Puccu gooɗom na woni ley wuro na wi'ee Jamalenngu. Ayyo! Joomiraaɓe puccu ɓen na njogii cukalel. Suka on mawni dey koreeji muuɗum en na mbi'a ɗum wawtu fu tinnoo e puccu ngun, sabu na yiɗi puccu sanne. O tinnoo taa o waɗɗoo puccu ngun. Puccu ngu wi'a taakenaa Jamalenngu. Kanko le pucci ɗi o waɗɗotoo ɗi fu, ngu koreeji makko kaɗɗi o ngun tan o horannta. Koreeji makko le fu, na kakkilani ngu, na anndi ngu wooɗaa.

Nyannde gom le koreeji makko fay gooto walaa ɗon. Kanko du o wi'i o ndaaran ko saabi ko ɓen mbi'i ta o waɗɗoo puccu ngun.Tan o fiirti puccu o waɗɗii. Nde o waɗɗinoo ɗum ko o wurtii fu jogi na doggida mo, na doggida mo, na doggida mo fa, fa, faa o anndaa fu to o woni ? O tefi ooncude ɗum fa o warta wuro. O tefi, fey! Puccu salii. Si wanaa o yehi fa, fa, faa wuro gooɗom, o anndaa fu ton. Abada, o yahaay ton. Nde o yottinoo fu yimɓe ɓen njottii kurmiti mo. Puccu ngun darii ɗon.

Jaka wuro ngon, wuro sukunyaaɓe. Mo yottoo, ɓen na nannga mo; nanngunoo mo fu, ngatti ley suudu coki, ommbi. Njehi kaɓɓowi puccu makko yaasin. Nde kaɓɓunoo puccu ngun yaasin fu, kanko kay ommbi mo ley suudu, kalfini mo dem-mawɗo. Kalfinnoo mo dem-mawɗo fu, mbi'i fa njaha jon kay pilowoo leɗɗe, fa ngara njuɗa mo. O faamii kanko du ko ɓen sukunyaaɓe. Ngattunoo mo ley suudu kalfini dem-mawɗo fu, kaɓɓi puccu makko yaasin, dem-mawɗo na jooɗii dammbugal. Nde sukunyaaɓe ɓe ndillunoo njehi fa pilowoo jon kay leɗɗe ngara fa njuɗa mo nyaama fu, dem-mawɗo on wi'i: "Suka, ko foti waddude ma ɗo ?" Tan o wi'i dem-mawɗo:

Jimol ngol weli dem-mawɗo. O wi'i noy ? Yimanam gadin suka. O wi'i ɗum:

Dem-mawɗo wi'i: "Haan! yimanam gatin. O wi'i, demmawɗo accu ndelle mi wurtoo yaasin kay mi ndaara puccu am, sabu nyaamaay. Dem-mawɗo omti o wurtii. O wi'i yimanam ndelle. O wi'i:

Dem-mawɗo wi'i wallay a wonnii, dey noy mbiiɗa gatin ? Yimou! o wi'i accu ndelle mi huumta puccu am ngu mi yarnowaa ɗum sabu yaraay ndiyam. Debbo mawɗo wi'i hey suka, a doggataa na ? O wi'i toy njaham-mi ? Fay si njaa-mi ɗo mi wartan. Dem-mawɗo wi'i wooɗii. O haɓɓitaa. Nde o haɓɓitainnoo fu, dem-mawɗo wi'i o yima ginan. O wi'i:

Timmii! O waɗɗii. Nde o waɗɗinoo fu, o fiyi puccu makko, nanaa na yaha; o heɓi o oonci ɗum jon kay yaade wuro. O ummani wuro.

Dem-mawɗo doomi faa sawti yi'aay, anndaa fu no watta. Tan yehi ndaarowi nokkuwel nyaande to yimɓe cokkata na ƴaroo. Dem-mawɗo yehi, ley nyaande suuɗowi jon kay sabu na anndi sukanyaaɓe ngartii fu mbaran ɗum. O yehi ley nyaande o uwowii ton.

Timmii! Sukunyaaɓe ngartunoo fu, ndaari: tawaay puccu, tawaay jom puccu. Pilii, njiitaay dem-mawɗo du. Tawi wuugaandu warii fa filoo gabbe, na soppa. Na sankitannoo nyaande fu, tawi dem-mawɗo na irii ton, tan hoɗi dow leggal na waɗa: “Wukkutu wukkutu, wurtin dem-mawɗo ley nyaande." Tan yimɓe mbi'i ɗum e wuugaandu ndu wiita nih? "Wukkutu wukkutu, wurtin dem-mawɗo ley nyaande." Wi'aa hey! Ɗume wuugaandu ndu haali nih? Ɓe kettinii faa ɓooyi, ɓe nani ko wuugaandu wiita. Ɓe njehi ɓe ndarowi ley nyannde ɓe tawi dem-mawɗo. Kam ni yaa ɓe kooƴowi ɓe ngari ɓe luttini jom Jamalenngu, ɓe nduppi ɗum, ɓe nyaam-mi.