Jamirooje Joomiraaɗo sappo
20
1 Laamɗo haali haalaaji ɗi, wi'i:2 — Miin woni Joomiraaɗo, miin woni Laamɗo mooɗon, burtinɗo on leydi Misira e maccungaaku.
3 On ndewataa ɗowtanteeɓe woɓɓe sanaa miin tan.
4 Taa ngaɗanee ko'e mon tooru fey, ko nanndi e ko woni e kammu maa ko woni e leydi maa ley ndiyam fuu. 5 On cujidantaa iri majjum, on teddintaa ɗum sabo miin Laamɗo Joomiraaɗo mo ɗowtantoɗon wo mi Laamɗo kiroowo, jukkotooɗo luttuɓe kam e ƴuwdi muɓɓen faa e taaniraaɓe tatoɓe e nayoɓe. 6 De wo mi kinnotooɗo yiɗuɓe kam e ɗowtantooɓe jamirooje am faa yaha e taaniraaɓe taaniraaɓe ujunaaje.
7 Taa noddee innde am ɓolum, miin Laamɗo Joomiraaɗo mooɗon, sabo mi accataa pijirɗo innde am ɓolum. 8 Taa njeggitee nyannde fowteteende heɓa ceninanon kam nde. 9 On ngollan golleeji mooɗon fuu ley balɗe jeegom. 10 Ammaa nyannde jeɗɗaɓerde wo nyannde fowteteende am, miin Laamɗo Joomiraaɗo mo ɗowtantoɗon. On ngollataa fey, onon e ɓiɓɓe mooɗon worɓe e rewɓe e maccuɓe mooɗon e horɓe mooɗon e kulle mooɗon e jananɓe jooɗiiɓe ley gure mon. 11 Sabo ley balɗe jeegom miin Joomiraaɗo ngaɗumi kammu e leydi e maayo e ko woni ley muɓɓen fuu. Saabe ɗuum mi barkinii nyannde jeɗɗaɓerde, mi senii nde.
12 Teddinon baabiraaɓe mon e inniraaɓe mon faa balɗe mon njuuta e leydi ndi kokkumi on, miin Laamɗo Joomiraaɗo mooɗon.
13 Taa ngaɗee war-hoore.
14 Taa ngaɗee jeenu.
15 Taa mbujjee.
16 Taa ceedanee neɗɗo fewre.
17 Taa muuyee suudu goɗɗo naa dee goɗɗo naa maccuɗo muuɗum naa korɗo muuɗum naa ga'i mum naa araaji mum naa huunde fuu ko goɗɗo jeyi.
No yimɓe Israa'iila kuliri ɓangugol Laamɗo.
18 Yimɓe fuu nani pelnyaali e fuufaango luwal, ɓe nji'i maƴƴe e waamnde na suurta. Nde ɓe nji'unoo ɗum fu, ɓe keddii iɓe ndiwna kulol, iɓe keedi to toowti, iɓe ndarii. 19 Ɓe mbi'i Muusaa:
— Haaldu e amin, min kettinto. Ammaa Laamɗo kaa taa haalda e amin sakko min maaya.
20 Muusaa wi'i yimɓe ɓeen:
— Taa kulee sabo Laamɗo ina ndaartindoo on faa kulol muuɗum wona ley ɓerɗe mon, faa taa ngaɗon hakke.
21 Yimɓe ɓeen ndarii to woɗɗi ammaa Muusaa ɓadii ruulde niɓɓunde to Laamɗo woni toon.
Jamirooje dow kirsirɗe teddinooje
22 Joomiraaɗo wi'i Muusaa:
— Kaalanaa Israa'iilankooɓe, mbi'aa ɓe: On nji'ii mi haaldii e mooɗon gilla dow kammu. 23 On ngaɗantaa ko'e mon allaaji kaŋŋe naa cardi. 24 Nyiɓanon kam sakkirde, nyiɓiron nde leydi. Dow mayre ngaɗoton kirsamaaji mooɗon buleteeɗi e kirsamaaji jeɗeteeɗi ittaaɗi ley kulle mooɗon pamare e mawɗe fuu. To cuɓiimi teddinde innde am fuu, mi waran to mooɗon mi barkina on. 25 Nde nyiɓoton sakkirde teddinirde kam e kaaƴe fu, taa nyiɓiron nde kaaƴe cehaaɗe sabo hayre moƴƴiniraande e gollirgal fu, wo harmunde. 26 On ngaɗataa ƴeeŋirgal e sakkirde am sabo si on ngaɗirii noon oɗon mbaawi suuritaade.