburma kataya tsa, say ki tserekikwe a ndzer ŋana a tsik a ya dzekwiŋ.» 52 Ta gwaɗar aaka: «Assàh, wànà kər ana, gà Galile mbaŋa kəla ya? Dzeŋge wakita Mbulum lele kwaŋ, dite ki sir a dər ka, mala məmà à bazlam Mbulum ilik a dere a ika ahəɗ Galile ya tsa.» 53 I fata ya ka, ku mege weke a tsaraka taŋa ka, a daba a ma ŋgar.