No Ibrahiima e Abimelek ngaddi
20
1 Ibrahiima ƴuwi ɗoon, eggiri horɗoore leydi Kanaana. O hoɗi hakkunde Kaades e Sur. O eggi ɗoon, o hoɗoyi Gerar. 2 Ɗoon du Ibrahiima wi'i Saaratu deekum oon wo sakiike muuɗum debbo. Saabe ɗuum Abimelek kaananke Gerar wi'i Saaratu waddee to muuɗum, de waddaa. 3 Ammaa Laamɗo ɓangani mo ley koyɗol jemma, haaldi e makko, wi'i:— Inan, a maayan, sabo debbo mo aduɗaa oon wo debbo ɓaŋaaɗo, jogiiɗo goriiwo.
4 Tawi Abimelek meemaayno debbo oon tafon. O wi'i:
— Joomam, yalla a halkan lenyol ponnditiingol ngol waɗaay ko boni naa? 5 Wanaa goriiko oon jaati wi'i kam wo o sakiike muuɗum debbo naa. Kanko debbo oon du, o wi'i kam oon wo sakiike makko gorko? Wo e ɓernde laaɓunde kooƴirmi mo, mi waɗaay ko boni.
6 Laamɗo haaldi e makko e koyɗol, wi'i mo:
— Goonga, miɗo anndi e laaɓal ngaɗirɗaa ɗum, katin du miin haɗi ma luttude kam, ɗum waɗi de mi accaay meemuɗaa mo. 7 Joonin kaa, hokkitin gorko oon deekum, sabo o annabaajo. O du'ante heɓa mbuuraa. Ammaa si a hokkitaay mo oon fu, tennyoraa a maayan, aan e jeydaaɓe maa fuu.
8 Abimelek dawi gilla beetee, noddi yimɓe ɓaade muuɗum fuu, fillanii ɗum'en haalaaji ɗiin fuu. Yimɓe ɓeen kuli sanne. 9 Abimelek noddi Ibrahiima, haaldi e muuɗum, wi'i:
— Ɗume woni ko ngaɗuɗaa min ɗuum? Ɗume ngaɗumaami de ngadduɗaa hakke mawɗo o dow am e dow leydi am? A waɗii kam ko neɗɗo haanaa waɗeede. 10 Abimelek wi'i Ibrahiima katin:
— Ɗume anniyiɗaa de ngaɗuɗaa min ɗuum?
11 Ibrahiima jaabii, wi'i:
— Mi miilake yimɓe nokkuure nde kulataa Laamɗo fay seeɗa, mi miilake du ɓe mbaran kam saabe deekam oon. 12 Ammaa si goonga, wo o sakiike am debbo du. Min kawtu baaba, ammaa min kawtaa inna, de ɓaŋumi mo. 13 Nde Laamɗo ittunoo kam suudu baabam ndeen, mbiimi o, nokku ɗo min njottii fuu, o waɗana kam moƴƴere, o wi'a wo mi sakiike makko gorko.
14 Abimelek hooƴi be'i e baali e ga'i e maccuɓe e horɓe, hokki Ibrahiima. O hokkiti ɗum Saaratu jom suudu muuɗum oon. 15 Abimelek wi'i:
— Inan leydi am yeeso maa. Njooɗoɗaa ɗo njiɗuɗaa e mayri fuu.
16 O wi'i Saaratu:
— Ndaar! Mi hokkii sakiike maa gorko oon ceede cardi ujunere faa ɗum holla wo a laaɓuɗo yeeso wondiiɓe maa ley ko waɗi ɗuum fuu.