Waɗiini e jamaanuuji, suka gorko yawnoo wuro esiraaɓem, heɓa tewna deekum. Suka gorko waɗi jemmaaji ɗiɗi wuro esiraaɓem. Njannde o waalannoo tati nde, o hokkaa laawol. Haɗay heddii o waali. Wetunoo ni o adi laawol. Kanko e deekiiko na ardondiri. Naa na ɓe njaha.

Suka gorko heɓunoo uddii wuro esiraaɓem ni fuɗɗi dukidilde e deekum. Ɓe kaalii kaa, ni ɓe ngartira kaa. Ni na ɓe njaha. Ni na ɓe nduka. Suka gorko e deekum ngarowi tawi araawa na tummba.

Ngaa waɗoke ni ngaa to waɗɗoo. Ni ariyel na lata. Araawa ngoota rewi faa waɗɗii de lataa boɓɓowii. Debbo o, jali heetii de wi'i: "Allaakubaru, tawee nih rewɓe ngaɗannoo worɓe." Gorko o, jali de jaabii wi'i: "Wallaahi a tawranno bammaa korle kelɗe e rafi nyiiƴe." Ni suka debbo semti. Anndaa fu ɗo darotoo. Nde wootere ni hippitii itti gullal. Ni ɓe ndewondiri. Taa yaaɓu ɗo njaaɓum faa ɗo ɓe kootowi ɗo ɓe ƴuurunoo.

Suka debbo e gorum naatunoo ɓaade ni yimɓe ndoggi kawriti ɓoy na ƴama: "Koree-jam de ngartuɗon?" Suka debbo e gorum na ndarii. Ɗiɗo fu na mayri gootal. Ni esiraaɓe na ƴama: "Koree-jam hey!" Ni suka gorko na murii. Ni deekum na murii. Baaba suka debbo warowi, yamiri suka gorko saabe Alla. Suka gorko itti fillii.

Ndelle neɗɗo ta yelanoo banndum bone.