Na Turak i Pablo sike
Filemon
Na Akkidyot i Pablo
1
I Pablo iyaw a matturak sikwam, Filemon a iddu-iddukammi a kolak anna katarabafuwammi sike Afu. Nefukukak gumafu so annunturuk meafu sike Jesu Kristo. I Timoteo a wayitam si angngurug e bulungku so patturak na iyaw.2 Iturakku pay iyaw sike Apphia a wayitam si angngurug anna sike Arkipo a bulummi a masserbi sike Afu a awan talona a manilla sundalu anna si amminan pay a mangurug sike Jesus a mammu-ammung so balem.
3 Idasalku sike Dios a Amatam anni Afutam a Jesu Kristo a ibali-balinda a massimpat sikwayu anna indan dakayu si piya.
Na Anggam anna Angngurug i Filemon
4 Nu idasallan taka, maumirak a mappabalat sike Dios a daya-dayawangku 5 gumafu se madingnga-dingngagku a iddu-iddukannuweno amminan a minangikkurug sike Afu Jesus anna ibali-balinnu a mattalak sikwana. 6 Idasalku a yo pattataratatam si tata angngurug e mangiyadda si arollam a pintindi so amminan a mapiyera a meyadda na pakisittatatam sike Kristo. 7 Wayik, maanggammak ingke anna nattuyag ino nakamku gumafu se inidduknguweno tolayera i Dios a napaanggamman ino nakamda.
Na Arangnganna i Pablo sike Filemon
8 Gumafu so piddukngu so minangikkurug ira, marangngak si fabor sikwam. Matuyag yo nakamku a idundun nad sikwam a kawayim sike Kristo yo maawag a akwannu, 9 udde gumafu si piddukngu, mas kinanggammangku a makiabid sikwam. Ikkanak i Pablo a pannakabaggia i Jesu Kristo e sitoye nakafukuk gumafu sikwana. 10 Makigumallakak sikwam Filemon, para sike Onesimo a anakku si angngurug. Nattabaliyak a ama sikwana sikwak a nakafukuk. 11 Siin, ammem a mapammakapiyan i Onesimo udde sitoye, dokal yo pammakapiyanta sikwana.
12 Pulingku sikwam i Onesimo a iddu-iddukangkuwengke. 13 Kanggammangku nad a ana lamang i Onesimo sikwak sitaw tapenu damanak a duffunan a katalim sikwak a nakafukuk kepay gumafu so annunduk si Mapiya a Baga meafu sike Jesus. 14 Udde ammek kanggam a akwan inay nu ammem iyannut takesi maggabwat ingkepay si nakammuweno annuffunnu sikwak e bakkan a fuwersadu.
15 Antu nakuyeno gafuna a neyaroyu i Onesimo si malan lamang sikwam takesi nanu mulina baggina, sigigyanna baggina sikwam amu-amu. 16 Muli baggina sikwam bakkan lamang tata imbut nu bakkan tata iddu-iddukangku a wayi si angngurug. Neyaranniyen baggina sikwak, udde annanotin sikwam gumafu se bakkan lamang a imbutnu nu bakkan taten a wayi si Afu.
17 Se nu ibilangngak a bulunnu a masserbi sike Afu, arasawannu i Onesimo dengke a panangarasom sikwak. 18 Nu nalliwat onnu nakagatut baggina sikwam, ikkanakngeno makammu. 19 Ikkanak iyaw i Pablo a mattura-turak sitaw a akkidyot. Pagangkuneno gatutna. Ammekun nad a sapitan kepay a gatutnu sikwak ino pattabalim si minangikkurug sike Kristo. 20 Antu wayi, gumafu so angngurugngu sike Jesus, iyaddam yo arangngangku sikwam. Paanggammannak a wayim sike Kristo.
21 Neturakku iyaw sikwam gumafu se mangurugak ingke a maangwamma yo arangngangku a akwannu. Ammuk a odduna kepay yo makwam ammat so inarangku.
22 Anna tata kepay, mangiparangka si tata kwartu a pagyanangku se innanamangku a tabbaggan i Dios ino dasal diyawera a makalawanakun so paffukukan anna muliyakun sikwayu.
Na Panguddi a Akkidyot
23 “Manantawkan?” Kunna i Epafras a bulungku a nakafukuk gumafu so angngurugnga sike Jesu Kristo. 24 Kunnapay yo sinapit da Markus, Aristarco, Demas anni Lukas a bulungkuwera a masserbi sike Jesu Kristo.
25 Idasalku a ipaitanana i Afu Jesu Kristo yo simpatna sikwayu amminan.