Waɗiino e jamaanuuji, Alla hokku en jamaanuuji, lobbi. Gorko gom wonoo na tawraa rewɓe ɗiɗo: lettugaajo e gorgaajo. Lettugaajo heɓay ɓeengu. Illa ɓaŋaa rimay. Ɓe ɗiɗo fu yo ɓe tewtooɓe. Debbo lettugaajo o, won ko jogii. Gorgaajo o, walaa fay gootum saboo ko heɓi fu e ɓiɓɓem haaɗata.

Na worndi noon faa waali duuɓi. Wari debbo mo rimataa o yehi mberka wuro bammu wayridi nawlum reedu. So rimay hannde ni yo jaango rimata. Nyannde hewtunoo hoorem ni maayi. Ɓiyum du rewi maayi. Inniyo e ɓiɗɗo fu kawrondinaa mooɓaa, mooɓiraa wudere debbo mo rimataa o, Alla e wudere heɓaaka.

Alla resi en reeni en faa debbo mo rimataa o, wartowi. Goriiko jooti o de fillanii o ko hewtii ɗum. O wi'i neɗɗo maani, a yi'ii ko tawtuɗaa. De mi luttii ma. Nder ko nawla o heddii e ɓeengu ɗum, mi heɓay wudere heɓa o mooɓirowee. Ndelle nder suudu maa to, ittoy mi wudere.

Illa jom wuro yottinay haalam ni deekum fiifii, fii ɓalinngo. O wi'i mi yarlaaki mi yaafaaki. Noy watta de nawlam ufiree e wudere am? Goriiko jaabii wi'i o yaafoo ɗum de ta o ɗunna haala. O waddanaama gude jeɗɗi nder ko inna ɓiɓɓe o, maayii ɗum. O suɓoo welande o, o luttina wudere makko mooɓiraande mayɗo o. Debbo wi'i wanaa haala. Wuɗerem haajaa, haajaaka fu wonnde. Goriyo wi'i ta waɗu noon. Accu cuurondiren. Debbo men jaabii wi'i accataa.

Wari mettorgal fu ɓuray nih. Jom wuro anndaa fu no watta. O wi'i hollam ndelle coggu wudere maa heɓa mi yoɓe. Debbo wi'i wuderem haajaa. Goriyo o, wi'i hokkii o nagge de o hula Alla ta o haala haala wudere nde, koo semteende. Debbo wi'i wuderem haajaa. Wuderem ufiraande nawlum nde, haajaa.

Gorko men memi deekum hunngorii. Heddii haalani suudu baaba. Suudu baaba yamiri debbo men yoppira wudere nde saabu Alla saabe mayde maayataake de wartee. Debbo salii, wi'i kam kaa wuderem haajaa saboo yi'ay fu no yaari heɓa wuderem sootee ufiree nawlum. Ndelle kam kaa wuderem ni haajaa; ɗunnnay duko.

Suudu baaba tawi jaaltataako debbo o. Yimɓe kawriti mbi'i yehee ɗo almaam, gaɗa tawaama mooɓeede nawliiko. Ɓe njehi ɗo almaam. Ɓe pillanii ɗum ko waddi ɓe. Almaam wi'i nanay dagu haala ka e mettude haalude e bada. Suudu baaba ɗaɓɓi o ndaara ko o jey waɗude heɓa ɗum gasa.

Heddii almaam wi'i suka tefee waddee. Suka waddaa. O wi'i suka o, e debbo kaajaaɗo hokkitee wudere o, ndewondira nootoo o nder suudu. Ɓe nootii o nder suudu. Almaami wi'i ɓe njooɗoo. Ɓe njooɗii. Almaami fetti kaddule kese ngaɗɗe kemtati. O wi'i debbo o, suɓoo jeɗɗi ɓuruɗe mbelanɗe ɗum, jogoo de sela haalude haala wudere mooɓiraande nawlum nde. Debbo wi'i wanaa haala, kaddungal mum haajaa. Yiiɗaano nawlum, nawlum yiɗaano ɗum. Ndelle ko saabii de wuderem heere sootee ufiree nawlum so wanaa fewre. So ngoonga fu wudere won walaano, ni o ufenoo ɓolum.

Almaam memi debbo ronki. Ɓe mbuytii yaasi ɓe tawi suudu baaba na jooɗii. Almaam salmini suudu baaba de wi'i, na ɗaɓɓa suudu baaba tewta uutirɗi e uutooɓe ɗoota debbo o, faa e yanaande nawlum. Nawliyo o, uutee de suka debbo hokkitee kaddugal mum. Suudu baaba heddii yedday. Sukaaɓe uutooɓe ngaɗaa ardii. Debbo men ummii rewi. Ɓe njottowii janaale. Ɓe tewti yanaande nawliiko ɓe njiiti. Ɓe naatondiri e uutude.

Sukaaɓe worɓe mballondiri uuti yanaande nde. Ba neeɓan ni ɓe ngarowi ɓe puunti e mayɗo. Ɓe mbi'i suka debbo ɗakkoo suddita kaddugal mum. Suka debbo ɗakkii. O ndarii nawliiko na fukkii. O ndaari faa wooɗi. O tawi ko ɗum fuɗɗii wuttaade. Nde wootere ni o nanngi wudere makko heɓa o suddita. Ndeen noon yanaande nde nanngi o, fooɗi de faɗɗi maynooɗo na fukkii e ɓiyum yaasi. Ni yanaande diri hawri.

Paɗɗaanga yaasi birii ɓiyum wuundii de ummanii wuro. Ɓornaaki soomaaki. O wi'i o walliree wudere. Adunaaru diri hawri e makko, hokki o gude. O taadii ndee, o bammbiri ɓiiko ndee.

Ndelle so neɗɗo sawrinaama ni sawroo. So sawraaki, ko ɓuri hasaade ko waawanaa hewtoto ɗum.