Waɗiino e jamaanuuji, suka gorko tewnunoo deekum. O yottorii wuro esiraaɓe makko kiikiiɗe. Hiraande rottaa waddaa. O salii o hiirtataako. Nih faa waɗi balɗe tati. Jaka suka gorko men yo fenan. Won ko yiiti. O dabinaanaa ɗo kedde hiraande ndesetee.

Rewɓe ɓaade ndeen njiitaanaa so yimɓe kiirtodoke ni kedde hiraande adee ndekee dow danki. Njannde gom rewii faa jemma jenngi; mono fu yahi fukowii. Ɓeero-men du naatowi suudum heɓa fukkoo. Naatunoo ni duutii sarlam wawlii. O acci faa jenngi, o anndi koo yimɓe fu ɗaanoke de o soosii o ƴeenyowi danki. O jooɗii na o nyaama ba nyaamoowo nyiiri deekum. Saaya makko na yooli o. Jon kaa nde weeti fu noon o watta.

Nyannde nayaɓal nde, beero men waɗi ko woowunoo. O naati suudu makko o fukkii na o wawlii sarla makko. Jenngunoo ni o ƴeenyowi danki. O nyaamunoo faa o haari ni o ummii heɓa o tefa ɗo o jipporoo. Nde wootere ni o saytii. Leggal danki nanngi saaya makko. Na o luuloo. O walanaa ley, o walanaa dow. O luuloto, gineeji makko yo luuloto. Yo durwitaade tan heɓa heɓa jippoo.

Ɗo beero o, durwitotoo ɗo, sonnyom findinii esum. Ko o saytii ɗum esiiko faamii. Heddii wuytii yaasi Alla e sikkaanaa na'i mbonnata gineeji. O ɓantunoo hoore makko ni o yi'i suka gorko na luuloo e leggal danki. Ni o huli. Ɗo o wari heɓa o huuɓa ɗo, ni goroo ɓiiko wi'i o: “ Taa hulu; yo min! Min muuyi bawloyde de leggal danki nanngi saaya am. Ni esiyo debbo futtini gitte. Anndaa fu ko jey wadde. Na yaagonoo goroo ɓiyum sako ɗo goro ɓiyum luulotoo, gineejim na liilii yaasi.

Heddii debbo mawɗo men yehi heɓa wallowa goroo ɓiyum. O yottinoo ni suka gorko foortii. Esiyo debbo tawi walaa fu no wallira o. Heddii wi'i suka gorko nyobboo. Suka gorko nyobbunoo koyɗe ni gineejim cennditii na luuloo. Esiyo debbo yi'unoo luulotooɗe goroo ɓiyum ni wi'i: "Foorta, foorta, hulu Alla de poortoɗaa." Worndi noon faa ɗo ɓadii weetude de o heɓi o hewti hoore makko.

Ndelle ta calee wadde ko mboowuɗon wadde gure mon.