Gà ɓəzla metsiɗike gər a gà mawusawus tə dara
a təv Yesuw a
2
1 Ta wa Yesuw ka,
i kwite Betelehem ika ahəɗ Yuda,
akahər ana *Hiridus ŋgat batsah Əbay ana i fata ya.
I təv ana ta wa ŋgat a ka,
gà ɓəzla metsiɗike gər a gà mawusawus ana ti de a aà gəza mbulum a,
tə dara ika tseke pat ana à mbizera a ya.
Tə da a Yeruzalem.
2 Tə daha,
ta gwa:
«Kəla ana ta wa ŋgat biɗikw ŋa ɗa i faha,
ŋgat batsah Əbay gà Yahuda ya ana,
i ŋga?
Aɗaba maa ŋgat a mawusawus ŋgar ana a mbəzara ya,
dite na mì dara aà medzer gurmits a bəɗ a.»
3 Batsah Əbay Hiridus a tsaraka bazlam tar ata tsara ka,
a wiser a tar gər hinne,
nda gà asiŋ gà mburma ana i Yeruzalem a tserdze.
4 A daha,
a yaha gər a gà Əbay gà ɓəzla mandəva kuɗa a Mbulum,
dite nda gà ɓəzla medzeŋge məpala ahəm Mbulum a mburma tserdze.
A gwaɗa a tar:
«Ta we a batsah Əbay ana Mbulum a gwa,
i slir a kurumehe a ya dze ana,
i ŋga?»
5 Ta gwaɗar aaka:
«I kwite Betelehem ana ika ahəɗ Yuda ya.
Aɗaba mala məmà à bazlam Mbulum a tsik ahər,
a gwa:
6 *“Dite kər ka,
kwite Betelehem ana ika ahəɗ Yuda ya.
Kər ka,
kəla ŋa i magər gà kwite ana
ika ahəɗ Yuda ya asa tsa.
Aɗaba Əbay ana a ta kiv a gà mburma gà
gà Isərayel kamala təmaŋ a,
à pèt a aba ka,
i fata.”»
7 Aləka i dəba ŋa ya,
Hiridus a zal a gà ɓəzla metsiɗike gər a gà mawusawus ata nda akəl,
a tsam aà tar,
a gwaɗa a tar:
«Ndeɗime na kə̀ ŋgatum a mawusawus ata a mbəzara dze ya?»
8 Dite i dəba ŋa ya,
a slər gà mburma ata a Betelehem,
a gwaɗa a tar:
«Dumaha,
ti yahum kəla ata a Betelehem nda metsehe.
Na kàa ŋgatum tə̀vəməŋa ka,
ka dumara,
ka tsikwimiŋ,
dite i ti dzer a gurmits a bəɗ mbeete.»
9 Gà mburma ata tə dza zləm a bazlam ŋgar ata kataya ka,
ta mah ba,
ti diŋa.
I təv ana ta meh a ba ya ka,
ta ŋgataha a mawusawus ata,
aka mbəzara asa.
A lah a tar aka miɗ.
Tar tə zazamaha i dəba ya.
A de a ka,
tar tekeɗe,
ti dehe a te.
Aləka a ndze a təv ana ta wa iɗəm kəla ata ya ka,
dzeŋ a hitse aà gəza mbulum,
ɗegirgir aka kəla ata.
10 Ta ŋgat a mawusawus ana a hitse a fata ya ka,
ta ŋgayaba hinne.
11 Tə daha,
ta pəts a ga ana ta ŋgat iɗəm gà kəla ata nda məmər ŋgar Mariya ya.
Tə daha,
tə dzar gurmits a bəɗ,
tə zàmbaɗa à kəla ata kuɗa.
I dəba ŋa ya,
ta pətsak gà kàzlàŋa tar,
tə dzàyar dukw maslawa tar ana tsakala ŋa hinne ya:
Gà gura nda wirdè dizl dukw ana a ze hwaŋŋa lele ya,
nda gà atwa dizl dukw ana ta wene a ka,
a ze a lele ya mbaŋa asa.
12 Aləka i dəba ŋa ya asa,
Mbulum a gwaɗa a gà mburma ata i sunwa ya:
«Kà mbəɗum gər nda təv Əbay Hirirus asa tsa.»
Tə tsaraka kataya ka,
ta mah ba,
ta mbəɗ gər a ma nda tseke ŋgiɗ.
Tə da aka ahəɗ Ezipt
13 Gà ɓəzla metsiɗike gər a mede gà mawusawus ata,
tə da iɗəm a tsara ka,
gawla Mbulum ilik a pàt aba a Yasufa i sunwa ya asa,
a gwaɗar:
«Hitse,
val à gà kəla aaha nda mama ŋgar aka ahəɗ Ezipt,
tsəka,
aɗaba *Hiridus a riŋ a yehe a kəla aaha teftef.
A waya medzeye à ŋgat.
Kàa daha ka,
ka ndza riŋ i fata haa a pat ana Yàa gwaɗak,
mbəɗara gər a.»
14 Yasufa a tsaraka kataya tsara ka,
a hitse,
a da à gà kəla ata nda mama ŋgar a,
aka ahəɗ Ezipt ndaavəɗ ata tsara.
15 *Tə ndza riŋ i fata haa a pat ana Hiridus a mət a.
Dukw ata tserdze ya,
a ge ba ka,
dite dukw ana Mbulum BATSAH kwa ŋa a tsik akahər ata nda ahər mala məma à guma ŋgar a ka,
aka pat aba lele kuɗa.
A gwa ka:
«Yàa zalara iɗəm a kəla gà ika ahəɗ Ezipt ya.»
*Hiridus a bats gà ɓəza ndirkiz
16 Aləka i dəba ŋa ya,
Əbay Hiridus a fə̀r ka,
gà ɓəzla metsiɗike gər a mede gà mawusawus ata ta gəs bazlam ŋgar ata tsa,
ti lèlekwe ihər a ma ndaka tseke ŋgiɗ a ka,
a tsəɓar hinne.
Tsam ka,
a slər gà mburma asa,
a gwaɗa a tar:
«Dumaha,
batsum gà ɓəza ndirkiz gà asləka ŋana ika ahəɗ Betelehem a,
nda gà na i gà kwite ana ta mberra ya fit.
Ki giswim a,
ki betswim a ka,
daga aà gà ɓəza ana mive sula ya,
tsikw aà gà na ta waya kinehe ya.»
A ziwe aɗəm taŋa ka,
tits ahər ana gà mburma ata tə daha,
ta gwaɗar ka,
maa ŋgat a mawusawus a.
17 Kamala taŋa ya,
dukw Hiridus ata a ge ya,
a ndəv ka,
à bazlam ana Yeremiya,
mala məmà à bazlam Mbulum a tsik akahər ata ya kaɗəŋ.
18 *A gwa ka:
«Mewideye duwa a ɗera huwwa i kwite Rama ya,
tuwa a riŋ hinne,
ndzəŋ ndzəŋ ndzəŋ
ta geye a dər zlaàzla asa mbaŋa.
Rasel a tiwe a gà ɓəza ŋgar.
A sle a aà magəsa gəzləŋ aà tuwa ya tsa,
aɗaba gà ɓəza ŋgar a riŋ asa tsa,
tàa bats tar fit.»
Yasufa a màra à Yesuw ika ahəɗ Ezipt ya,
aka ahəɗ Isərayel a
19 Aləka Əbay *Hiridus a mət ka,
gawla Mbulum a pàt aba a Yasufa i sunwa ya,
ika ahəɗ Ezipt asa.
20 A gwaɗar:
«Kinehe ka,
hitse,
mbəɗ gər à kəla aaha nda mama ŋgar a,
aka ahəɗ Isərayel kuɗa.
Aɗaba gà na ti yehe a vatwa aà makə̀ɗà kəla aaha ya ka,
tar riŋ asa tsa,
tàa mata.»
21 I dəba ŋa ya,
Yasufa a tsaraka kataya tsara ka,
a mbəɗ gər à kəla aaha nda mama ŋgar a,
a ma tar aka ahəɗ Isərayel.
22 Ama i dəba ŋa ya asa,
Yasufa a tsaraka ka,
Arkilawus kəla Əbay Hiridus aaha ndeɗiŋa ya,
aka mà à Əbay tsir ŋgar a bəra ika ahəɗ Yuda asa ka,
magəɗa a ger aà mede a fata.
Ama sunwa a da aaka asa,
Mbulum a ɗifer à dukw ana a ge a ya.
Tsam ka,
a da à tar aka ahəɗ Galile.
23 A ndzawa riŋ i kwite ana tə zalar Nazaret a i fata.
Kamala taŋa ya,
dukw ana gà ɓəzla məma à guma Mbulum ti tsik akahər ata ya ka,
aka ge ba kaɗəŋ.
Ta gwa:
«Ti ti zel a a kəla ata ka,
gà Nazaret.»