Gongingol tataɓol dow debbo jaayɗo
7
1 Ɓiyam, joga haalaaji am,Korsinaa jamirooje am faa wooɗa.
2 Joga ɗe heɓa mbuuraa.
Reenu janngingol am hono no ndeenirtaa yitere maa noon.
3 Wattu ɗum fuu e kolli maa hono kootone,
winndu ɗe dow alluwal ɓernde maa.
4 Adu hakkillo hono sakiike maa debbo,
paamal du hono yigoo ɓadiiɗo,
5 heɓa mboɗɗoɗaa debbo mo a jeyaa,
e haalaaji mum eytooji.
6 Nyannde gom, miɗo darii e suudu am,
njuurniimi faro feneetere,
7 de nji'umi jokolɓe ɓe ƴoƴaa,
hakkunde maɓɓe, nji'umi mo walaa hakkillo.
8 O jokki laawol wuro iri debbo oon,
o adi laawol, o fonndii toon.
9 Tawi naange yanii,
futuro waɗii,
jemma warii,
nimre suddii leydi.
10 De inan, debbo oon wari faa hawra e makko,
ina ɓornii kolte hono woykuuru,
ɓernde mum na heewi hiila.
11 O carkotooɗo, o semtataa,
koyɗe makko ndarataako ley ɓaade makko.
12 Ko ittata mo dow laabi yaarata mo ley luumo,
wakkati fuu imo ɗuppinanii mo o ferginta.
13 O nanngi suka gorko oon, o wuundii ɗum,
o maataay semteende, o wi'i ɗum:
14 — Miɗo haanunoo waɗude sadaka.
Hannden mi hebbinii amaana am, iɗum woni ley wuro am.
15 Ndelle mi yaltii faa mi hawra e maaɗa.
Ayyo, mi tefii ma, de joonin mi yi'i ma!
16 Mi daɗɗii suddamaaje dow leeso am,
mi weƴƴitii gude Misira lobbe.
17 Mi wattanii daɗɗo am ɗakke urɗe,
mi uririi ngo leɗɗe feere feere.
18 War, mbaalden, mbeltoɗen.
Accu yidde sulina en faa fajiri.
19 Sabo goram walaa wuro.
O waɗii jahaangal boɗɗungal.
20 O adii mbasu ceede,
O wartataa joonin, sanaa hakkunde lewru.
21 Nii o eytiri mo haalaaji keewɗi.
O waawiri oon haalaaji belɗi.
22 Wakkati gooto suka gorko oon jokki mo,
hono ngaari njaareteendi hirsirde.
Imo fonndii to jukkungo makko,
hono lewla njanunga ley tuugola
23 faa kural yuwa heyre makko,
hono no foondu harotoondu saamirta nder tuugol.
O anndaa wo yonki makko o sonnii.
24 Wooɗi ɓiyam, hettindanam joonin,b
hakkilan haalaaji am.
25 Taa ɓernde maa rewa laabi iri debbo oon,
taa jokku laabi makko.
26 Sabo o liɓii yimɓe heewɓe,
ɓe o halki limataako.
27 Suudu makko wo laawol laakara,
jipporgol joonnde makko wo maayde.