Goɗɗo wonnoo de yoo limaam leydi. Yimɓe leydi ndiin fu ngari mbanyi o. Ɓe mbii ɓe njaɓan limaanaaku makko. Ɓe memi ni ɓe kunngii. Wari ɓe teetiri limaanaaku ngu doole. Be mbii golleeji limaam mbooɗaa.

Limaam waali na wulla. O wi'i wanaa ko limaanaaku ngu, teetaa ɗum o wullata, yo ko inde makko bonnaa ɗum o wullata.

Ɓiɗɗo debbo lobbo limaam o jogii. Ɓiɗɗo o, wi'i: “Baaba jeƴƴina koo so Alla jaɓii fu ɗum gasan. Ɓe nji'an.

Limaam keso o, laandaana o, e kaananke leydi ndii fu, mi haɓɓan ɓe. Nji'aa de yimɓe ɓe fu nji'a. O wi'i waɗɗanam ɗuum.

Ɓiɗɗo debbo o, hooti. O wi'i o haaja o yi'a limaam de so wanaa wara ɓe kiira. O hokki limaam wakkati ɗum warata. Ni o hawrowi laandaana du. Kam du o hokki ɗum wakkati. O fallowii kaananke. O hokki ɗum wakkati.

Ɓiɗɗo debbo o, tewti keesuuwal muuɗum joƴƴini. Hiirnoo jemma ni laandaana artii wari. Jooɗii na yewta. Ni hanaa limaam na wara. Suka debbo o maatannoo o, ni haalani laandaana koo bammum na wara.

Laandaana wi'i anndaa no wattaa. O wi'i a suuɗoto so na a hula semteende. O wi'i o yedday. Ɓiɗɗo debbo sonti keesu de wi'i o waara o naata. O naati, ni o sokkaa nder keesu.

Ni limaam yottii. Jooɗii na ɓe njewta. Ni nanaa kaananke na wara. Ɓe maatannoo ɗum, ni suka debbo haalani limaam koo bammum na wara. Limaam wi'i anndaa no watta. O wi'i a suuɗoto so na a hula semteende. O wi'i o yedday. Ɓiɗɗo debbo sonti keesu de wi'i o waara o naata. O naati, ni o sokkaa nder keesu.

Ni kaananke yottii. Jooɗii na ɓe njewta. Ni nanaa baaba suka debbo na wara. Ɓe maatannoo ɗum, ni suka debbo haalani kaananke koo bammum na wara. Kaananke wi'i noy ngatten ? O wi'i a suuɗoto so na a hula semteende. O wi'i o yedday. Ɓiɗɗo debbo sonti keesu de wi'i o wara o naata. O naati, ni o sokkaa nder keesu.

Biɗɗo debbo acci faa naange fuɗi de hawrondini yimɓe wuro fu. Tawi limaam tewtaama yi'aaka. Laandaana tewtaama yi'aaka. Kaananke tewtaama yi'aaka. Noy wattee ? Toy ɓe ngonii ? Ni na ɓe tewtee. Suka debbo tan e yonkim andi to ɓe ngoni.

Suka debbo wi'i ɗume suudu baaba waɗanta ɗum, so ɗum hollii ɗo ɓe ngoni. Ɓe mbi'i ko o haajaa fu o waɗante. Suka debbo wi'i haajaakanaa bammum hokkitee limaanaakum. Ɓe mbi'i ɗuum kaa wallaa baasi. O wi'i yimɓe ngaraa ndelle.

Suka debbo yottii, sonti keesuwal. Ni laandaana wurtii. Ni o ƴami salle miisiide yo ley keesu warti. Ɗo won miisiide naa ? Ni laandaana na jooɗii. Yimɓe ƴami ɗum, salle ko waɗi ɗum, na wooɗi; golle bonɗe ɓuruma ɗum? Ni o sonti limaam. Nani taybiyol mum na wakki. O sonti kaananke du. Ni baabiiko adaa limaanaakum hokkitaa.

Ɗum le, ngayngaylaaku e neɗɗo ruuɗotoo.