dexema pold dikkisattan lushadaa
5
1 kafoot!
oot helpaanettetenne oot lashsh sett inn tsaafa amm fadusinnishshamu.
2 lashsh pold qum kerot awwadd deyiyop koddaadd inn mashshayn heufutan.
3 siipat "heikk andotanne iyaan dikkaah" kiditete,
qum laashamunt iskattet tashit ketta paishop,
patet iyyaa qara painta,
iyyaanno amm ukela passanninanemu.
4 inn lamm kafoot!
amm poorinnata ila kishshanemu:
semmaalla lashsh hin amm qum keraatep inn ketta deyintamu.
5 inn dahaynen medda attumatatenne heka kallapatat kida,
amm innu orr porinnatatenne heka awwaddatatemu.
6 semmaalla hayna,
illushattan minaxaash kallaanna male,
qum orr pil peanniyanep peatta diinna.
7 orr peanniyu awwadd peannin,
orr taaronniyonno awwadd taaronnin.
8 innu lamm oot innu orr kallapat koddin maalla,
illushattan minaxaash kallaannaa,
amaantetanne hoxsunt qum silfatep uuwannaa,
irraxatet dina lamm qum kulleet adantatep mashshaynu qari haayannaa.
9 Moohot innu hemb,
poldaaynu Yesus kristoos kapin ikkimin dina akkanninnoss male,
amm jiiaytaassemo.
10 kiyyatan kinnaannu shoke toino,
ikkimin iyy olle kallaanninnoss kristoos ootaaynu toy.
11 semmaalla qum inn ammann erkannishshan mittass,
mashshimashayn orqimiyaa orrkokkiyaa.
korsaanne paanussa muutayta
12 kafoot!
inn ila iyyaan erkaman payyahiy,
mahh poldatin inn korsiyyanne kaadayyaann kodd ikkim serkinnintanessin inn dinkamannin.
13 erkamaaddu minann serka kaanenne hoxsunt iyyaa qafnaadaa;
innanno mashshayn andotin ollin kallaadaa.
14 kafoot!
"melakkalayya tushaa,
hin nahiy kokkiyaa,
hin tashshiyi hesaa,
nam dahenni duupadaa" henkidin inn korsin.
15 dahaynen nayqunt nayquntin mitaattisa qara illushadaa;
sekapeeshsh helpa mitt mashshmashshaynessenne orr pilas iyaan dikk erkasa kokkaadaa.
16 helpa mitt masmasaa.
17 helpa mitt dinkamadaa.
18 heikketin Mooha aypisadaa,
kiyyat inn Yesus kristoosin qaftan ila Moohot inn qara fadiyyu hiniya kida.
19 erkama laaffot miilot tur duha diiyyaa,
20 daayy him tuffatta diiyyaa,
21 heikk qall tooyaa,
iyaan dikk qapadaa.
22 iyaan nayq dahenn ketta allsekaadaa.
23 Mooha andot mashshayy paana heikketin inn miiliyu,
laafoshaynenne nafseshaynenne dakinshayn dahenn poldaannu Yesus kristoos deyiyyo haasutta male lushamenii,
kallaadenii.
24 iyy inn hembiyyu oot iyyat iamaanam kodd maalla,
sed erkannina.
25 kafoot!
innossenno Mooha dinkamaa.
26 kafaaynu dahenn olle dinkishsh miilin orrdinkan paanussa olli dehayyaa.
27 hitaym sed kafaaynu dahenness ikkim waarusinnintanessin mahh poldatin inn dinkamannin.
28 has dikk heka pold heka Yesus kristoos inn olle kinnaadu.