Gongingol dow debbo jaayɗo
5
1 Ɓiyam, hettina hakkillo am faa wooɗa,omtan noppi maa paamal am,
2 heɓa keɓaa taykagol,
de anndal du wurtoo ley hunnduko maa.
3 Hunnduko debbo jaayɗo na simtina njuumndi,
haalaaji muuɗum na ɓuri nebbam ɓoohiɗinde.
4 Ammaa cakite muuɗum haaɗan rok hono kahi,
ɗeeɗan hono kaafaahi ki ɗemle ɗiɗi.
5 Koyɗe makko ina pa'i faro maayde,
teppe makko na ponndii laakara.
6 Imo woɗɗi e laawol nguurndam,
o yoppii ngol, de o anndaa.
7 Joonin ɓiyam, hettinanam,
taa woɗɗa e ko mbi'anmaami.
8 Woɗɗa laawol wuro iri debbo oon,
taa ɓada dammbugal suudu makko,
9 heɓa taa kokkaa darja maa woɓɓe,
nguurndam maa du, hiiɗaaɓe,
10 heɓa taa jawdi maa fayna woɓɓe,
de keɓal golle maa naata e junngo janano.
11 Faa taa a uumu si wakkati maa yottake,
tawa ɓanndu maa fuu nyolii.
12 Ndeen a wi'an:
— Kaari, mi wanyii tindinoore,
mi yawii pelooje!
13 Mi hettindanaaki jannginooɓe kam,
mi salake haalaaji ekintinooɓe kam.
14 De joonin mi warii faa dammbugal halkere,
mi semtii ley lenyol.
15 Yaru ndiyam ɓunndu maa,
mbubboojam ley mayru tan.
16 Taa jaɓu ɗam rufa dow laabi,
taa accu ɗam wecco nokku fuu.
17 Accu ɗam laatoo mardi maa, aan tan,
Taa senndu ɗam e woɓɓe.
18 Accu ɗam laatane barke,
mbeltoroɗaa mo ɓaŋuɗaa nder jokollaaku maa,
19 imo yiɗinii, imo ŋarɗi hono lewla.
Accu ŋari makko nannga hakkillo maa fuu,
Accu yidde makko suline wakkati fuu.
20 Ɓiyam, taa debbo pijoowo beege,
ɗume meemude ɓanndu debbo jaayɗo nafata?
21 Anndu, Joomiraaɗo na yi'a laabi neɗɗo fuu,
imo ndaara to neɗɗo yahata fuu.
22 Ɓonɗo saaman nder ngayka mum,
hakkeeji muuɗum nanngan ɗum.
23 O maayan sabo o salake eeltol,
o majjan saabe keewal puuyndam makko.