Yuhana 5

Yesuw a mbəl à mala magàha a bəɗ duwa aà guva

duluv Baytidzata

1 I dəba ŋa ya ka, megirive gà Yahuda duwa aka ndze aɗəm, dite Yesuw a mbəɗ gər a Yeruzalem asa. 2 Ama i fata ka, duluv duwa a riŋ bise aà guva biye zlagam ana tə zalar biye hərmaga gà təmaŋ a. Zləm duluv ata ndaka ahəm gà Yahuda ka, Baytidzata. I fata ka, ga a riŋ mazlazla ŋa tseke tsə̀ràh, dzə̀ɓər iɗəm ə̀zləm. 3 Gà ɓəzla dukw məməta hinne ta hənawa iɗəm: Gà ɓəzla guluf, nda gà ɓəzla videl, dite nda gà ɓəzla magàha a bəɗ tserdze. Tar riŋ ta bebe a yam ana a ɓezle a ya. 4 Aɗaba a pat ŋgiɗ ka, gawla Mbulum a dawara, a ɓezle a dər. Aka ɓazla dər ka, gà ɓəzla dukw məməta ata ti de aɗəmiŋa. Dite malahalah ŋana a lah aɗəm a ka, a mbiliŋa, ku mege dukw məməta awara tekeɗe ya.

5 I liwiŋ gà mburma ata ka, wele duwa a riŋ, aka ndza i dukw məməta hinne, mive dzik makər gəra tsamakər. 6 Aləka i təv ana Yesuw a ndzeha a təv gà mburma ata ya ka, a ŋgatar mahə̀nà ŋa zleleɓɓè, a sər ka, aka ndza i dukw məməta hinne. A gwaɗar: «A sàsak mimbile ya?» 7 Mala dukw məməta ata a gwaɗar: «Əbay, wura a riŋ na dite à yè a iye a yam a tsa, na i təv ana aka ɓazla ya. I gwaɗawa, i dzik aba a aà matara aɗəm ka, misle ŋgiɗ à lèhiŋ aɗəmiŋa.» 8 Yesuw a tsaraka kataya ka, a gwaɗar: «Hitse, zla bwitse yak, ka da ba.» 9 I fata ya tsara ka, wele ata a mbəl kaɗəŋ, a hitse, a zla bwitse ŋgar, a da ba.

Ama a pat ata a mbəl a ka, pat mesifikaba gà Yahuda. 10 Aɗaba taŋa, gà bàba gà Yahuda ta gwaɗa a wele ata: «Kay, naka ana meme, mbakum ka, pat mesifikaba ya, məpala ahəm kwa aka vəlak vatwa aà mazla bwitse yak tsiye?» 11 Wele ata a gwaɗa a tar aaka: «Wele ana a mbəl à iye ya, na a gweɗiŋ ka, zla bwitse yak, ka daba ya.» 12 Tə tsam ahər asa, ta gwaɗar: «Weke na a gwaɗak ka, daba ya?» 13 Ama wele ata a sər, weke na a mbəl à iye ya ka, a sər tsa. Aɗaba Yesuw aka daba i fata ya tsara, a miyak à gà mburma hinne i fata.

14 I dəba ŋa ya, Yesuw a le aà wele ata i ga Mbulum batsah ŋana ka, a gwaɗar: «Araha, kinehe ka, kàa mbəl kuɗa. Ama kə̀la ka, ka ta ge bakal asa tsa, aɗaba dukw ŋgiɗ ma ta gik ba a gər, mà za taŋa tsa.» 15 Wele ata a da i fata ya, a daha, a gwaɗa a gà bàba gà Yahuda: «Yesuw na a mbəl à iye ya.» 16 Aɗaba taŋa na gà bàba gà Yahuda ata tə dza ba aà mene are a Yesuw a, agəra ana a mbəl à wele ata a pat mesifikaba ya. 17 Ama Yesuw a gwaɗa a tar aaka: «Tsir gà a riŋ ihər a ge a megemir kəla pat, dite iye tekeɗe, i ge a kataya mbaŋa.» 18 Gà bàba gà Yahuda tə tsaraka taŋa ka, ti yaha vatwa aà makə̀ɗà ŋgat. Ta kiɗ a ŋgat ka, aɗaba ana a nəs à məpala ahəm tar, a mbəl à mburma a pat mesifikaba ya ɗekɗek tsa. Ta waya makə̀ɗà ŋgat ndeyndey ŋana ka, agəra ana a zal a Mbulum, a gwa ka: «Tsir gà», a geye akaba à ba ŋgar nda ŋgat a.

Ndzəɗa Yesuw Kiristi Kəla Mbulum

19 Aɗaba taŋa, Yesuw a gwaɗa a tar aaka: «Iye ihər i gweɗe a kurum a nda ndzer, pàrsa iɗəm tsa: Iye Kəla ŋgar, i sle a aà mege duwa ilik nda ahər gà tsa, say i ge a ka, dukw ana i ŋgatar Tsir gà a gewa ya. Aɗaba dukw ana tserdze Tsir gà a gewa ya ka, iye Kəla ŋgar ŋa tekeɗe, i ge a kataya mbaŋa. 20 Aɗaba Mbulum a waya iye Kəla ŋgar, dite a riŋ a ɗifiŋ a à dukw ana ŋgat ŋa a ge a tserdze ya mbaŋa. A ti ɗifiŋ a à gà megemir gà bàba ŋa ana à zè a naha kinehe ya, aka miɗ mbaŋa asa. Ama taŋa na a ta ge aà kurum a kamala sunwa ya. 21 Kamala Tsir gà ana a mbil a à mburma i məməta ya, a vile a ter a mesife awiya ŋa ya asa ka, iye Kəla ŋgar ŋa tekeɗe, i ta vile a mesife ata a gà na i pala tar a mbaŋa. 22 Seriye ka, Tsir gà a ge a nda ahər ŋgar tsa. Ama a viliŋ ndzəɗa a ahər a iye, Kəla ŋgar, aà mege ŋa. 23 A ge dər kataya ka, dite gà mburma tserdze tə̀ zlə̀b à iye kalkal, kamala ana tì zlibe a à Tsir gà ya mbaŋa. Wele ana à zlibe a à iye Kəla ŋgar tsiye ka, taŋa ka, a zlibe a à Tsir gà ana a slərra iye ya ɓav tsa.

24 Iye ihər i gweɗe a kurum a nda ndzer, pàrsa iɗəm tsa: Wele ana aka dza zləm a bazlam gà, dite aka gəs Mbulum ana a slərra iye ya asa ka, aka ŋgat mesife ana à ndìv a tsa aà biybiy a. Seriye à gis a ŋgat tsa, aka be aà məməta ya a mesife. 25 Iye ihər i gweɗe a kurum ŋa nda ndzer, pàrsa iɗəm tsa: Pat ŋa a deriŋa, kamala megweɗe ya ka, aka mbər mendzera kinehe, ama ka, gà məməta ti tsereke a biye ɗa Kəla Mbulum, dite ka, gà na tàa tsaraka ya ka, ta mbiliŋa. 26 Mbulum Tsir gà ka, ndzəɗa Mesife i ba ŋgar. Ama ka, aka viliŋ ndzəɗa ata a ahər a iye, Kəla ŋgar, mbaŋa, na dite i vile a mesife ata a mburma ya. 27 Ŋgat mbaŋa na a viliŋ ndzəɗa a iye, Kəla ŋgar, aà mege seriye aka gər gà mburma ya, aɗaba ana iye wele ana a dara i təv ŋgar a. 28 Gà dukw ata ma ta ge aà kurum kamala sunwa ya tsa. Aɗaba pat ŋa a dere a ka, gà məməta ana i biye ya tserdze, ti tsereke a biye ɗa gà. 29 Tàa tsaraka ka, ta hitsere a i gà dive tar a. Gà na tàa ge dukw ana ŋgwal ŋa ya ka, ta mbil a, dite ta ŋget a mesife ana à ndìv a tsa aà biybiy a. Ama gà na tàa ge dukw ana ŋgwal ŋa tsiye ka, ta mbilere a i tar ka, aà mehìtsè aka miɗ seriye Mbulum pəra.»

Mbulum na a ge sida Yesuw Kiristi ya

30 I dəba ŋa ya, Yesuw a gwaɗa a tar asa: «Iye nda gər gà ka, i sle a aà mege duwa ilik tsidze, say nda ndzəɗa Mbulum. I ge a seriye ka, kamala ana ŋgat a tsikiŋ a. Mege seriye ga ka, nda ndzer ŋa, aɗaba i zle ahər a tsa. Ama i ge a ka, dukw ana a sàs a wele ana a slərra iye ya, tsəka, biy na a sèsiŋ a tsa. 31 Na iye ŋa na i gebe a sida ba gà ŋa ya ka, dite meme na gà mburma ti sir a dər, i tsik ka, ndzer ŋa ya? 32 Ama misle ŋgiɗ a riŋ na mala sida ga ya, dite i sər dər, dukw ana a tsik a à iye ya ka, ndzer kaɗəŋ.

33 Zləm wele ata ka, Yuhana. Akahər ata ka, kàa slərum gà mburma a təv ŋgar, dite ka, ma ɗe a kurumara à dukw ana i ge ya, wànà pàrsa ya, tsəna, ndzer kaɗəŋ a ya? Ama tə tsarakara ihər a ka, ndzer kaɗəŋ. 34 Iye ka, sida mburma a giŋ a ŋgulum tsa. Ama i tsik a kurum bazlam Yuhana ka, aà mazlàkà kurum, na dite ki mbelwim a ya. 35 Akahər ata Yuhana a ne ka, dzaydzay kamala lalampa ana à div a ya. Kàa gəsum bazlam ŋgar zaakwa, kàa ŋgayum ba i təv dzaydzay ŋgar ata ya mbaŋa. 36 Ama iye ka, mala sida gà a riŋ, a za biy Yuhana ana a ge ya. Aɗaba megemir ana iye ihər i ge a ya ka, biy Tsir gà ana a viliŋ a ahər a, dite na i ge a ya. Mege megemir ata na a ne mala sida gà, mburma ti sir a dər ka, Mbulum Tsir gà na a slərra iye kaɗəŋ a. 37 Tsir gà na a slərra iye. Ŋgat nda gər ŋgar tekeɗe, aka ge sida gà mbaŋa. Ama kàa tsarakum mifefile ŋgar tsidze, dite kàa ŋgatumar ilik tsa asa mbaŋa. 38 Kàa tikwim bazlam ŋgar a gər kurum, aà ma ndza i gəzləŋ kurum tsidze mbaŋa, aɗaba ana kàa gəsum iye, Kəla ŋgar ana a slərra iye tsiye. 39 Kurum ihər ki dzeŋgwim a wakita Mbulum kəla pat. Kà dzalum ka, ki ŋgetwime a iɗəm mesife ana à ndìv a tsa aà biybiy a. Tsaatsa i huɗ wakita ata ti tsik a ka, aka gər gà. 40 Dite kwets a sàs a kurum madàra a təv ga ya, aà meŋgete a mesife ata ndzer ŋa ya tsa.

41 Iye ka, i yehe a mezlibe mburma ana tì zlibe a à iye ya tsa. 42 Ama i sər, kurum ka, kà wayum Mbulum tsa. 43 Aɗaba i dara ka, Mbulum Tsir gà na a slərra iye a təv kurum a. Ama ka, kàa gəsum iye tsa. Ama na bəla wura a dara a təv kurum a nda ndzəɗa ŋgar ka, ki giswim a ŋgat lele. 44 A sàs a kurum ka, mazàmbaɗàyà à ba kurum ɗekɗek pəra. Ama a sàs a kurum mayaha mezlibe ana a dara i təv Mbulum ana ŋgat ilik a tsa. Na kataya ana, dite meme na ki slwim a aà magəsa iye ɗar ɓav a? 45 Ama ka tə dzalum ka, i ta me a kurum a à bakal ika miɗ Tsir gà tsa. Na a ta me a kurum a à bakal ka, Musa ana kà tikwim madzala gà gər kurum a təv ŋgar a ivaɗ. 46 Na mege kàa gəsum bazlam Musa nda gəzləŋ kurum ndzer ka, ana ka, ki giswim a iye mbaŋa, aɗaba aka gər gà na a wetse bazlam akahər ata ya. 47 Araha kwets kàa gəsum dukw ana a wetse ya tsəna, dite meme na ki slwim a aà megìse bazlam gà asa ya?»